ពិព័រណ៍ពាណិជ្ជកម្មកម្ពុជា នឹងតភ្ជាប់ទំនាក់ទំនងទីផ្សារក្នុងស្រុក និងអន្តរជាតិ

ក្រសួងពាណិជ្ជកម្មនឹងរៀបចំ «ពិព័រណ៍ពាណិជ្ជកម្មកម្ពុជា (CTE)» រយៈពេល ៤ ថ្ងៃ ចាប់ពីថ្ងៃទី ១៣ ដល់ថ្ងៃទី ១៦ ខែធ្នូ ឆ្នាំ ២០២៤ ដែលជាព្រឹត្តិការណ៍ពិព័រណ៍ប្រចាំឆ្នាំ ក្នុងគោលបំណងតាំងបង្ហាញផលិតផលមានគុណភាពខ្ពស់ របស់កម្ពុជា ទំនិញនាំចេញ-នាំចូលសំខាន់ៗ និងសេវាកម្មដែលមានលក្ខណៈពិសេស របស់បណ្តាអ្នកផ្គត់ផ្គង់ជុំវិញពិភព​លោក​។

នៅក្នុងពិព័រណ៍នេះ ក្រៅពីមានការតាំងបង្ហាញផលិតផល និងសេវាកម្មដ៏សម្បូរបែប ក៏ជាវេទិកាសម្រាប់ពង្រឹងទំនាក់ទំនង​ពាណិជ្ជកម្មរវាងកម្ពុជាជាមួយទីផ្សារសកល និងការតាំងបង្ហាញផលិតផលរបស់ដៃគូអន្តរជាតិ។

លោក សំហេង បូរ៉ា រដ្ឋលេខាធិការក្រសួងពាណិជ្ជកម្មប្រាប់កម្ពុជាថ្មីនៅថ្ងៃទី ០៩ ខែធ្នូ ឆ្នាំ ២០២៤ ថា ពិព័រណ៍ពាណិជ្ជកម្មកម្ពុជា (​CTE) នៅឆ្នាំនេះ នឹងក្លាយជាបទ​ពិសោធន៍សម្រាប់អ្នកទស្សនា ដែលចូល​រួម​ក្នុងព្រឹត្តិការណ៍​ និងបណ្តាដៃគូពាណិជ្ជកម្ម។

ពិព័រណ៍ពាណិជ្ជកម្មកម្ពុជា ដើមឡើយមានឈ្មោះថា «ពិព័រណ៍ផលិតផលខ្មែរ និងទំនិញនាំចេញ-នាំចូល (CIEGE)» ដែលចាប់តាំងពីឆ្នាំ២០០៦មក ត្រូវបានរៀបចំឡើងទទួលបានជោគជ័យចំនួន១៦លើក។

ការផ្លាស់ប្តូរ ឈ្មោះពិព័រណ៍CIEGE ដើម្បីឱ្យកាន់តែមានភាពសាមញ្ញ ឆ្លុះបញ្ចាំង​ពី​គោល​គំនិត នៃឧត្តមភាព និងប្រកបដោយភាពទាក់ទាញក្នុងទីផ្សារសម័យថ្មី។

ពិព័រណ៍ពាណិជ្ជកម្មកម្ពុជា ឆ្នាំ ២០២៤ នឹងដាក់បង្ហាញផលិតផលជាច្រើនរួមមាន ផលិតផលសម្រាប់ការនាំចេញរបស់កម្ពុជា ផលិតផលកម្មន្តសាល ផលិតផលសិប្បកម្ម ផលិតផលកសិកម្ម និងសេវាកម្ម។

ក្រៅពីនេះ ក៏មានការតាំងបង្ហាញផលិតផល និងលក់ទំនិញ, វេទិកាពាណិជ្ជកម្មឌីជីថលលើកទី១ និងពិព័ណ៍អនឡាញ វេទិកាពាណិជ្ជកម្ម និងវិនិយោគកម្ពុជា-កូរ៉េ កម្មវិធីជំនូបពាណិជ្ជកម្មស្ដីពី​​ការអភិវឌ្ឍទីផ្សារផលិតផលសក្ដានុពលកម្ពុជា វេទិកាស្ដីពីការនាំចេញរបស់កម្ពុជា។

ពិព័រណ៍ពាណិជ្ជកម្មកម្ពុជា នឹងរៀបចំស្ដង់ចំនួន ២៤៦ ស្ដង់ សម្រាប់ពាណិជ្ជករក្នុងស្រុក និងអន្តរជាតិ។

ក្រុមហ៊ុន អ្នកចែកចាយ និងអ្នកតំណាងនៃវិស័យឯកជន ដែលចូលរួមជាអ្នកតាំងពិព័រណ៍ នឹងមានឱកាសបង្ហាញផលិតផល និងសេវាកម្មដែលមានគុណភាពខ្ពស់៕

អត្ថបទ៖ ឡេង ដេត