ម៉ាឡេស៊ី ខាត​លុយ ៥៨​ពាន់​លាន​ដុល្លារ ដោយសារ​អំពើ​ពុករលួយ​ក្នុង​រយៈពេល​៥​ឆ្នាំ

រដ្ឋាភិបាល​ម៉ាឡេស៊ី បាន​​បាត់បង់​​នូវ​ថវិកា​ជាតិ​ប្រមាណ ៥៨​ពាន់​លាន​ដុល្លារ ដែល​នេះ​​​បង្ក​ឡើង​ដោយ​អំពើ​ពុករលួយ គិត​​ត្រឹម​រយៈពេល​៥​ឆ្នាំ​ចុង​ក្រោយ។ នេះ​​​បើ​យោង​​តាម​សេចក្ដី​ប្រកាស​របស់​លោក Azam Baki ប្រធាន​គណៈកម្មាធិការ​​ប្រឆាំង​នឹង​​អំពើ​ពុករលួយ​ម៉ាឡេស៊ី (MACC) កាល​ពី​ថ្ងៃ​ទី​៨ ខែ​​ឧសភា។

លោក Azam Baki បាន​បញ្ជាក់​ថា តួ​លេខ​នៃ​ការ​ខាត​បង់​នេះ ធ្វើ​ឡើង​ដោយ​ផ្អែក​លើ​ការ​ប៉ាន់ស្មាន​​អង្កេត​​លើ​​​ផលិតផល​ក្នុង​ស្រុក​សរុប (GDP) រាប់​​​ចាប់​ពី​ឆ្នាំ​២០១៨ មក​ដល់​ឆ្នាំ​២០២៣។ ប្រធាន​ MACC រូប​នេះ បាន​​បន្ថែម​ដោយ​សេចក្ដី​ខក​ចិត្ត​ថា បើ​​គ្មាន​អំពើ​ពុករលួយ នោះ​ទឹក​ប្រាក់​ដែល​ខាត​បង់​នេះ អាច​យក​ទៅ​ប្រើ​​នៅ​ក្នុង​វិស័យ​អភិវឌ្ឍន៍​ជាតិ​ជា​ច្រើន​ដូចជា គម្រោង​​កសាង​មន្ទីរពេទ្យ និង​សាលា​រៀន ជា​ដើម។ លោក បន្ត​ថា ៥៨​ពាន់​​លាន​ដុល្លារ​ដែល​បាត់ គឺ​ស្មើ​នឹង GDP នៃ​រដ្ឋ​ចំនួន ២ របស់​ម៉ាឡេស៊ី​រួម​បញ្ចូល​គ្នា ដោយ​​មាន​ដូចជា រដ្ឋ Johor និង​រដ្ឋ Penang។

លោក Azam Baki ក៏​បាន​​ប្រកាស​ដែរ​ថា ការ​ដោះស្រាយ​បញ្ហា​ពុករលួយ​នា​ពេល​បច្ចុប្បន្ន មាន​សភាព​ស្មុគស្មាញ​​​ខ្លាំង ​ខុស​ពី​ចំណាត់ការ​ប្រឆាំង​អំពើ​ពុក​រលួយ​កាល​ពី​ប៉ុន្មាន​ទសវត្ស​មុន ហើយ​ទំហំ​នៃ​ការ​ខាតបង់​របស់​រដ្ឋ​ក៏​កាន់​តែ​ច្រើន​ឡើងៗ​​ថែម​ទៀត។

សូម​បញ្ជាក់​ថា យោង​តាម​ទិន្នន័យ​បង្ហាញ​ដោយ​អង្គការ Data Commons បាន​ឲ្យ​ដឹ​ង​ថា GDP របស់​ម៉ាឡេស៊ី កាល​ពី​ឆ្នាំ​២០២២ មាន​ចំនួន ៤០៧ពាន់​លាន​ដុល្លារ ហើយ​សម្រាប់​ឆ្នាំ​​២០២៤​នេះ អាច​កើន​ឡើង​ដល់ ៤៤៥​ពាន់​លាន​ដុល្លារ៕

ដោយ៖ ឈាង