​ក្រុមហ៊ុនអាកាសចរណ៍​ឡាវ ចាប់ផ្ដើម​ហោះហើរត្រង់​ មកកម្ពុជា​ថ្ងៃនេះ​ ដឹកអ្នកដំណើរ ១១៦ នាក់

លោក ស៊ិន ចាន់សិរីវត្ថា អ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិលកម្ពុជា​បានឱ្យដឹងថា ក្រុម​ហ៊ុន​អាកាស​ចរណ៍​​ឡាវ ចាប់ផ្ដើមហោះហើរត្រង់មកកម្ពុជាចាប់ពីថ្ងៃទី ១៩ ខែមីនា ​ឆ្នាំ ២០២៤ តទៅ ដើម្បីឆ្លើយតបទៅនឹងតម្រូវការរបស់អ្នកដំណើរ​។

​មន្ត្រីក្រសួងទេសចរណ៍​ សហការជាមួយ​ព្រលានយន្តហោះ ​នៅព្រឹកថ្ងៃទី ​១៩ ខែមីនានេះ បានរៀប​ចំទទួលស្វាគមន៍ភ្ញៀវទេសចរមកពីប្រទេសឡាវជើងហោះហើរដំបូង​សរុប ១១៦ នាក់ ដោយមានការផ្ដល់ជូនក្រមា និងផ្កា។

​លោក ស៊ិន ចាន់សិរីវត្ថា បានឱ្យដឹងថា ការតភ្ជាប់ឡើងវិញរបស់ក្រុមហ៊ុនអាកាសចរណ៍ឡាវមកកម្ពុជា​ ជាសញ្ញាវិជ្ជមានសម្រាប់អ្នកដំណើរទេសចរ និងប្រជាជន និងអ្នកវិនិយោគ។ ហើយថា ការតភ្ជាប់​ជើងហោះហើរនេះ កាន់តែផ្ដល់ភាពងាយស្រួលសម្រាប់អ្នកដំណើរ និងទាក់ទាញ់ទេសចរបន្ថែមទៀត។​

​សូមរម្លឹកថា ក្រុមហ៊ុនអាកាសចរណ៍ឡាវ ធ្លាប់ហោះហើរត្រង់លើកំណាត់ផ្លូវវៀងចន្ទន៍-ភ្នំពេញ-វៀង​ចន្ទន៍ តាំងពីអំឡុងទសវត្សរ៍៨០ រហូតដល់ពាក់កណ្តាលទសវត្សរ៍២០០០ តែដោយសារកត្តា​ទីផ្សារ​បានធ្វើ​ឱ្យការហោះហើរលើកំណាត់ផ្លូវនេះ ត្រូវបានផ្អាកមួយរយៈ។

ឆ្នាំ ២០២៣ ភ្ញៀវទេសចរបរទេសមកពីប្រទេសឡាវ សរុបជាង ៣៧ ម៉ឺននាក់ ធ្វើដំណើរមកទស្សនៈ​កិច្ចកម្សាន្តនៅ​ក្នុងប្រទេស​កម្ពុជា ចំនួននេះគឺមានការកើនឡើងរហូត​ដល់ទៅ​៣០២%។

យោងតាមរបាយការណ៍ក្រសួងទេសចរណ៍ កម្ពុជា​ ស្វាគមន៍​ភ្ញៀវ​បរទេស​ជាង ៥,៤​លាន​នាក់​ក្នុង​ឆ្នាំ​២០២៣ កើនឡើង​ជិត ១៤០​ភាគរយ​បើ​ធៀប​នឹង​ឆ្នាំ​២០២២ ដែល​ក្នុងនោះ​ភ្ញៀវ​មកពី​ប្រទេស​ចំនួន ៤​នៅ​តំបន់​អាស៊ី​មាន​ចំនួន​ជិត ៧០ ភាគរយ​នៃ​ភ្ញៀវ​បរទេស​សរុប​៕

អត្ថបទ៖ ឡេង ដេត