ឧបនាយករដ្ឋមន្ត្រី ​អូន ព័ន្ធមុនីរ័ត្ន៖ ​វិស័យមូលបត្រ​មានវឌ្ឍនភាព​ល្អប្រសើរ​ ក្រោយដំណើរការជាង ១ ទស្សវត្សរ៍​

លោកឧបនាយករដ្ឋមន្ត្រី ​អូន ព័ន្ធមុនីរ័ត្ន ​រដ្ឋមន្ត្រីក្រសួងសេដ្ឋកិច្ច ​និងរហិញ្ញវត្ថុ ​និងជាប្រធាន​ក្រុមប្រឹក្សានៃអាជ្ញាធរសេវាហិរញ្ញវត្ថុ ​មិនមែនធនាគារ ​មានប្រសាសន៍ថា ជាងមួយទស្សវត្សរ៍កន្លង​មក​នេះ ​ពោលគឺយើងបានចាប់ផ្ដើម​ពីចំណុចសូន្យ ​ពីស្ថាប័នមួយ​ដែលមានធនធានមនុស្ស​ប្រមាណ ១០ នាក់​ មកជាស្ថាប័នមួយ​ដែលមានធនធានមនុស្សប្រមាណ ២០០ នាក់។​ ជាមួយនឹងហេដ្ឋារចនា​សម្ព័ន្ធ​សមស្រប​ទៅនឹងការវិវត្តនៃបរិបទសង្គម ​និងនិន្នាការជាតិ ​និងតំបន់។​

​លោកឧបនាយករដ្ឋមន្ត្រី​មានប្រសាសន៍នៅក្នុង​សន្និសីទ ​មូលបត្រប្រចាំឆ្នាំ ​២០២៥ នៅថ្ងៃទី ០៧ ខែតុលា ឆ្នាំ ២០២៥។​

​លោកឧបនាយករដ្ឋមន្ត្រី ​អូន ព័ន្ធមុនីរ័ត្ន ​បានបន្ថែមថា ​គណៈកម្មការមូលបត្រកម្ពុជា ​បាន​ក្លាយ​ជា​ស្ថាប័ន​ដ៏សំខាន់មួយ ​ដែលបានរួមចំណែកយ៉ាងសកម្ម ​ក្នុងការអភិវឌ្ឍន៍វិស័យមូលបត្រ ​រួមទាំង​ការ​ដឹក​នាំ ​និងការចូលរួមអនុវត្តនូវផែនការ​សកម្មភាព​អាស៊ាន​ផងដែរ។​

​យើងបានឈានដល់ដំណាក់កាលថ្មី ​ក្នុងការអភិវឌ្ឍន៍វិស័យមូលបត្រនៅកម្ពុជា ​នោះគឺការ​ដាក់​ចេញ​នូវផែនការមេ ​សម្រាប់អភិវឌ្ឍវិស័យនេះ ​រយៈពេល ១០ ឆ្នាំ ​ខាងមុខ ​ពោលគឺ «យុទ្ធសាស្ត្រ​អភិវឌ្ឍ​វិស័យមូលបត្រ ២០២៥-២០៣៥»។​

​បើតាម​លោកឧបនាយករដ្ឋមន្ត្រី ​អូន ព័ន្ធមុនីរ័ត្ន ​យុទ្ធសាស្ត្រនេះ ​គឺជាឯកសារ​រស់ដែលប្រមូលផ្ដុំ ​នូវវិធានការគន្លឹះ ​ជាច្រើនសម្រាប់​ពង្រឹងទីផ្សារ​ដែលមានសម្រាប់ ​និងអភិវឌ្ឍផ្នែកថ្មីៗ ​បន្ថែមទៀត ​ស្របតាមចក្ខុវិស័យវែងឆ្ងាយរបស់រាជរដ្ឋាភិបាល។​

កន្លងមក ​តាមរយៈការខិតខំប្រឹងប្រែង​របស់រាជរដ្ឋាភិបាល​កម្ពុជាបន្តសម្រេចបាននូវ​សមិទ្ធផលក្នុង​ការ​អភិវឌ្ឍសង្គម-សេដ្ឋកិច្ច ​ដែលធ្វើឱ្យប្រទេស​ជាតិ​ទទួលបាននូវការផ្លាស់ប្ដូរមុខមាត់ថ្មី។

​លោកឧបនាយករដ្ឋមន្ត្រី បានបញ្ជាក់ថា៖ «​សេដ្ឋកិច្ចកម្ពុជា ​បានស្ទុះឡើងវិញ ​បន្ទាប់ពីវិបត្តិកូវីដ១៩ ​ជាសកល ទោះបីជាត្រូវបន្តពុះពារជម្នះ ​នូវបញ្ហាប្រឈម ​និងភាពមិនប្រាកដប្រជាខ្ពស់ ​នៃស្ថានភាពតំបន់ ​និងសាកល ​ដោយប្រឈមមុខភូមិសាស្ត្រនយោបាយ​កាន់តែស្រួចស្រាល់»។

​ការបែកខ្ញែក នៃសេដ្ឋកិច្ចសកល ​ដែលប៉ះពាល់ដល់កិច្ចសហប្រតិបត្តិការ​ និងពាណិជ្ជកម្មអន្តរជាតិ​ ការងើបឡើងវិញ​នៃនិន្នាការឯកតោភាគីនិយម​ ភាពមិនច្បាស់លាស់នៃទស្សនវិស័យ​នៃកំណើន​សេដ្ឋ​កិច្ច​នៃបណ្ដាប្រទេស និងតំបន់ ​ជាដៃគូសំខាន់ៗ ​របស់កម្ពុជា។​

​កម្ពុជា​អាចសម្រេចបានកំណើនសេដ្ឋកិច្ចល្អ ដោយសារតែរាជរដ្ឋាភិបាល​ បានដាក់ចេញ ​និងជំរុញ​អនុវត្តទាន់ពេលវេលា​នូវនយោបាយត្រឹមត្រូវ​ មុតស្រួច ​និងចំទិសដៅដូចជា៖ ​ការពង្រឹងអភិបាលកិច្ច ​ការទ្រទ្រង់កំណើន ​និងការធ្វើទំនើបកម្មសេដ្ឋកិច្ច ការបង្កើតការងារ ​និងការលើកស្ទួយវិស័យឯកជន និងសហគ្រិនភាព និងការកសាងមូលធនមនុស្ស៕