ក្រុមហ៊ុនរបស់ចិន SF Holding ​ចាប់អារម្មណ៍ ពង្រីកការវិនិយោគវិស័យ​ដឹក​ជញ្ជូន​ នៅកម្ពុជា​​

ក្រុមហ៊ុន SF Holding Co., Ltd. ជាក្រុមហ៊ុនផ្តល់សេវាដឹកជញ្ជូនឈានមុខគេនៅប្រទេសចិន ចាប់អារម្មណ៍ក្នុងការស្វែងរកឱកាសពង្រីក​ការវិនិយោគលើវិស័យ​ឡូជីស្ទីក​នៅកម្ពុជា។

សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា ​នៅថ្ងៃទី ១៧ ​កក្កដា ២០២៦ ​បានអនុញ្ញាតឱ្យលោក Mitchell Mao នាយកប្រតិបត្តិក្រុមហ៊ុន SF Holding Co., Ltd. ចូលជួប​ពិភាក្សាការងារ ក្នុងឱកាសការអញ្ជើញបំពេញទស្សនកិច្ចការងារ និងចូលរួមសន្និសីទបញ្ញា​សិប្បនិម្មិត​ពិភព​លោកឆ្នាំ២០២៦ នៅសាធារណរដ្ឋប្រជាមានិតចិនចាប់ពីថ្ងៃទី ១៥-១៧ ខែកក្កដា ឆ្នាំ២០២៦។

​ក្រុមហ៊ុន SF Holding Co., Ltd. ជាក្រុមហ៊ុនផ្តល់សេវាកម្មឡូជីស្ទីក​ឈានមុខគេមួយ​នៅក្នុង​ប្រទេស​ចិន ​ដែលមានអាជីវកម្មស្នូលផ្តោតលើសេវាដឹកជញ្ជូនរហ័ស និងទំនិញធុនធ្ងន់ (Express & Freight), ភស្តុភារកម្មខ្សែច្រវាក់ត្រជាក់ (Cold Chain Logistics), សេវាដឹកជញ្ជូនទាន់ចិត្តក្នុងទីក្រុង (Intra-City On-Demand Delivery), រួមទាំងខ្សែច្រវាក់ផ្គត់ផ្គង់, និងសេវាកម្មលក្ខណៈអន្តរជាតិ (Supply Chain & International)។

​លោក Mitchell Mao នាយកប្រតិបត្តិក្រុមហ៊ុន SF Holding Co., Ltd. មានប្រសាសន៍ថា​ បច្ចុប្បន្ន ក្រុមហ៊ុនកំពុងប្រតិបត្តិការនៅក្នុងតំបន់អាស៊ីប៉ាស៊ីហ្វិក​ និងមានបំណងពង្រីកការវិនិយោគ​បន្ថែម​មកកាន់តំបន់អាស៊ីអាគ្នេយ៍។

ផ្អែកលើការសិក្សាស្រាវជ្រាវអំពីសមត្ថភាពភស្តុភារកម្មនៅកម្ពុជា​ រួមផ្សំនឹងការកើនឡើង​ជាលំដាប់​នៃទំហំពាណិជ្ជកម្មទ្វេភាគី ​ចិន-កម្ពុជា, ក្រុមហ៊ុន SF Holding​ មានចំណាប់អារម្មណ៍យ៉ាងខ្លាំងក្នុងការ​ស្វែងរកឱកាសវិនិយោគលើវិស័យឡូជីស្ទីកនៅកម្ពុជា។​

​សម្តេចធិបតីនាយករដ្ឋមន្ត្រីបានវាយតម្លៃខ្ពស់ចំពោះភាពជោគជ័យរបស់ក្រុមហ៊ុន SF Holding និង​ស្វាគមន៍ចំពោះបំណងរបស់ក្រុមហ៊ុនក្នុងការស្វែងរកឱកាសវិនិយោគលើវិស័យឡូជីស្ទីកនៅកម្ពុជា។

​សម្តេចធិបតីបានគូសបញ្ជាក់អំពីការយកចិត្តទុកដាក់របស់រាជរដ្ឋាភិបាលក្នុងការកសាង និងពង្រឹង​ហេដ្ឋារចនា​សម្ព័ន្ធ ដោយផ្តោតលើការធ្វើឱ្យប្រសើរឡើងនូវការតភ្ជាប់ (Connectivity)​ នៃបណ្តាញដឹក​ជញ្ជូនទាំងផ្លូវគោក, ផ្លូវអាកាស និងផ្លូវសមុទ្រ ទៅកាន់ប្រទេសជិតខាង និងក្នុងតំបន់។

​សម្តេចធិបតីបានបន្តថា រាជរដ្ឋាភិបាលកំពុងស្ថាបនាផ្លូវល្បឿនលឿនបន្ថែម, ធ្វើទំនើបកម្ម​ប្រព័ន្ធផ្លូវដែក និងកសាងព្រែកជីក ដើម្បីលើកកម្ពស់ និងគាំទ្រដល់វិស័យដឹកជញ្ជូន និងឡូជីស្ទិក នៅកម្ពុជាឱ្យកាន់តែមានប្រសិទ្ធភាព។

​​សម្តេចធិបតីបានលើកទឹកចិត្តឱ្យក្រុមហ៊ុន SF Holding បន្តទំនាក់ទំនង និងពិភាក្សាលម្អិត​ជាមួយ​ក្រសួង​ស្ថាប័ន​ពាក់ព័ន្ធ ដើម្បីសិក្សាស្វែងយល់បន្ថែម និងឈានទៅចាប់យកឱកាស​វិនិយោគ​ជាក់ស្តែងនៅកម្ពុជា៕