នាយករដ្ឋមន្រ្តីវៀតណាមបញ្ជាឱ្យអាជ្ញាធរដោះស្រាយបញ្ហាផ្ទះឡើងថ្លៃ

នាយករដ្ឋមន្រ្តីវៀតណាម លោក ផាម មិញ ឈិញ បាន​​បញ្ជាឱ្យក្រសួង និងអាជ្ញាធរមូលដ្ឋានវៀតណាម ចាត់វិធានការឱ្យ​ខ្លាំង​ ដើម្បីបង្កើនការផ្គត់ផ្គង់លំនៅដ្ឋាន និងទប់ស្កាត់ការហក់ឡើងថ្លៃ ក្នុងបំណង​រក្សាស្ថិរភាពទីផ្សារអចលនទ្រព្យ។ នេះបើតាមការចុះផ្សាយរបស់កាសែត Viet Nam News។

បទបញ្ជាដែល​ចេញផ្សាយកាលពីថ្ងៃអង្គារនេះ កើតឡើង​ក្រោយ​តម្លៃលំនៅដ្ឋានក្នុងតំបន់មួយ​ចំនួន​នៅវៀតណាមហក់ឡើងខ្ពស់ ទោះបីជារដ្ឋាភិបាល​ប្រឹងប្រែងបង្កើនល្បឿន​អភិវឌ្ឍអចលនទ្រព្យក្ដី។ កំណើនតម្លៃនេះ រួមចំណែកដោយ​ការទិញផ្ទះទុកលក់ពេលឡើងថ្លៃ (Speculation) និងកង្វះការផ្គត់ផ្គង់។

នាយករដ្ឋមន្ត្រីបានជំរុញឱ្យក្រសួង និងអាជ្ញាធរ​មូលដ្ឋានកែលម្អក្របខ័ណ្ឌច្បាប់ សម្រួលនីតិវិធី និងដាក់ចេញនូវគោលនយោបាយ​សំខាន់ៗ​ ដើម្បីប្រមូលធនធានសម្រាប់ការអភិវឌ្ឍ​អចលនទ្រព្យប្រកបដោយតម្លាភាព និងស្ថិរភាព ដោយផ្តោតលើលំនៅដ្ឋានតម្លៃសមរម្យ រួមទាំងគម្រោងជួលសម្រាប់ប្រជាជនមានប្រាក់ចំណូលទាប​ជាដើម​។

លោក ផាម បានស្នើឱ្យក្រសួងហិរញ្ញវត្ថុធ្វើរបាយការណ៍ត្រឹមថ្ងៃទី ១៥ ខែតុលា ស្តីពីពន្ធលើអចលនទ្រព្យ និងការកែលម្អប្រព័ន្ធឌីជីថលសម្រាប់អចលនទ្រព្យ ការចុះបញ្ជីដីធ្លី និងការបង់ពន្ធ ដើម្បីបង្កើនតម្លាភាព។ ជាមួយ​គ្នានោះ ធនាគារកណ្ដាលវៀតណាម​ឯណោះវិញ ទទួលបញ្ជាឱ្យ​​កំណត់​ប្រាក់កម្ចីសម្រាប់ការ​ Speculation ឬការអភិវឌ្ឍលំនៅដ្ឋាន​ដែលមានតម្លៃលើសលុប​៕

​

​