ព័ត៌មានជាតិ

ក្រុមហ៊ុន ម៉ុង ឫទ្ធី កែច្នៃលាមកជ្រូកជាប្រភព អគ្គិសនីបម្រើក្នុងតំបន់អភិវឌ្ឍកសិឧស្សាហកម្ម

បានផុស

៣ ខែ មុន

នៅ

ថ្ងៃពុធ ២៥ កុម្ភៈ ២០២៦

ដោយ

ខណៈដែលជ្រូករាប់រយក្បាលត្រូវបានចិញ្ចឹម និងបង្កាត់ពូជនៅកសិដ្ឋានចិញ្ចឹមជ្រូកក្នុងតំបន់អភិវឌ្ឍន៍កសិឧស្សាហកម្មក្រុមហ៊ុន ម៉ុង ឫទ្ធី នៅស្រុកព្រៃនប់ ខេត្តព្រះសីហនុ លាមកជ្រូកក៏ត្រូវបានគ្រប់គ្រងនិងកែច្នៃផលិតជាប្រភពថាមពលអគ្គិសនីបម្រើការប្រើប្រាស់ក្នុងសហគមន៍ និងសេចក្តីត្រូវការក្នុងតំបន់អភិវឌ្ឍ។

អ្នកឧកញ៉ា ម៉ុង ឫទ្ធី អគ្គនាយកក្រុមហ៊ុន ម៉ុង ឫទ្ធី គ្រុបបានឲ្យដឹងថា ជ្រូកក្រៅពីចិញ្ចឹមយកសាច់ កសិដ្ឋានក៏បានកែច្នៃលាមកជ្រូកផលិតជាប្រភពថាមពលអគ្គិសនី និងជីធម្មជាតិថែមទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

«អាចម៍ជ្រូកត្រូវបានយកមកផលិតជាអគ្គិសនី ដើម្បីប្រើប្រាស់ក្នុងកសិដ្ឋាន ជាពិសេសសម្រាប់ឱ្យជ្រូកដេកក្នុងម៉ាស៊ីនត្រជាក់។ ក្រៅពីនេះសំណល់លាមកជ្រូកក៏អាចច្នៃទៅជាជីធម្មជាតិសម្រាប់ដាក់លើដើមឈើហូបផ្លែ ឬដើមឈើផ្សេងៗបានយ៉ាងល្អ»។ អ្នកឧកញ៉ា ម៉ុង ឫទ្ធី បញ្ជាក់។

អ្នកឧកញ៉ាបន្តថា ក្រុមហ៊ុនបានការពារបរិស្ថានទាំងក្រោមដី និងលើដី ដោយការកែច្នៃលាមកជ្រូកកុំឲ្យជះក្លិនស្អុយបង្កការរំខានដល់អ្នកជិតខាង ថែមអាចទាញជាប្រភពភ្លើងអគ្គិសនីប្រើប្រាស់បានផងដែរ។

អ្នកឧកញ៉ាអះអាងថា បើនិយាយពីប្រសិទ្ធភាពសេដ្ឋកិច្ច និងការប្រកួតប្រជែង ក្រុមហ៊ុនទទួលបានប្រាក់ចំណេញបន្ថែមពីអាចម៍ជ្រូកបាត់ទៅហើយ ខណៈដែលលោកមើលឃើញកសិករទូទៅចិញ្ចឹមជ្រូកសង្ឃឹមតែលើការលក់ជ្រូករស់តែមួយមុខ។ លើសពីនេះការចិញ្ចឹមតាមបែបក្រុមហ៊ុនប្រើរយៈពេលខ្លីជាងតែ ១៥០ ទៅ ១៥៥ ថ្ងៃ បើធៀបនឹងកសិករទូទៅដែលប្រើពេលពី ១៦០ ទៅ ១៧០ ថ្ងៃ។

ការចិញ្ចឹមជ្រូកដេកម៉ាស៊ីនត្រជាក់ប្រើពេលវេលាខ្លីជាង ធ្វើឱ្យថ្លៃដើមផលិតទាបជាង ដែលជាមូលហេតុធ្វើឱ្យក្រុមហ៊ុននៅតែអាចទទួលបានផលចំណេញ ទោះបីជាតម្លៃជ្រូកនៅលើទីផ្សារមានការប្រែប្រួលក៏ដោយ។ អ្នកឧកញ៉ា ម៉ុង ឫទ្ធី បន្ថែម៕