​​​រដ្ឋមន្ត្រីការបរទេសយេម៉ែន ទម្លាយថា ក្រុមហ៊ូធីកំពុងចម្លងយុទ្ធសាស្ត្រអ៊ីរ៉ង់ បិទច្រកសមុទ្រសំខាន់ៗពីរ

រដ្ឋមន្ត្រីការបរទេសស្តីទីនៃប្រទេសយេម៉ែនបានអះអាងថា ក្រុមហ៊ូធី មានគោលបំណងចម្លងតាមយុទ្ធសាស្ត្ររបស់អ៊ីរ៉ង់នៅច្រក Hormuz មកអនុវត្តនៅក្នុងសមុទ្រក្រហម តាមរយៈការរំខានដល់ការដឹកជញ្ជូនតាមនាវានៅក្នុងច្រកសមុទ្រ Bab al-Mandab ហើយក្រុមនេះកាន់តែមានចិត្តក្លាហានឡើង ដោយសារតែការឆ្លើយតបជាអន្តរជាតិនៅមានកម្រិតខ្សោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រី Afrah Al-Zouba រដ្ឋមន្ត្រីការបរទេសចាត់តាំងរបស់យេម៉ែន បានថ្លែងទៅកាន់ក្រុមអ្នកសារព័ត៌មាននៅស្ថានទូតយេម៉ែន ក្នុងរដ្ឋធានីរីយ៉ាដ ប្រទេសអារ៉ាប៊ីសាអូឌីតថា «ក្រុមហ៊ូធីចង់ចម្លងតាមគំរូរបស់អ៊ីរ៉ង់ ហើយសកម្មភាពនេះនឹងបិទច្រកសមុទ្រសំខាន់ៗចំនួនពីរ ដែលជាទ្វារចេញចូលទៅកាន់តំបន់ឈូងសមុទ្រ និងសមុទ្រក្រហម»។ នេះបើយោងតាម jpost កាលពីថ្ងៃទី២៧ ខែកក្កដា។

លោកស្រី Zouba បានលើកឡើងបន្ថែមទៀតថា រដ្ឋាភិបាលយេម៉ែន ដែលទទួលបានការគាំទ្រយ៉ាងខ្លាំងពីអារ៉ាប៊ីសាអូឌីត បានត្រៀមខ្លួនរួចជាស្រេចសម្រាប់ការកើនឡើងនៃជម្លោះ ហើយការបាញ់ប្រហារកំពុងកើតឡើងនៅតាមបណ្តោយខ្សែត្រៀមជួរមុខ ដែលលាតសន្ធឹងពីផ្នែកពាយព្យនៃប្រទេស ចាប់ពីសមុទ្រក្រហមរហូតដល់ព្រំដែនអារ៉ាប៊ីសាអូឌីត ប៉ុន្តែមិនទាន់មានភាគីណាមួយបើកការវាយលុកទ្រង់ទ្រាយធំនៅឡើយទេ។

លោកស្រីបានសង្កត់ធ្ងន់ថា «យើងគិតថា ជម្លោះនេះចាំបាច់ត្រូវតែឈានដល់ទីបញ្ចប់នៅពេលនេះ ទោះបីជាតាមរយៈមធ្យោបាយសន្តិវិធី ឬក៏តាមមធ្យោបាយផ្សេងក៏ដោយ»។

បច្ចុប្បន្ន សមុទ្រក្រហមបានក្លាយទៅជាសមរភូមិប្រយុទ្ធថ្មីមួយនៅក្នុងសង្គ្រាមអ៊ីរ៉ង់ ដោយក្រុមហ៊ូធីបានចាត់វិធានការក្ដៅកាន់តែខ្លាំងប្រឆាំងនឹងអារ៉ាប៊ីសាអូឌីត តាមរយៈការបាញ់មីស៊ីល និងដ្រូនសំដៅទៅលើព្រះរាជាណាចក្រមួយនេះ ព្រមទាំងបានប្រកាសបិទខ្ទប់ការដឹកជញ្ជូនតាមនាវារបស់អារ៉ាប៊ីសាអូឌីតថែមទៀតផង។

យ៉ាងណា អារ៉ាប៊ីសាអូឌីតបានឆ្លើយតបវិញតាមរយៈការវាយប្រហារតាមអាកាសលើអ្វីដែលខ្លួនបានអះអាងថា ជាទីតាំងយោធារបស់ក្រុមហ៊ូធី ហើយបានបញ្ជាក់ថា ខ្លួននឹងការពារការដឹកជញ្ជូនតាមនាវាពាណិជ្ជកម្ម ព្រមទាំងបានចោទប្រកាន់ក្រុមនេះថា កំពុងបម្រើរបៀបវារៈរបស់បរទេស។

ការឡើងកំដៅនៃជម្លោះនេះ ក៏កំពុងគំរាមកំហែងដល់ការនាំយកសង្គ្រាមត្រឡប់មកកាន់ប្រទេសយេម៉ែនវិញផងដែរ ដែលជាទីកន្លែងដែលសង្គ្រាមបានសម្លាប់មនុស្សរាប់សែននាក់ បន្ទាប់ពីក្រុមហ៊ូធីបានវាយលុកចូលរដ្ឋធានីសាណា (Sanaa) កាលពីឆ្នាំ២០១៤ ដែលបានជំរុញឲ្យអារ៉ាប៊ីសាអូឌីតចូលរួមអន្តរាគមន៍ក្នុងនាមជាអ្នកដឹកនាំសម្ព័ន្ធភាពអារ៉ាប់៕

អត្ថបទ ៖ សាង ស្រីល័ក្ខ

ក្រុមហ៊ូធីយេម៉ែន បាញ់ទម្លាក់ដ្រូនប្រយុទ្ធ តម្លៃរាប់​សិប​លាន​ដុល្លារ របស់អារ៉ាប៊ីសាអូឌីត​