រដ្ឋពង្រីកការដាក់ឱ្យប្រើប្រាស់គម្រោងប្រព័ន្ធព័ត៌មានវិទ្យាគ្រប់គ្រងវិស័យហិរញ្ញវត្ថុសាធារណៈបន្ថែម​

លោក អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុនៅថ្ងៃទី ០៨ ខែឧសភា ឆ្នាំ ២០២៤ បានអញ្ជើញចូលរួមក្នុងពិធី ប្រកាសដាក់ឱ្យអនុវត្តគម្រោងប្រព័ន្ធព័ត៌​មានវិទ្យាគ្រប់គ្រងវិស័យហិរញ្ញវត្ថុសាធារណៈ (FMIS) ទៅកាន់ការដ្ឋានបន្ថែមថ្មី និងប្រើប្រាស់​សមិទ្ធផលថ្មីៗ ជាផ្លូវការ។

គិតមកដល់ពេលនេះ FMIS ត្រូវបានដាក់ឱ្យប្រើប្រាស់ នៅគ្រប់ទីតាំងអនុវត្តថវិកាសំខាន់ៗ ទាំងនៅ​ថ្នាក់ជាតិ និងថ្នាក់ក្រោមជាតិ រួមមាន អគ្គនាយកដ្ឋានជំនាញទាំងអស់ នៃក្រសួងសេដ្ឋកិច្ច អង្គភាពទទួលបន្ទុកហិរញ្ញវត្ថុ និងអង្គភាពថវិកាអាណាប័កផ្ទេរសិទ្ធិពេញលេញ នៅគ្រប់ក្រសួង-ស្ថាប័ន, មន្ទីរសេដ្ឋកិច្ច និងហិរញ្ញវត្ថុរាជធានី-ខេត្តទាំង ២៥, រតនាគារដ្ឋបាលរាជធានី-ខេត្តទាំង ២៥ និងរដ្ឋបាលក្រុង-ស្រុក-ខណ្ឌចំនួន ៤៤ ដែលសរុប មានចំនួន ២១៣ ការដ្ឋាន។

ការដាក់ឱ្យប្រើប្រាស់ FMIS Portal ជំនាន់ទី ១ នៅគ្រប់រដ្ឋបាលក្រុង-ស្រុក និងឃុំ-សង្កាត់ នៅទូទាំងប្រទេសកម្ពុជា សរុបចំនួន ១,៨៧០ ការដ្ឋាន។

លោក អូន ព័ន្ធមុនីរ័ត្ន មានប្រសាសន៍ថា ការអនុវត្តផែនការយុទ្ធសាស្ត្រ តម្រង់​ទិស​នីតិវិធីអនុវត្តការងារតាម FMIS បាន និងកំពុងបង្ហាញឱ្យឃើញពីប្រសិទ្ធភាព​ក្នុងការកសាងនូវមូលដ្ឋានគ្រឹះដ៏រឹងមាំ សម្រាប់ការចាត់ចែង និងការបែងចែកធនធាន​ហិរញ្ញវត្ថុ​ជាតិ ឱ្យកាន់តែមានតម្លាភាព និងប្រសិទ្ធភាព ចូលរួមចំណែក​ជួយគាំទ្រ​ដល់​ការឈាន​ទៅសម្រេចបាន តាមចក្ខុវិស័យនៃការប្រែក្លាយប្រទេសកម្ពុជាទៅជាប្រទេស​មាន​ចំណូលខ្ពស់នៅឆ្នាំ ២០៥០៕

អត្ថបទ៖ ឡេង ដេត