​កម្ពុជា​កំពុង​ជំរុញ​ស្តង់ដាផលិតផល​ហាឡាល ដើម្បីទាក់ទាញភ្ញៀវទេសចរមូស្លីម

លោកស្រី ចម និម្មល រដ្ឋមន្ដ្រីក្រសួងពាណិជ្ជកម្ម ​នៅថ្ងៃទី ២២ ខែធ្នូ ​ឆ្នាំ ២០២៥ ​បាន​ដឹកនាំកិច្ច​ប្រជុំវិសាមញ្ញគណៈ​កម្មាធិការត្រួតពិនិត្យផលិតផលហាឡាលកម្ពុជា ​ដែល​មានការអញ្ជើញ​ចូលរួម​ពីលោក អូស្មាន ហាស្សាន់ ទេសរដ្ឋមន្ត្រីទទួលបន្ទុកបេសកកម្មពិសេស នៅចំពេលដែលរដ្ឋាភិបាលកម្ពុជាកំពុងជំរុញការទាក់ទាញភ្ញៀវទេសចរមូស្លីម។​

​ជាកិច្ចប្រជុំនេះ ដើម្បីពិនិត្យ ពិភាក្សា និងប្រមូលធាតុចូល​លើ​ឯកសារចាំបាច់ចំនួនពីររួមមាន​៖ សេចក្តីព្រាងប្រកាសស្តីពីការ​ដាក់ពាក្យស្នើ​សុំវិញ្ញាបន​បត្រ​បញ្ជាក់​ បច្ចេកទេសស្តង់​ដាផលិតផល​ហាឡាលកម្ពុជា ​និង​សេចក្តីព្រាងឯកសារ​ទស្សនទាន​ស្តី​ពីយុទ្ធនា​ការផ្សព្វផ្សាយ និងសម្របសម្រួលការចុះបញ្ជីវិញ្ញាបនបត្របញ្ជាក់​បច្ចេកទេសស្តង់ដារ​ផលិត​ផល​ហា​ឡាល។

​លោក ​សាន់ សារ៉ន រដ្ឋលេខាធិកាក្រសួងពាណិជ្ជកម្ម ​និងជាអនុប្រធានគណៈកម្មាធិការ​ត្រួតពិនិត្យ​ផលិតផលហាឡាលកម្ពុជា​ ប្រាប់កម្ពុជាថ្មីថា ផលិតផលហាឡាលក្នុងស្រុកមិនទាន់គ្រប់គ្រាន់​នៅ​ឡើយ​នោះទេ ​ប៉ុន្តែបើផលិតផលសម្រាប់តែ​ផ្គត់ផ្គង់​នៅតាមភោជនីយដ្ឋាន សណ្ឋា​គារគឺកម្ពុជាអាច​មានលទ្ធភាព​គ្រប់​គ្រាន់សម្រាប់ម្ហូបអាហារ។​

​លោកបញ្ជាក់ថា ​មានក្រុមហ៊ុនមកពីបណ្ដារប្រទេសអារ៉ាប់ តួគី ចិន ម៉ាឡេស៊ី ​ចូលមកវិនិយោគ​លើម្ហូបអាហារហាឡាលច្រើននៅកម្ពុជា ​ដែលអាចផ្គត់ផ្គង់ភ្ញៀវទេសចរមូស្លីមបាន។

​លោក ​សាន់ សារ៉ន យល់ឃើញថា៖ «យើងមានហាងលក្ខណៈហាឡាល​ដែលអាចទទួល​ភ្ញៀវ​មូស្លីមបាន ព្រោះហាង​មូយ​ចំនួនភាគច្រើនមកពីបរទេស គាត់មានបទពិសោធន៍ស្រាប់ ដែលមានស្ដង់​ដាអាចទទួលយកបាន»។

គិតមកដល់ពេលនេះ មានសហគ្រាស ក្រុមហ៊ុនវិនិយោគកែច្នៃម្ហូបអាហារហាឡាលប្រមាណ ៨០ ដែលមានមុខទំនិញប្រមាណ ៧០០ មុខ៕