រមណីយដ្ឋានទឹកជ្រោះប៊ូស្រា កំពុងក្លាយជាគោលដៅទេស ចរណ៍ធម្មជាតិដ៏ពេញនិយម ដោយទាក់ទាញភ្ញៀវជិត ៤ម៉ឺននាក់

រមណីយដ្ឋានទឹកជ្រោះប៊ូស្រា ដែលត្រូវបានចាត់ទុកជា «បេះដូងនៃវិស័យទេសចរណ៍ខេត្តមណ្ឌលគិរី» បន្តទាក់ទាញភ្ញៀវទេសចរជាតិ និងអន្តរជាតិយ៉ាងច្រើនមកលេងកម្សាន្ត។ គិតត្រឹមថ្ងៃទី២៧ ខែកក្កដា ឆ្នាំ២០២៦ រមណីយដ្ឋានធម្មជាតិដ៏ល្បីល្បាញមួយនេះ បានទទួលភ្ញៀវទេសចរសរុប ៣៩,៧២៣នាក់ ក្នុងរយៈពេលជិត ៨ខែដើមឆ្នាំ។

អ្នកស្រី សុភា អ្នកគ្រប់គ្រងទូទៅនៃរមណីយដ្ឋានឧទ្យានធម្មជាតិប៊ូស្រា បានប្រាប់ «កម្ពុជាថ្មី» ថា តួលេខភ្ញៀវទេសចរនេះបានឆ្លុះបញ្ចាំងពីសក្ដានុពលកាន់តែខ្លាំងរបស់វិស័យទេសចរណ៍នៅខេត្តមណ្ឌលគិរី ខណៈភ្ញៀវជាច្រើនកំពុងងាកមកចាប់អារម្មណ៍លើការកម្សាន្តបែបធម្មជាតិ ស្រូបយកខ្យល់អាកាសបរិសុទ្ធ និងទស្សនាទេសភាពព្រៃភ្នំដ៏ស្រស់ស្អាតនៃតំបន់ខ្ពង់រាបភាគឦសាន។ ទោះជាយ៉ាងណា ដោយសាររដូវវស្សាមានភ្លៀងធ្លាក់ញឹកញាប់ និងកម្រិតទឹកប្រែប្រួលមិនទៀងទាត់ គណៈគ្រប់គ្រងរមណីយដ្ឋានមិនអនុញ្ញាតឱ្យភ្ញៀវចុះងូតទឹកកម្សាន្តនោះទេ ដើម្បីធានាសុវត្ថិភាព។

ដើម្បីបន្តទាក់ទាញភ្ញៀវទេសចរ រមណីយដ្ឋានក៏កំពុងរៀបចំគម្រោងអភិវឌ្ឍថ្មីៗជាច្រើន រួមមាន ត្រៀមដាក់ឱ្យដំណើរការកន្ត្រកយោង (Cable Car) ដើម្បីសម្រួលដល់មនុស្សចាស់ និងជនមានពិការភាព ចូលទស្សនាទឹកជ្រោះបានកាន់តែងាយស្រួល។ បំពាក់រទេះរុញសម្រាប់មនុស្សចាស់ និងអ្នកមានការលំបាកក្នុងការធ្វើដំណើរ ត្រៀមបើកសេវាជួលម៉ូតូកង់៤ (ATV) សម្រាប់ភ្ញៀវធ្វើដំណើរទៅទស្សនាទឹកធ្លាក់ជាន់ទី៣។

គម្រោងបើកសួនសត្វសម្រាប់ភ្ញៀវទេសចរ nig ពង្រីកស្ពានឆ្លងកាត់ទឹកជ្រោះ ដើម្បីសម្រួលដល់ការធ្វើដំណើររបស់ភ្ញៀវ។ បង្កើតតំបន់កម្សាន្តសម្រាប់កុមារ (Playground) និងសាងសង់កន្ត្រកយោងមួយខ្សែបន្ថែមនៅត្រើយម្ខាងទៀត ដើម្បីឱ្យភ្ញៀវគ្រប់វ័យ រួមទាំងជនមានពិការភាព អាចទស្សនាទេសភាពជុំវិញទឹកជ្រោះបានកាន់តែងាយស្រួល។

សូមជម្រាបថា រមណីយដ្ឋានទឹកជ្រោះប៊ូស្រា ស្ថិតនៅក្នុងឃុំប៊ូស្រា ស្រុកពេជ្រាដា ខេត្តមណ្ឌលគិរី មានចម្ងាយប្រមាណ ៣៣គីឡូម៉ែត្រ ពីក្រុងសែនមនោរម្យ។ ទីនេះត្រូវបានចាត់ទុកជារមណីយដ្ឋានធម្មជាតិដ៏ល្បីល្បាញបំផុតមួយរបស់កម្ពុជា ដែលភ្ញៀវទេសចរភាគច្រើនមិនរំលងនៅពេលធ្វើដំណើរមកកាន់ខេត្តមណ្ឌលគិរី។

ជាមួយនឹងទឹកធ្លាក់ដ៏អស្ចារ្យ បរិយាកាសត្រជាក់ស្រួល និងការវិនិយោគអភិវឌ្ឍហេដ្ឋារចនាសម្ព័ន្ធទេសចរណ៍ជាបន្តបន្ទាប់ ទឹកជ្រោះប៊ូស្រាកំពុងបន្តក្លាយជាមេដែកទាក់ទាញភ្ញៀវទេសចរគ្រប់រដូវកាល ជាពិសេសក្នុង រដូវកាលបៃតង (Green Season) ដែលធម្មជាតិមានភាពខៀវស្រងាត់៕

ដោយ៖ រៀម សុខហេង