មេផ្សារហ៊ុន៖ ក្រុមហ៊ុនក្នុងស្រុកមួយចំនួនកំពុងរៀបចំខ្លួនកៀរគរមូលនិធិពីទីផ្សារមួយនេះដើម្បីពង្រីកអាជីវកម្ម

អគ្គនាយកនៃផ្សារមូលបត្រកម្ពុជា (CSX) បានលើកឡើងថា ​ក្រុមហ៊ុនឯកជនមួយចំនួន​កំពុងតែរៀបចំខ្លួនក្នុងការបោះផ្សាយទាំងមូលបត្រកម្មសិទ្ធិ និងសញ្ញាបណ្ណនៅក្នុងឆ្នាំនេះ ទោះបីជាទីផ្សារភាគហ៊ុនកំពុងប្រឈមនឹងការធ្លាក់ចុះនៃ សេដ្ឋកិច្ចសកលក្តី។

លោក ហុង សុហួរ អគ្គនាយនៃ CSX បានថ្លែងប្រាប់កម្ពុជាថ្មីថា​ ទោះបីជានាពេលបច្ចុប្បន្ន​ស្ថានភាពទីផ្សារភាគហ៊ុនហាក់មានការថមថយសន្ទុះដោយសារតែការធ្លាក់ចុះនៃសេដ្ឋកិច្ចសកល ក៏ការវិវឌ្ឍទៅនៃទីផ្សារ​នៅតែបន្តទៅមុខដោយសន្សឹមៗជាមួយនឹងការដាក់ពាក្យ​ស្នើសុំចុះបញ្ជីជាបន្តបន្ទាប់​។

លោកបាន​ថ្លែងបញ្ជាក់ថា៖« ​ សម្រាប់ក្រុមហ៊ុនដែលអាចចុះបញ្ជីនៅផ្សារហ៊ុនយើងក្នុងឆ្នាំនេះអាចមាន២ឬ៣នឹងបោះផ្សាយមូលបត្រកម្មសិទ្ធិ និងមានក្រុមហ៊ុនបោះផ្សាយសញ្ញាបណ្ណ៣ឬ៤។​ ប៉ុន្តែអ្វីៗគ្រប់យ៉ាងគឺអាស្រ័យទៅលើវឌ្ឍនភាពការងារផ្ទាល់របស់ក្រុមហ៊ុនទាំងអស់នោះ ប៉ុន្តែយ៉ាងហោចណាស់អាចនឹងមានក្រុមហ៊ុន២នឹងបោះផ្សាយមូលបត្រកម្មសិទ្ធិ»។

លោកថា សម្រាប់​ការជួញដូរបើធៀបនឹងឆ្នាំមានការធ្លាក់ចុះបន្តិច ដែលបច្ចុប្បន្នទំហំនៃការជួយដូរគឺក្រោម២០ម៉ឺនដុល្លារក្នុង១ថ្ងៃ។ សម្រាប់ការបើកគណនីជួយញដូរនៅតែបន្តមានភាពល្អប្រសើរដែលជាមធ្យមគឺមានជាង១ពាន់វិនិយោគិនថ្មីបានបើកគណនីជារៀងរាល់ថ្ងៃ។​

«សម្រាប់ក្រុមហ៊ុនវិញ យើងសង្កេតឃើញថា វិស័យសេវាកម្មដែលពួកគាត់បានរងផលប៉ះពាល់តិចជាងគេពីស្ថានភាពសេដ្ឋកិច្ចសកល»។ នេះបើយោងតាមលោកសុហួរ។

លោកបានបញ្ជាក់ថែមទៀតថាជាមួយគ្នានេះដែរ លោកក៏សង្កេតឃើញមានការចាប់អារម្មណ៍ច្រើនទៅលើការបោះផ្សាយសញ្ញាបណ្ណ ជាពិសេសពីវិនិយោគិន​ជាស្ថាប័នដូចជាធនារ៉ាបរង ស្ថាប័នហិរញ្ញវត្ថុជាដើម។​

យោងតាមរបាយការណ៍របស់និយ័តករមូលបត្រកម្ពុជាចាប់ពី​ឆ្នាំ ២០១១ គិតដល់ពេលបច្ចុប្បន្ន ទីផ្សារនេះមានក្រុមហ៊ុនចំនួន ២២ បាន​បោះផ្សាយលក់មូលបត្រក្នុង​ផ្សារមូលបត្រកម្ពុជា ដែលប្រមូលសាច់ប្រាក់ប្រមាណ ៤០០ លានដុល្លារ។ ក្នុងចំណោមក្រុមហ៊ុនទាំង ២២ មានក្រុមហ៊ុនចំនួន ១១ បានបោះផ្សាយលក់មូលបត្រកម្មសិទ្ធិ និង ១១ ផ្សេងទៀតបោះផ្សាយលក់មូលបត្របំណុល (ឬសញ្ញាបណ្ណ)៕​​