លោក ប្រាយុទ្ធ ស្នើសមាជិកសភាបក្សរបស់ខ្លួន សិក្សាលទ្ធផលបោះឆ្នោត​សកលឲ្យអស់ពីសមត្ថភាព

នាយករដ្ឋមន្ត្រីចាំផ្ទះរបស់ថៃលោក ប្រាយុទ្ធ ចាន់អូចា កាលពីថ្ងៃអង្គារបានស្នើឲ្យសមាជិកសភាជាប់ឆ្នោតមកពីគណបក្សថៃរួបរួមជាតិ (UTN) ​សិក្សា​ពី​លទ្ធផល​បោះឆ្នោត​សកលកាលពីថ្ងៃទី១៤ ខែឧសភាកន្លងទៅ ដើម្បី​ត្រៀម​ខ្លួន​សម្រាប់​ការ​បោះឆ្នោត​នៅ​ពេល​ខាង​មុខទៀត ។

ក្នុងអំឡុងពេលកិច្ចប្រជុំនៅឯទីស្នាក់ការកណ្ដាលរបស់បក្សថៃរួបរួមជាតិ ក្នុងសង្កាត់ Phaya Thai នៃទីក្រុងបាងកក, លោក ប្រាយុទ្ធ បាននិយាយថា លោកសូមអបអរសាទរដល់សមាជិកសភាជាប់ឆ្នោតរបស់បក្សទាំងអស់ ហើយលោកក៏បានស្នើឲ្យពួកគេបន្តសកម្មភាពរបស់គណបក្សផងដែរ ។

លោក ប្រាយុទ្ធ បាននិយាយថា សូមសមាជិកសភាជាប់ឆ្នោតមកពីគណបក្សថៃរួបរួមជាតិ បំពេញភារកិច្ចរបស់ពួកគេឲ្យអស់ពីសមត្ថភាព បើទោះបីជារងបរាជ័យក្នុងការបោះឆ្នោតសកលថ្ងៃទី១៤ ខែឧសភាកន្លងទៅក៏ដោយ ខណៈលោកក៏មិនបាននិយាយអំពីការបង្កើតរដ្ឋាភិបាលចម្រុះរបស់គណបក្សចលនាឆ្ពោះទៅមុខដែលឈ្នះឆ្នោតផងដែរ ។

នាយករដ្ឋមន្ត្រីចាំផ្ទះរូបនេះគឺគ្រាន់តែបញ្ជាក់ថា បច្ចុប្បន្ន​ការបង្កើតរដ្ឋាភិបាលចម្រុះ​កំពុង​ស្ថិត​ក្នុង​ដំណើរការមួយ ហើយ​យើង​ត្រូវ​តែ​គោរព​តាម​នោះ ហើយលោក​គ្រាន់តែ​ចង់​ឃើញ​ប្រទេស​ថៃ​មាន​សន្តិភាព និង​សណ្តាប់ធ្នាប់ប៉ុណ្ណោះ ព្រោះថា ប្រជាជនបានភ្លេចរដ្ឋប្រហារយោធាកាលពី ៩ ឆ្នាំមុនរួចទៅហើយ ។

គួរបញ្ជាក់ថា គណបក្សថៃរួបរួមជាតិ (UTN) របស់លោក ប្រាយុទ្ធ មិនទទួលបានអាសនៈសភាច្រើនដូចការរំពឹងទុកនោះទេ ពោលគណបក្សមួយនេះបានត្រឹមតែ ៣៦ អាសនៈប៉ុណ្ណោះក្នុងចំណោមអាសនៈសភាចំនួន ៥០០ ខណៈបក្សចលនាឆ្ពោះទៅមុខ (MFP) របស់អនាគតនាយករដ្ឋមន្ត្រីថ្មីគឺលោក ភីថា លីមចារើនរ៉ាត់ ទទួលបានរហូតដល់ ១៥២ អាសនៈ តាមពីក្រោយដោយគណបក្សភឿថៃរបស់កូនស្រីលោក ថាក់ស៊ីន ដែលទទួលបានចំនួន ១៤១ អាសនៈ ៕

ប្រែសម្រួលដោយ ៖ ជីវ័ន្ត

ប្រភព ៖ The Nation Thailand

ចុចអាន ៖ មិនទាន់ជានាយករដ្ឋមន្ត្រីផង លោក Pita មានរឿងក្ដីក្ដាំជាច្រើនទៅហើយ