ធនាគារពិភព​លោកបន្ទាបការព្យាករកំណើនសេដ្ឋកិច្ចថៃ​មកត្រឹម ១,៨​ ភាគរយ

ធនាគារពិភពលោក បានទម្លាក់ការព្យាករ​កំណើន​ផលិតផលក្នុងស្រុកសរុប (GDP) របស់ប្រទេសថៃ​សម្រាប់ឆ្នាំ ២០២៥ មកត្រឹម​ ១,៨ ភាគរយ ​ដោយលើកឡើងពីស្ថានភាពសេដ្ឋកិច្ចកាន់តែខ្សោយ ចំពេលមានភាពមិនប្រាកដប្រជាជាសកល។ នេះបើតាមការចុះផ្សាយបន្តរបស់កាសែត​ The Nation នៅថ្ងៃពុធនេះ​។

​អត្រានេះ គឺទាបជាងការព្យាករកាលពីលើកមុន ១,១ ភាគរយ។ ​របាយការណ៍ទស្សនវិស័យសេដ្ឋកិច្ចសកលរបស់ធនាគារពិភពលោក បានបង្ហាញថា កំណើនសេដ្ឋកិច្ចថៃ នឹងរងផលប៉ះពាល់ដោយភាពមិនប្រាកដប្រជាជាសកល ដែលកំពុងប៉ះពាល់ដល់បណ្ដាប្រទេសមាន​ទីផ្សារ​កំពុងរីកចម្រើន និងសេដ្ឋកិច្ចកំពុងអភិវឌ្ឍន៍ (EMDEs) រួមទាំង​ថៃផងដែរ។ សកម្មភាព​សេដ្ឋកិច្ច​ថៃ ក៏​រងការ​រំខាន​ដោយ​គ្រោះ​ធម្មជាតិ​ផ្សេងៗផងដែរ ដូចជា​​គ្រោះរញ្ជួយ​ដី​ជាដើម។

គេ​មើលថា កំណើនសេដ្ឋកិច្ចថៃបាន​ជាប់នៅក្នុងដំណាក់កាលដើរអូសជើងធៀប​នឹង​ប្រទេសក្នុងតំបន់ភាគច្រើន ដោយសារតែការធ្លាក់ចុះនៃផលិតកម្ម និង​បំណុលគ្រួសារខ្ពស់ ដែលធ្វើឱ្យតម្រូវការក្នុងស្រុកខ្សោយ ក្នុងបរិបទនៃបញ្ហាសកលផ្សេងៗទៀត​។ ចុង​ក្រោយបំផុត សេដ្ឋកិច្ចកំពុងស្ថិតនៅក្នុងការគំរាមកំហែងដោយការដំឡើងពន្ធគយបដិការ​របស់សហរដ្ឋអាមេរិក ៣៦ ភាគរយ។

សម្រាប់កំណើន​សេដ្ឋកិច្ចពិភពលោក ធនាគារពិភពលោកក៏បានបន្ទាបការ​ព្យាកររបស់ខ្លួនផងដែរ​ មកត្រឹម ​២,៣ ភាគរយ​​ សម្រាប់ឆ្នាំ ២០២៥ ​ដែល​វា​ឆ្លុះបញ្ចាំងពីផលប៉ះពាល់នៃភាពមិនប្រាកដប្រជានៃពាណិជ្ជកម្ម។ នេះបង្ហាញពីការថយចុះពីការព្យាករ ២,៧ ភាគរយ កាលពីលើកមុន។ ​

ធនាគារ​ដដែល​បាននិយាយ​ក្នុងរបាយការណ៍ ២,៣ ភាគរយ គឺជាអត្រាកំណើនសេដ្ឋកិច្ចពិភពលោកយឺតបំផុតចាប់តាំងពីឆ្នាំ ២០០៨ មក ដោយមិនរាប់បញ្ចូលការធ្លាក់ចុះនៃសេដ្ឋកិច្ចសកល​ក្នុងសម័យកូវីដ១៩។

អនុប្រធានជាន់ខ្ពស់ និងជាប្រធានសេដ្ឋវិទូនៃធនាគារពិភពលោក លោក Indermit Gill បានមានប្រសាសន៍ថា ជម្លោះអន្តរជាតិ ជាពិសេសបញ្ហាទាក់ទងនឹងពាណិជ្ជកម្ម បានរំខានដល់គោលនយោបាយផ្សេងៗ ដែល​កន្លងមក​បាន​ជួយកាត់បន្ថយភាពក្រីក្រធ្ងន់ធ្ងរ និងជំរុញ​ភាពរីកចម្រើនបន្ទាប់ពី​សង្គ្រាម​លោកលើកទី២។

លោក Gill បាននិយាយថា៖ «កំណើននៃភាពតានតឹងពាណិជ្ជកម្ម អាចជាហេតុផលចម្បងសម្រាប់ការធ្លាក់ចុះនៃកំណើនសេដ្ឋកិច្ច។ ទោះជាយ៉ាងណាក៏ដោយ ស្ថានភាពអាចប្រសើរឡើង ប្រសិនបើប្រទេសមាន​សេដ្ឋកិច្ចធំៗ ឈានដល់កិច្ចព្រមព្រៀងពាណិជ្ជកម្មរយៈពេលវែង»៕