ស៊ីប៊ីស៊ី ផ្តល់ការគាំទ្រដល់និស្សិតកម្ពុជាជាមួយនឹងសិក្ខាសាលាស្តីពីចំណេះដឹងផ្នែកហិរញ្ញវត្ថុ

ព្រះសីហនុ៖ ក្រុមហ៊ុនក្រេឌីតប្យួរ៉ូ ខេមបូឌា (ស៊ីប៊ីស៊ី) បានបោះជំហានយ៉ាងសំខាន់ ក្នុងការលើកកម្ពស់ចំណេះដឹង ផ្នែកហិរញ្ញវត្ថុនៅកម្ពុជា​ដោយបានរៀបចំសិក្ខាសាលា ​នៅសាកលវិទ្យាល័យបៀលប្រាយ សាខាខេត្តព្រះសីហនុ កាលពីថ្ងៃទី២៨ ខែតុលា ឆ្នាំ២០២៣ កន្លងទៅនេះ។

សិក្ខាសាលា​នេះ មានការចូលរួមយ៉ាងអធិកអធមពីសំណាក់សិស្សនិស្សិតចំនួន ១៥០នាក់ ដែលក្នុងនោះរួមមាន និស្សិតដែលកំពុងសិក្សាជំនាញផ្នែកគ្រប់គ្រងធុរកិច្ច ជំនាញគណនេយ្យនិងហិរញ្ញវត្ថុ គ្រប់គ្រងទូទៅ ធនាគារនិងហិរញ្ញវត្ថុ និងទីផ្សារ។​

Mr. Oeur Sothearoth, CEO of CBC

សិក្ខាសាលានេះផ្តោតលើតួនាទី របស់ប្រព័ន្ធចែករំលែកព័ត៌មានឥណទាន ក្នុងការគ្រប់គ្រងហានិភ័យឥណទាន និងបរិយាបន្នហិរញ្ញវត្ថុ​ដែលមានគោលបំណង បំពាក់បំប៉នដល់និស្សិត ​នូវចំណេះដឹងសំខាន់ៗ ​សម្រាប់សុខភាពហិរញ្ញវត្ថុ។ ជាមួយគ្នានេះលោក អឿ សុធារ័ត្ន នាយកប្រតិបត្តិ​នៃក្រុមហ៊ុន ក្រេឌីតប្យួរ៉ូ ខេមបូឌា (ស៊ីប៊ីស៊ី) និងលោកស្រី សេង សុភា នាយកសាកលវិទ្យាល័យបៀលប្រាយ សាខាខេត្ដព្រះសីហនុ បានអញ្ជើញជាអធិបតី​ក្នុងសិក្ខាសាលាដ៏មានគុណតម្លៃនេះផងដែរ។     

លោក អឿ សុធារ័ត្ន បានលើកឡើងថា៖ «ការប្តេជ្ញាចិត្តរបស់ ស៊ីប៊ីស៊ី លើសពីការធ្វើឱ្យប្រសើរឡើង​នៃបរិយាបន្នហិរញ្ញវត្ថុ។ យើងខិតខំពង្រឹងចំណេះដឹងផ្នែកហិរញ្ញវត្ថុ រៀបចំរូបវន្ដបុគ្គលម្នាក់ៗ​ដើម្បីរុករកនូវទិដ្ឋភាពឥណទានប្រកបដោយការទទួលខុសត្រូវ។ សិក្ខាសាលានេះ​គឺជាសក្ខីភាពនៃភាពជាដៃគូ​​របស់យើង ជាមួយក្រសួងអប់រំ យុវជន និងកីឡា ក្នុងការពង្រឹងការអប់រំក្រៅប្រព័ន្ធ»។     

Mrs. Seng Sophea, Director of Build Bright University

លោកស្រី សេង​ សុភា បានបន្ថែមថា៖ «យើងមានសេចក្តីរំភើបរីករាយក្នុងការសហការជាមួយ ស៊ីប៊ីស៊ី ដើម្បីពង្រីកចំណេះដឹងផ្នែកហិរញ្ញវត្ថុរបស់សិស្សនិស្សិតរបស់យើង ដែលជាជំនាញបំណិន​ជីវិតដ៏សំខាន់ដែលនឹងជួយដល់ពួកគេផ្ទាល់ ក្រុមគ្រួសារ និងសហគមន៍របស់ពួកគេផងដែរ។​»      ​

និស្សិតម្នាក់​ដែល​បានចូល​រួម​​ឈ្មោះ ស៊ុន ឆវន្ដ ពិតជារំភើប​ចំពោះ​គំនិត​ផ្ដួចផ្ដើម​នេះ​ ព្រមទាំងបាន​លើកឡើង​ថា៖ «វា​ជា​ឱកាស​ដ៏​ល្អ​សម្រាប់​យើង​ក្នុង​ការ​យល់​ដឹង​ពី​ពិភព​ហិរញ្ញវត្ថុ​ឱ្យកាន់​តែ​ច្បាស់។ ខ្ញុំទន្ទឹងរង់ចាំព្រឹត្តិការណ៍បែបនេះបន្ថែមទៀត។»

គួរបញ្ជាក់ផងដែរថា ការយកចិត្តទុកដាក់របស់ ស៊ីប៊ីស៊ី ចំពោះកិច្ចការសង្គម គឺបង្ហាញឱ្យឃើញ​នៅក្នុងការរៀបចំសិក្ខាសាលាជាប្រចាំរបស់ខ្លួនសម្រាប់សិស្សនិស្សិតនៅទូទាំងខេត្ត-ក្រុងក្នុងប្រទេសកម្ពុជា ដោយស្របតាម “​យុទ្ធសាស្រ្តថ្នាក់ជាតិស្ដីអំពី​បរិយាបន្នហិរញ្ញវត្ថុឆ្នាំ២០១៦​ដល់ឆ្នាំ២០២៥”។ ស៊ីប៊ីស៊ី នៅតែបន្តចូលរួមចំណែកក្នុងការពង្រីកចំណេះដឹង​ផ្នែកហិរញ្ញវត្ថុនៅក្នុងប្រទេសកម្ពុជា តាមរយៈផលិតផល និងសេវាកម្មរបស់ខ្លួន។                        

អំពីក្រុមហ៊ុន ក្រេឌីត ប្យួរ៉ូ (ខេមបូឌា) ខូ អិលធីឌី (ស៊ីប៊ីស៊ី)

ក្រុមហ៊ុនក្រេឌីត ប្យួរ៉ូ (ខេមបូឌា) ខូ អិលធីឌី ដែលហៅកាត់ថា ស៊ីប៊ីស៊ី​ ជាក្រុមហ៊ុនឈានមុខគេ​ក្នុងការផ្តល់នូវ ​សេវាព័ត៌មាន  ឧបករណ៍វិភាគទិន្នន័យ​ និងរបាយការណ៍ឥណទាន ដល់​ស្ថាប័នហិរញ្ញវត្ថុទាំងអស់ ក្នុងប្រទេស កម្ពុជា។ ចាប់តាំងពីឆ្នាំ២០១២​មក ស៊ីប៊ីស៊ី បានជួយ​ដល់អតិថិជនក្នុងការគ្រប់គ្រងហានិភ័យនិងអត្ថប្រយោជន៍ ជាច្រើនលើផ្នែកធុរកិច្ច និងការសម្រេចចិត្តបានកាន់តែប្រសើរតាមរយៈដំណោះស្រាយជាច្រើនដូចជា
របាយការណ៍ឥណទានអតិថិជន របាយការណ៍ឥណទានក្រុមហ៊ុន ខេ-ស្ករ​ សេវាវិភាគទិន្នន័យ ផែនទីហានិភ័យឥណទាន សេវាតាមដានឥណទាន ​សេវាត្រួតពិនិត្យឥណទាន សេវាវិភាគទិន្នន័យតាមតម្រូវការ និងសេវាវាយតម្លៃអចលនទ្រព្យឌីជីថលជាដើម។

បច្ចុប្បន្នស៊ីប៊ីស៊ីមានសមាជិករហូតដល់ទៅ ១៩៣ស្ថាប័នហិរញ្ញវត្ថុ ដែលរួមមាន ធនាគារពាណិជ្ជ ធនាគារឯកទេស គ្រឹះស្ថានមីក្រូហិរញ្ញវត្ថុទទួលប្រាក់បញ្ជើ គ្រឹះស្ថានមីក្រូហិរញ្ញវត្ថុក្រុមហ៊ុនភតិសន្យា ប្រតិបត្តិករឥណទានជនបទ។​

សម្រាប់ព័ត៌មានបន្ថែមអំពី ស៊ីប៊ីស៊ី និងសិក្ខាសាលាផ្សេងៗនាពេលខាងមុខ សូមតាមដានគេហទំព័រ៖ www.creditbureaucambodia.com.kh