រដ្ឋាភិបាលថៃថា ​ប្រជាជនខ្លួនបានចំណាយច្រើនបំផុតលើការធ្វើដំណើរ ប្រេងសាំង និងទូរស័ព្ទ

ការចំណាយរបស់ប្រជាពលរដ្ឋថៃលើទំនិញប្រើប្រាស់ក្នុងខែមេសាជាមធ្យមគឺ ១៨​ ១៨៧ បាត ដោយការចំណាយច្រើនបំផុតគឺលើការដឹកជញ្ជូនសាធារណៈ ប្រេងសាំង និងទូរស័ព្ទ នេះបើយោងតាមការស្ទង់មតិរបស់ក្រសួងពាណិជ្ជកម្ម។

សារព័ត៌មានបាងកកប៉ុស្តិ័ដកស្រង់សម្តីលោក Poonpong Naiyanapaporn ប្រធានការិយាល័យគោលនយោបាយ និងយុទ្ធសាស្ត្រពាណិជ្ជកម្មនៃក្រសួងកាលពីថ្ងៃទី៦ ខែឧសភាថា ប្រភេទផលិតផលមិនមែនម្ហូបអាហារ និងគ្រឿងស្រវឹងមានចំនួន ៥៨,៥០% នៃការចំណាយសរុប ខណៈដែលប្រភេទអាហារ និងផលិតផលគ្មានជាតិអាល់កុលមាន ៤១,៥០% ។

ការចំណាយលើការដឹកជញ្ជូនសាធារណៈ ប្រេងសាំង និងទូរសព្ទដៃសរុបមានចំនួន៤ ២៦៧ បាត គឺជាការចំណាយដ៏ធំបំផុតនៅក្នុងប្រភេទទីមួយ។ ការចំណាយលើម្ហូបអាហារសម្រាប់ចម្អិនអាហារនៅផ្ទះមានចំនួន១ ៦៥១ ​ បាតដែលជាចំនួនច្រើនបំផុតនៅក្នុងប្រភេទទីពីរ។

លោក Poonpong បាននិយាយថាសន្ទស្សន៍ទំនុកចិត្តអ្នកប្រើប្រាស់បានធ្លាក់ចុះដល់៥១,៩ ក្នុងខែមេសា ធ្លាក់ចុះពី៥៤,១ ​ក្នុងខែមីនា ប៉ុន្តែបានបន្តលើសពី៥០ សម្រាប់រយៈពេល ១៧ខែជាប់គ្នា។ ការធ្លាក់ចុះនេះគឺដោយសារតែសេដ្ឋកិច្ចថៃមិនទាន់ឈានដល់ការងើបឡើងវិញពេញលេញនៅឡើយ បើទោះបីជាមានការជំរុញពីការប្រារព្ធពិធីបុណ្យសង្រ្គាន្ត​ចំពេលមានការព្រួយបារម្ភអំពីតម្លៃនៃការរស់នៅ និងការចំណាយខ្ពស់​។

លោក Wattanasak Sur-iam អគ្គនាយកនៃនាយកដ្ឋានពាណិជ្ជកម្មផ្ទៃក្នុង (DIT) បាននិយាយថា ក្រុមមន្ត្រីកំពុងតាមដានយ៉ាងដិតដល់នូវតម្លៃទំនិញដែលរងផលប៉ះពាល់ដោយអាកាសធាតុក្តៅខ្លាំង ដូចជាបន្លែ និងផ្លែឈើស្រស់។

លោក Wattanasak បាននិយាយថា៖«អាជីវករ និងអ្នកលក់អាហារតាមចិញ្ចើមផ្លូវទាំងអស់ត្រូវតែបង្ហាញយ៉ាងច្បាស់ពីតម្លៃនៃមុខម្ហូបនីមួយៗ។ DIT នឹងបើកការចុះត្រួតពិនិត្យ​ដើម្បីមើលថាតើអាជីវករឡើងថ្លៃ​ឬយ៉ាងណា។ ​អ្នកប្រព្រឹត្តខុសអាចប្រឈមនឹងការផាកពិន័យរហូតដល់ ១៤០ ០០០ បាត ឬជាប់គុករហូតដល់ប្រាំពីរឆ្នាំ»៕