ព័ត៌មានអន្ដរជាតិ

អាមេរិកពន្យារពេលសម្រេចចិត្តដាក់វៀតណាម ថាជាប្រទេសសេដ្ឋកិច្ចទីផ្សារ

បានផុស

៩ ខែ មុន

នៅ

ថ្ងៃសៅរ៍ ២៧ កក្កដា ២០២៤

ដោយ

ក្រសួងពាណិជ្ជកម្មអាមេរិក បានពន្យារពេលការសម្រេចចិត្តលើការដំឡើងងារសម្រាប់វៀតណាម ថាជាប្រទេសប្រើប្រព័ន្ធសេដ្ឋកិច្ចទីផ្សារ ដោយសារការរំខានផ្នែកព័ត៌មានវិទ្យា (IT) ក្រោមបញ្ហារបស់ក្រុមហ៊ុនសុសវែរ CrowdStrike កាលពីពេលថ្មីៗ។ នេះបើតាមការចុះផ្សាយរបស់កាសែត Viet Nam News កាលពីថ្ងៃសុក្រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការកំណត់ងារសេដ្ឋកិច្ចទីផ្សាររបស់វៀតណាម ដែលអាចជំរុញការនាំចេញរបស់ប្រទេសនេះ រំពឹងថានឹងប្រកាសឡើងនៅថ្ងៃទី ២ ខែសីហា វិញ ដើម្បីផ្តល់ពេលវេលាដល់ភាគីពាក់ព័ន្ធក្នុងការរៀបចំបង្ហើយកិច្ចការដែលនៅសល់ បង្កពីបញ្ហា IT។

ងារថ្មី ដែលទទួលបានការគាំទ្រពីក្រុមហ៊ុនលក់រាយ និងក្រុមធុរកិច្ច នឹងជួញកាត់បន្ថយពន្ធប្រឆាំងការលក់បង្ខូចថ្លៃដែលអាមេរិកដាក់លើការនាំចូលពីវៀតណាម។

គួរគូសបញ្ជាក់ថា បច្ចុប្បន្ននេះ វៀតណាមត្រូវបានចាត់ថ្នាក់ថាជាប្រទេសដែលប្រើប្រព័ន្ធសេដ្ឋកិច្ចក្រៅទីផ្សារ ដោយសារតែរដ្ឋនៅតែដើរតួសំខាន់ក្នុងដំណើរការសេដ្ឋកិច្ច។

ក្នុងខែកញ្ញា ឆ្នាំមុន វៀតណាម និងអាមេរិក បានលើកកម្ពស់ទំនាក់ទំនងទៅជាភាពជាដៃគូយុទ្ធសាស្ត្រគ្រប់ជ្រុងជ្រោយក្នុងអំឡុងដំណើរទស្សនកិច្ចរបស់ប្រធានាធិបតីអាមេរិក លោក ចូ បៃដិន ទៅវៀតណាម។ កាលនោះ លោក បៃដិន បានកោតសរសើរចំពោះវឌ្ឍនភាពដ៏សំខាន់របស់វៀតណាមក្នុងការអនុវត្តកំណែទម្រង់សេដ្ឋកិច្ចផ្អែកលើទីផ្សារ ហើយបានសម្តែងនូវឆន្ទៈក្នុងការចូលរួមជាមួយវៀតណាម ដើម្បីផ្លាស់ប្តូរប្រទេសនេះទៅកាន់សេដ្ឋកិច្ចទីផ្សារ៕