ការនាំចូលដូងរបស់វៀតណាមកើនឡើងខ្លាំង ដោយសារតម្រូវការខ្ពស់

ការធ្លាក់ចុះបរិមាណដូងដាំដុះតាម​ផ្ទះនៅវៀតណាម បានបង្ខំឱ្យអ្នកលក់ក្នុងស្រុកស្វែងរកជម្រើសផ្គត់ផ្គង់ផ្សេង ដែល​បង្កកំណើនយ៉ាងខ្លាំងនៃការនាំចូលផ្លែដូងក្នុងរយៈពេល ៧ ខែដើមឆ្នាំនេះ។ នេះបើតាមការចុះផ្សាយរបស់កាសែត Viet Nam News។

​សមាគម​បន្លែ និង​ផ្លែឈើ​វៀត​ណាម បាន​ឱ្យដឹងថា ចន្លោះពីខែមករា ដល់ខែកក្កដា វៀតណាម​បាន​នាំចូលផ្លែដូងប្រមាណ ៣១,២ លានដុល្លារ​ អាមេរិក ដោយ​កើនឡើង ១ ៨៧៣ ភាគរយ បើ​ធៀប​នឹងរយៈពេលដូចគ្នា​ឆ្នាំ​មុន។

ប្រធាន​សមាគម​ លោក Đặng Phúc Nguyên បាននិយាយថា ការកើនឡើងនៃការនាំចូល បណ្ដាលមកពីកំណើនយ៉ាងឆាប់រហ័សនៃការនាំចេញដូង ដែលជំរុញដោយតម្រូវការពីប្រទេសចិន សហរដ្ឋអាមេរិក និងមជ្ឈិមបូព៌ា ប៉ុន្តែទិន្នផលក្នុងស្រុកមានកម្រិត ហើយតម្លៃក៏ខ្ពស់ ដែលបង្ខំឱ្យក្រុមហ៊ុននាំចូលដូងសម្រាប់ផលិត។

បច្ចុប្បន្ន វៀតណាមនាំចូលដូងពីឥណ្ឌូណេស៊ី និងក៏កំពុង​ស្វែងរកការផ្គត់ផ្គង់ពីប្រទេសប៉ាពួញូហ្គីណេ​ផងដែរ។

យោងតាមសមាគមដូងវៀតណាម តម្លៃដូងក្នុងស្រុកបានឡើងដល់កម្រិតខ្ពស់បំផុតនៅក្នុងឆមាសទី១នៃឆ្នាំនេះ ប្រមាណ ១៩ ០០០ ដុង (០,៧១ ដុល្លារ)/ផ្លែ នៅពេលដែលការផ្គត់ផ្គង់មានកម្រិត ដែលបណ្តាលមកពីគ្រោះរាំងស្ងួតនៅតំបន់ដីសណ្តមេគង្គ និងជំងឺនៅតំបន់ភាគកណ្តាល៕