សេដ្ឋកិច្ច

ការប្រមូលពន្ធរបស់ឥណ្ឌូណេស៊ីថយចុះ ដោយសារភាពទន់ខ្សោយនៃវិស័យសំខាន់ៗ

បានផុស

២ years មុន

នៅ

ថ្ងៃសុក្រ ២៨ មិថុនា ២០២៤

ដោយ

ការប្រមូលពន្ធរបស់ប្រទេសឥណ្ឌូណេស៊ីពីវិស័យធំៗបានធ្លាក់ចុះ ដោយមិនបានទាំងពាក់កណ្ដាលនៃគោលដៅចំណូលពន្ធផង ដោយសារតែការប្រមូលពីវិស័យសំខាន់ៗទន់ខ្សោយ។ នេះបើតាមការចុះផ្សាយរបស់កាសែត Jakarta Globe។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គិតត្រឹមខែឧសភា ឥណ្ឌូណេស៊ីប្រមូលពន្ធបានត្រឹមតែ ៧៦០,៣៨ ទ្រីលានរូពីឥណ្ឌូណេស៊ី (ប្រហែល ៤៦,៣ ប៊ីលានដុល្លារ) ដែលវាស្មើនឹង ៣៨,២៣ ភាគរយនៃគោលដៅប្រាក់ចំណូលពន្ធឆ្នាំ ២០២៤។ នេះបើតាមការឱ្យដឹងពីរដ្ឋមន្រ្តីក្រសួងហិរញ្ញវត្ថុរបស់ប្រទេស លោក Sri Mulyani កាលពីថ្ងៃព្រហស្បតិ៍។

លោក Sri Mulyani បានគូសបញ្ជាក់ថា ប្រាក់ចំណូលពន្ធចំនួន ៤៤៣,៧២ ទ្រីលានរូពី ត្រូវបានប្រមូលពីវិស័យក្រៅប្រេង និងឧស្ម័ន ដែលវិស័យនេះរួមចំណែករហូតដល់ ៤១,៧៣ ភាគរយនៃគោលដៅពន្ធរបស់ប្រទេស។ យ៉ាងណាមិញ ចំណូលពន្ធពីវិស័យដដែល បានធ្លាក់ចុះរហូតដល់ ៥,៤១ ភាគរយ ដោយសារតែតម្លៃទំនិញចុះខ្សោយ។

លោក Sri Mulyani បានបន្ថែមទៀតថា៖ «[ក្រុមហ៊ុនរុករករ៉ែផ្សេងៗ] នៅតែមានប្រាក់ចំណេញ ប៉ុន្តែប្រាក់ចំណូលរបស់ពួកគេកំពុងធ្លាក់ចុះ។ នេះប៉ះពាល់ដល់ការបង់ពន្ធរបស់ពួកគេ»។

អាករលើតម្លៃបន្ថែម (VAT) និងពន្ធលើទំនិញប្រណីត បានប្រមូលបាន ២៨២,៣៤ ទ្រីលានរូពី ឬប្រហែល ៣៤,៨ ភាគរយនៃគោលដៅ។ ប៉ុន្តែគួរកត់សម្គាល់ថា សកម្មភាពសេដ្ឋកិច្ច បាននាំឱ្យការប្រមូលពន្ធប្រភេទនេះ កើនឡើង ៥,៧២ ភាគរយ។

យ៉ាងណាមិញ ពន្ធលើវិស័យប្រេង និងឧស្ម័នបានថយចុះរហូតដល់ ២០,៦៤ ភាគរយ ដោយប្រមូលបានតែ ២៩,៣១ ទ្រីលានរូពីប៉ុណ្ណោះ ឬប្រហែល ៣៨,៣៨ ភាគរយនៃគោលដៅក្នុងវិស័យនេះ ដែលបណ្ដាលមកពីការធ្លាក់ចុះនៃការទាញយកប្រេង និងឧស្ម័ន។

ចំណែកឯពន្ធលើដី និងអគារ ក៏ដូចជាពន្ធផ្សេងៗទៀត ប្រមូលបាន ៥ ទ្រីលានរូពី ដែលស្មើនឹង ១៣,២៦ ភាគរយនៃគោលដៅ និងបង្ហាញពីការធ្លាក់ចុះ ១៥,០៣ ភាគរយ៕

Related Topics: