វិស័យឯកជន ថៃ ចង់ឲ្យរដ្ឋាភិបាលជាប់ឆ្នោតថ្មី ពន្យារការដំឡើងប្រាក់ឈ្នួល​ដល់កម្មករ

វិស័យឯកជនថៃរួមទាំងសាជីវកម្មធំៗ សហគ្រាសធុនតូច និងមធ្យម កំពុងជំរុញឲ្យរដ្ឋាភិបាលចម្រុះ ពន្យាពេលពាក្យសន្យាសម្រាប់យុទ្ធការរបស់ខ្លួន ក្នុងការបង្កើនប្រាក់ឈ្នួលប្រចាំថ្ងៃអប្បបរមាដល់កម្មករ ៤៥០ បាត (​១៣ ដុល្លារ) ។

វិស័យទាំងនោះអះអាងថា បច្ចុប្បន្នថ្លៃពលកម្មកម្មករមានប្រហែល ២៥ ភាគរយនៃការចំណាយសរុបសម្រាប់និយោជក ជាពិសេសសហគ្រាសធុនតូច និងមធ្យម ហើយការកើនឡើងប្រាក់ឈ្នួលនេះ នឹងធ្វើឲ្យអាជីវកម្មមានបន្ទុកបន្ថែមទៀត ។

លើសពីនេះទៀត អាជីវកម្មទើបតែងើបឡើងវិញពីវិបត្តិកូវីដ ១៩ ក៏កំពុងអំពាវនាវឲ្យមានវិធានការទប់ស្កាត់ការកើនឡើងថ្លៃអគ្គិសនីផងដែរ ដែលកំពុងរួមចំណែកបន្ថែម ៥ ភាគរយដល់ការចំណាយសរុបរបស់ពួកគេ ។

ទន្ទឹមនឹងវិស័យឯកជន សភាពាណិជ្ជកម្មថៃ (TCC) ក៏កំពុងផ្តល់ដំបូន្មានដល់រដ្ឋាភិបាលជាប់ឆ្នោតថ្មី ឲ្យពិនិត្យមើលឡើងវិញដោយប្រុងប្រយ័ត្ននូវផែនការដំឡើងប្រាក់ឈ្នួលអប្បបរមាប្រចាំថ្ងៃដល់ ៤៥០ បាតស្មើនឹង ១៣ ដុល្លារអាមេរិកនេះផងដែរ ។

តាមរយៈនេះ លោក Tawatchai Setjinda ប្រធានគណៈកម្មាធិការអភិវឌ្ឍន៍សេដ្ឋកិច្ចសភាពាណិជ្ជកម្មថៃបានសម្តែងការព្រួយបារម្ភថា ការដំឡើងនេះ នឹងផ្តល់អត្ថប្រយោជន៍ជាចម្បងដល់ពលករចំណាកស្រុក ដោយសារជនជាតិថៃភាគច្រើន ត្រូវបានជួលជាកម្មករជំនាញ ។

គួរបញ្ជាក់ថា គណបក្សចលនាឆ្ពោះទៅមុខ (MFP) ដែលបានឈ្នះការបោះឆ្នោតសកលកាលពីថ្ងៃទី១៤ ខែឧសភាកន្លងទៅបានសន្យា នឹងដំឡើងប្រាក់ឈ្នួលអប្បបរមាប្រចាំថ្ងៃដល់ ៤៥០ បាត (១៣ ដុល្លារ) នៅទូទាំងប្រទេសក្នុងរយៈពេល ១០០ ថ្ងៃដំបូងនៃការចូលកាន់តំណែង ។ បច្ចុប្បន្នប្រាក់ឈ្នួលអប្បបរមាប្រែប្រួលទៅតាមខេត្តនានា ពោលចាប់ពី ៣២៨ បាតដល់ ៣៥៤ បាត (៩.៤៩ ដុល្លារដល់ ១០.២៤ ដុល្លារ) បន្ទាប់ពីការដំឡើងប្រាក់ឈ្នួលចុងក្រោយបំផុតនៅខែតុលាឆ្នាំមុន ៕

ប្រែសម្រួល៖ នាង រតនៈ

ប្រភព៖ Nation Thailand

ចុចអាន៖ លោក ប្រាយុទ្ធ ស្នើសមាជិកសភាបក្សរបស់ខ្លួន សិក្សាលទ្ធផលបោះឆ្នោត សកលឲ្យអស់ពីសមត្ថភាព