ឥណ្ឌូណេស៊ីគ្រោងពង្រីកដីស្រែសម្រាប់ផលិតកម្មស្រូវ រាប់សែនហិចតា

រដ្ឋមន្ត្រីក្រសួងកសិកម្មឥណ្ឌូណេស៊ី លោក Andi Amran Sulaiman បាន​ឱ្យដឹងកាលពីថ្ងៃចន្ទ (២០ តុលា) ថា ​​ឥណ្ឌូណេស៊ី​គ្រោងនឹងពន្លឿនការ​បង្កើន​វាលស្រែរាប់សែនហិកតានៅក្នុងតំបន់ភាគខាងកើតរបស់​ប្រទេស​ ​ដែល​ជា​ផ្នែកមួយ​នៃកិច្ចខិតខំប្រឹងប្រែងរយៈពេលវែង ដើម្បីរក្សាស្ថិរភាពតម្លៃស្រូវអង្ករ និងពង្រឹងសន្តិសុខស្បៀងក្នុងស្រុក។ នេះបើតាមការចុះផ្សាយរបស់ភ្នាក់ងារសារព័ត៌មាន​រដ្ឋ Antara។

គំនិតផ្តួចផ្តើមនេះ ផ្តោតលើតំបន់​ ៣ ​រួមទាំង បាពួ ម៉ាលូគូ និងណូសាតេងហ្ការ៉ាខាងកើត ដែល​តំបន់ទាំងនេះមើលឃើញពីហក់ឡើងតម្លៃស្រូវអង្ករ ដោយសារតែផលិតកម្មមាន​កំណត់ ហើយថ្លៃដឹកជញ្ជូនខ្ពស់​។ ​

ជំហាននេះ នឹង​បំពេញបន្ថែមលើ​កម្មវិធីផ្គត់ផ្គង់ស្បៀង និងស្ថិរភាពតម្លៃ (SPHP) របស់រដ្ឋាភិបាលលោកប្រធានាធិបតី ប្រាបូវូ ស៊ូប៊ីយ៉ានតូ ដែលមានគោលបំណងរក្សាតម្លៃស្បៀងអាហារសំខាន់ៗ​ក្នុងស្រុក ខណៈកាត់បន្ថយការពឹងផ្អែកលើការនាំចូល។

លោក Sulaiman បានប្រាប់អ្នកយកព័ត៌មាន​នៅទីក្រុងហ្សាកាតាថា៖ «យើងនឹង​បង្កើត​វាលស្រែក្នុងតំបន់ដូចជា Papua ជាដំណោះស្រាយអចិន្ត្រៃយ៍ទៅមុខ»។

​កន្លងមក លោក ប្រាបូវូ បានណែនាំដល់រដ្ឋមន្ត្រីរបស់​លោក​ឱ្យសម្រេចបាននូវគោលដៅផ្គត់ផ្គង់ស្បៀងដោយខ្លួនឯកគ្រប់គ្រាន់នៅ​គ្រប់កោះទាំងអស់នៅទូទាំងប្រទេស។​ នៅទូទាំងប្រទេស រដ្ឋាភិបាលមានគោលបំណង​បង្កើន​ផ្ទៃដីដាំស្រូវថ្មីចំនួន ២២៥ ០០០ ហិកតា នៅឆ្នាំនេះ ​ហើយ​តួលេខនេះរំពឹង​នឹងកើនឡើងដល់ ៤០០ ០០០ ហិកតា នៅឆ្នាំ ២០២៦៕