ឆ្នាំទាំង ៧ រាសីឡើងខ្ពស់ មានលាភហូរចូល ក្នុងសប្ដាហ៍ថ្មី

ខាងក្រោមនេះជាហោរាសាស្ត្រគិតតាមឆ្នាំចន្ទគតិរបស់ចិនសម្រាប់មនុស្សកើតឆ្នាំជូត ខាល ថោះ ម្សាញ់ វក ច និងកុរ ដែលជាឆ្នាំមានរាសីឡើងខ្ពស់ក្នុងកំលុងសប្ដាហ៍ថ្មី ពោលចាប់ពីថ្ងៃទី២៧ ខែសីហា ដល់ថ្ងៃទី២ ខែកញ្ញា ឆ្នាំ២០២៣។

ឆ្នាំជូត (កណ្ដុរ)

សប្ដាហ៍នេះរាសីរបស់កណ្ដុរ​ឡើងខ្ពស់បន្តិច​ ហើយវានឹងបន្តទៅដល់ថ្ងៃទី១៤ ខែកញ្ញា។ មិនថាក្នុងការងារ ឬជីវិតទេ កណ្ដុរមិនជួបបញ្ហាអ្វីគួរបារម្ភឡើយ ចំណែកសុខភាពក៏ល្អប្រសើរដែរ។ យ៉ាងណាមិញសភាពចិត្តហាក់ច្របូកច្របល់បន្តិច​ ទាមទារឱ្យធ្វើសមាធិ និងអត់ធ្មត់ខ្ពស់។

ឆ្នាំខាល​ (ខ្លា)

ខ្លា នឹងមានលាភក្នុងអំឡុងសប្ដាហ៍ថ្មី រហូតដល់ពាក់កណ្ដាលខែកញ្ញា។ ចូរប្រយ័ត្ន!​ ទោះបីជាទទួលបានលាភនូវប្រាក់ច្រើនក៏ដោយ ជនខិលខូចអាចមានឱកាស ប្រសិនបើធ្វេសប្រហែសតែបន្តិច។ នៅកន្លែងការងារ ត្រូវរៀនទប់អណ្ដាតនូវរឿងដែលគួរលាក់បាំង​ និងរឿងដែលគួរលាតត្រដាង ហើយ​មិន​គួរ​ប្រាប់​អ្វី​គ្រប់​យ៉ាង​ទៅ​កាន់​មិត្ត​រួម​ការងារនោះទេ ​ទោះបីជាមិត្ត​ល្អ​បំផុត​ក៏ដោយ។

​ចំពោះ​ទ្រព្យសម្បត្តិ​វិញអាចត្រូវបាត់ទ្រព្យលើអ្នកខ្ចីបុល ហេតុនេះចូរប្រយ័ត្ន មុននឹងសម្រេចឱ្យអ្នកស្គាល់ខ្ចីប្រាក់ ព្រោះនឹងមិនអាចទទួលបានវាមកវិញទេ។

ឆ្នាំថោះ (ទន្សាយ)

ទន្សាយ ទទួលបានលាភសំណាងខ្ពស់ក្នុងសប្ដាហ៍នេះ។ បន្ទាប់ពីការខិតខំប្រឹងប្រែងយ៉ាងខ្លាំងតាំងពីដើមឆ្នាំមក គម្រោងដែលនៅទ្រឹងមួយរយៈមកហើយនឹងរីកចម្រើនឡើង។

ទន្សាយវ័យកណ្តាល គួរតែស្ដាប់ការណែនាំពីចៅហ្វាយនាយ លើដំណើរការគម្រោងដើម្បីឱ្យវាដើរដោយរលូន។ ដោយការចេះស្ដាប់មេកោយ និងការខំប្រឹងប្រែង អ្នកនឹងទទួលបានអត្ថប្រយោជន៍ពីក្រុមហ៊ុន ជាមួយនឹងការតំឡើងប្រាក់ខែ ក្នុងពេលឆាប់ៗនេះ។

ក្រៅពីនោះ គួរតែពិចារណាទិញអចលនទ្រព្យ ដើម្បីរក្សាស្ថិរភាពថវិកា ព្រោះវានឹងទទួលបានផលល្អនៅចុងឆ្នាំ។

ឆ្នាំម្សាញ់ (ពស់)

រាសីពស់ ​នឹង​ប្រសើរ​ឡើង​ខ្លាំង​ក្នុង​សប្ដាហ៍នេះ​។​ ​ការងារ​និង​ទ្រព្យសម្បត្តិដែលធ្លាប់ជួបឧបសគ្គ​នឹងប្រែជាល្អ អាចមានច្រកចេញដោយរលូន។

ប៉ុន្តែ ផ្នែកមនោសញ្ចេតនា ដោយសារពស់​​មាន​ភាព​មមាញឹក​ខ្លាំង​ក្នុង​រយៈពេល​ប៉ុន្មាន​ខែ​កន្លង​មក​នេះ ដៃគូ​​នឹង​មាន​អារម្មណ៍​មិនល្អចំពោះអ្នក ដែលវា​នឹង​ប៉ះពាល់​ដល់​ទំនាក់ទំនង​រវាង​អ្នក​ទាំង​ពីរ​។ ចូរពស់ចំណាយពេលឱ្យបានច្រើនជាមួយគ្រួសារ  ដៃគូ ប្តីឬប្រពន្ធ បន្ទាប់ពីការងារ ដើម្បីផ្សះផ្សារទំនាក់ទំនងឱ្យបានរឹងមាំ។

ឆ្នាំវក (ស្វា)

ម្នាលអ្នកកើតឆ្នាំវកទាំងឡាយ នឹងជួបសំណាងពេញប្រៀបក្នុងខែនេះ ដោយអ្វីៗនឹង​បន្ត​ទៅមុខយ៉ាង​រលូន​​។​​ បើ​និយាយ​ពី​ទំនាក់ទំនង​ស្នេហា អ្នក​នៅ​លីវនឹង​បានជួប​មនោសញ្ចេតនា​រីក​រាយ​។ អ្នកនឹងបង្កើតបានមិត្តភេទផ្ទុយ ហើយបន្ទាប់ពីបានជួបមនុស្សដែលពេញចិត្ត អ្នកទាំងពីរអាចចាប់ផ្តើមទំនាក់ទំនងដ៏ផ្អែមល្ហែមមួយបាន។ ទោះយ៉ាងណា ចូរបង្កើតទំនាក់ទំនងដោយស្មោះត្រង់ជាមួយគ្នា ទើបស្នេហានេះអាចឈានទៅមុខ ហើយគ្មានភាពស្ដាយក្រោយ។

ឆ្នាំច (ឆ្កែ)

ទ្រព្យសម្បត្តិសម្រាប់មនុស្សកើតឆ្នាំច មានភាពល្អប្រសើរឡើង ចំណែកប្រាក់ចំណូល នឹងហូរចូលលើសខែមុនៗ។ ចំពោះអ្នកដែលទើបចាប់ផ្តើមធ្វើការនៅក្នុងក្រុមហ៊ុនថ្មី ចូររៀន និងសុំបទពិសោធន៍បន្ថែមពីរៀមច្បង។ បើនិយាយពីសុខភាពវិញ អ្នកអាចមានភាពនឿយហត់បន្តិច ដូចនេះចូររៀបចំពេលវេលាសម្រាកឱ្យបានសមរម្យបន្ទាប់ពីធ្វើការ។

ឆ្នាំកុរ (ជ្រូក)

សប្ដាហ៍នេះ​ជ្រូកមាន​លាភ​ឡើង​ខ្ពស់ត្រដែត។ មិនថាមនុស្សធ្វើការក្នុងឧស្សាហកម្មណាក៏ដោយ ដរាបណាប្រឹងប្រែងបន្តិច និងយកចិត្តទុកដាក់បន្តិច ព្រមទាំងព្យាយាមរក្សាទំនាក់ទំនងល្អជាមួយមនុស្សជុំវិញខ្លួន លទ្ធផលត្រចះត្រចង់កំពុងរង់ចាំអ្នក ហើយមិនខ្វះអ្នកតាមផ្ដល់ជំនួយនោះទេ។

បើនិយាយពីទ្រព្យសម្បត្តិវិញ ជ្រូកធ្វើការនឹងទទួលបានអត្ថប្រយោជន៍កាន់តែច្រើនដោយសារ​មាន​អ្នក​ជួយ​ជ្រោមជ្រែង។ ពាក់ព័ន្ធនឹងការលក់ដូរ នឹងមានអតិថិជនកើនឡើង ធ្វើឱ្យទ្រព្យសម្បត្តិរីកចម្រើនយ៉ាងឆាប់រហ័ស៕

អត្ថបទ៖ សន្យា

ចុចអាន៖ ហុងស៊ុយដាំផ្កា និងដើមរុក្ខជាតិ បង្កើនសំណាង បណ្ដេញធាតុអាក្រក់ចេញពីផ្ទះ