​ប្រភពព័ត៌មានថ្មីចុងក្រោយ ក្រុមហ៊ុន​​​កូរ៉េ​កំពុង​សិក្សា​គម្រោងសាងសង់អាកាសយានដ្ឋានថ្មី នៅ​ខេត្តមណ្ឌលគិរី

ខណៈគម្រោងសាងសង់អាកាសយានដ្ឋានថ្មីនៅខេត្តមណ្ឌលគិរី កំពុងស្ថិតនៅក្នុងដំណាក់កាលសិក្សា អាជ្ញាធរខេត្តមណ្ឌលគិរីនៅតែរំពឹងថា គម្រោង​សាងសង់​អាកាស​យានដ្ឋាន​ថ្មី​ខេត្ត​មណ្ឌលគិរី​នឹងចាប់ផ្តើមដំណើរការឆាប់ៗ​នេះ ក្រោមការយកចិត្តទុកដាក់ជំរុញពីរដ្ឋាភិបាលក្នុងការស្វែងរក​ដៃគូឯកជនមកវិនិយោគ។

តាម​ប្រភព​ព័ត៌មាន​ចុងក្រោយ កាលពីពេលថ្មីៗ​នេះមាន​ក្រុមហ៊ុន​កូរ៉េ​បាន​ចូល​ជួប​ពិភាក្សា​ជាមួយ​ថ្នាក់ដឹកនាំ​ខេត្តមណ្ឌល គិរី​លើ​គម្រោង​សិក្សា​អាកាសយានដ្ឋាន​ខេត្ត​មណ្ឌលគិរី។

ផ្តល់​បទសម្ភាសន៍ដល់ស្ថាប័នព័ត៌មានជាង ២០ ស្ថាប័ន ដែលចុះបេសកកម្មទ្រង់ទ្រាយធំទៅកាន់ខេត្តមណ្ឌលគិរី និងខេត្តក្រចេះ ដើម្បីផ្សព្វផ្សាយព័ត៌មានទ្រង់ទ្រាយធំពីឧស្សាហកម្មរ៉ែ និងកសិឧស្សាហកម្មទេសចរណ៍​ លោក ងិន សុវិមាន អភិបាលរងខេត្តមណ្ឌលគិរីបានគូសបញ្ជាក់ថា គម្រោងសាងសង់អាកាសយានដ្ឋានខេត្តមណ្ឌលគិរីមានការប្រែប្រួល បន្តិច ដោយសារអ្នកវិនិយោគមុនបានដកខ្លួន ហើយក្រោយមកក៏មានក្រុមហ៊ុន​មួយ​ទៀត​បាន​ចុះមកសិក្សាបន្ត។

លោក ងិន សុវិមាន បានគូសបញ្ជាក់ថា ក្រុមហ៊ុនកូរ៉េបានចុះមកពិភាក្សាជាមួយថ្នាក់ដឹកនាំខេត្ត ក្នុងការសិក្សាសាងសង់ព្រលានយន្តហោះខ្នាតតំបន់នៅ​ខេត្ត​មណ្ឌលគិរី។

បើ​តាម​លោក ងិន សុវិមាន ក្រៅពីសិក្សាវិនិយោគសាងសង់អាកាសយានដ្ឋាន ក្រុមហ៊ុនក៏មានគម្រោងវិនិយោគអភិវឌ្ឍលើការសាងសង់ហេដ្ឋារចនាសម្ព័ន្ធជុំវិញថែមទៀត៕