រុស្ស៊ីប្រកាសដកទ័ពភ្លាម តម្លៃប្រេងធ្លាក់ចុះភ្លែត

ប្រេងឆៅម៉ាក Brent បានធ្លាក់ចុះដល់ទៅ ៣,៣% ខណៈដែលតម្លៃនៅទីក្រុងញូវយ៉កក៏បានធ្លាក់ចុះផងដែរ។ តម្លៃប្រេងឆៅបានហក់ឡើងយ៉ាងគំហុកក្នុងសប្តាហ៍នេះ ចំពេលមានរបាយការណ៍ជាច្រើនអំពីភាពតានតឹងរវាងរុស្ស៊ីនិងអ៊ុយក្រែន។

បន្ទាប់ពីសហរដ្ឋអាមេរិកបានព្រមានថា ការវាយលុកអាចនឹងកើតឡើងនោះ, រដ្ឋមន្ត្រីការបរទេសរុស្ស៊ីលោក Sergei Lavrov បាននិយាយកាលពីថ្ងៃអង្គារទី១៥ខែកុម្ភៈថា កិច្ចខិតខំប្រឹងប្រែងការទូតនឹងទទួលបានជោគជ័យក្នុងការបន្ធូរបន្ថយស្ថានការណ៍។

យ៉ាងណាក៏ដោយ អគ្គលេខាធិការអង្គការសន្ធិសញ្ញាអាត្លង់ទិកខាងជើង (ណាតូ) លោក Jens Stoltenberg បាននិយាយថា ខ្លួនមិនទាន់ឃើញមានសញ្ញាណាមួយនៃការថយចុះវត្តមានយោធារុស្ស៊ីនៅតាមព្រំដែនជាមួយអ៊ុយក្រែននោះទេ។

ទីផ្សារពិភពលោកកំពុងតាមដានយ៉ាងដិតដល់ចំពោះស្ថានការណ៍នេះ ដោយអ្វីៗគ្រប់យ៉ាងចាប់ពីឧស្ម័នធម្មជាតិ និងលោហធាតុ រហូតដល់ភាគហ៊ុនសកល កំពុងមានប្រតិកម្មទៅនឹងការអត្ថាធិប្បាយរបស់រុស្ស៊ីអំពីការដកទ័ពវិញកាលពីថ្ងៃអង្គារ។

លោក Warren Patterson ប្រធានយុទ្ធសាស្រ្តទំនិញនៅក្រុមហ៊ុន ING Groep NV បាននិយាយថា “រឿងតែមួយគត់ដែលទីផ្សារពិតជាផ្តោតសំខាន់នៅពេលនេះ គឺរុស្ស៊ី-អ៊ុយក្រែន។ ដូច្នេះការវិវត្តស្ថានការណ៍នៅសមរភូមិជួរមុខ នឹងមានសារៈសំខាន់សម្រាប់ទិសដៅតម្លៃ”។

ប្រេងឆៅម៉ាក Brent បានធ្លាក់ចុះ ៣.២០ដុល្លារ ឬ៣,៣% មកនៅ ៩៣.២៨ដុល្លារក្នុងមួយបារ៉ែល។ ប្រេងឆៅរបស់អាមេរិកម៉ាក West Texas Intermediate (WTI) បានធ្លាក់ចុះ៣.៣៩ដុល្លារ ឬ៣,៦% មកនៅត្រឹម៩២.០៧ដុល្លារក្នុងមួយបារ៉ែល។

កាល​ពី​ថ្ងៃ​ចន្ទ សន្ទស្សន៍​តម្លៃ​ប្រេង​ទាំងពីរ​បាន​ឡើង​ដល់​កម្រិត​ខ្ពស់​បំផុត​ចាប់​តាំង​ពី​ខែ​កញ្ញា ឆ្នាំ២០១៤ ដោយប្រេងម៉ាក​ Brent ឡើង​ដល់៩៦.៧៨ដុល្លារ និង WTI ឡើង​ដល់៩៥.៨២ដុល្លារ។ តម្លៃរបស់ Brent បានកើនឡើង៥០% ក្នុងឆ្នាំ២០២១ ខណៈ WTI កើនឡើងប្រហែល ៦០% ដោយសារតែការស្ទុះងើបឡើងវិញនៃតម្រូវការជាសកលពីជំងឺរាតត្បាតរាតត្បាតកូវីដ១៩៕

ប្រែសម្រួល៖ Vann Vann

ប្រភព៖ Bangkok Post, Reuters

ចុចអាន៖ មិនមានសញ្ញាថមថយភាពតានតឹងឡើយ ទោះរុស្ស៊ី ប្រកាសដកទ័ពខ្លះ