វៀតណាម រកឃើញករណីឆ្លងកូវីដក្នុងសហគមន៍ សុទ្ធតែនៅតំបន់បិទខ្ទប់

យោងតាមក្រសួងសុខាភិបាលវៀតណាម បានឲ្យដឹងថា ប្រទេសវៀតណាម បានរាយការណ៍ពីករណីឆ្លងថ្មី នៃជំងឺកូវីដ ១៩ ចំនួន ៣៤ ករណី នៅព្រឹកថ្ងៃពុធនេះ ខណៈក្នុងនោះ ៣៣ ករណី ជាករណីឆ្លងក្នុងសហគមន៍ និង ១ ករណី ជាករណីនាំចូល ដោយធ្វើឲ្យករណីឆ្លងសរុប ក្នុងប្រទេសកើនឡើងដល់ ៣,៥៧១ ករណី ។

ករណីឆ្លងក្នុងសហគមន៍នេះ ត្រូវបានគេរកឃើញនៅក្នុងតំបន់បិទខ្ទប់ នៅភាគខាងជើង និងភាគកណ្តាល ក្នុងនោះមាន ១៣ ករណីនៅខេត្ត Vinh Phuc ភាគខាងជើង, ៧ ករណីនៅកណ្តាលទីក្រុង Da Nang, ៦ ករណីនៅខេត្ត Bac Giang ភាគខាងជើង និង ៥ ករណីនៅរដ្ឋធានីហាណូយ របស់វៀតណាម ខណៈករណីនៅសល់ ស្ថិតក្នុងតំបន់ផ្សេងទៀត ។

ករណីភាគច្រើន គឺជាទំនាក់ទំនងរបស់អ្នកជំងឺដែលឆ្លងពីមុន ឬមានទំនាក់ទំនង ទៅនឹងករណីឆ្លងជាចង្កោម នៅតាមមូលដ្ឋាន ។

ចំណែកករណីនាំចូល គឺជាពលរដ្ឋវៀតណាម ដែលទើបចូលប្រទេសពីបរទេស ហើយត្រូវបានធ្វើចត្តាឡីស័ក នៅពេលមកដល់ ។

ទន្ទឹមនោះក្រសួងសុខាភិបាល បាននិយាយថា រហូតមកដល់ពេលនេះ ក៏មានអ្នកជំងឺចំនួន ២,៦១៨ នាក់បានជាសះស្បើយផងដែរ ហើយមនុស្សជិត ៦៧,៩០០ នាក់ត្រូវបានដាក់ធ្វើចត្តាឡីស័ក និងស្ថិតក្នុងការតាមដាន ខណៈអ្នកស្លាប់ ដោយសារជំងឺកូវីដ ១៩ នៅក្នុងប្រទេស មានំនួន ៣៥ នាក់ ។

យោងតាមក្រសួងបានឲ្យដឹងទៀតថា គិតត្រឹមព្រឹកថ្ងៃពុធនេះ ប្រទេសវៀតណាមបានកត់ត្រា នូវករណីឆ្លងក្នុងសហគមន៍ សរុបចំនួន ២,១៣១ ករណី ក្នុងនោះមាន ៥៦១ ករណី ត្រូវបានរកឃើញនៅក្នុងតំបន់ចំនួន ២៥ ចាប់តាំងពីការផ្ទុះឡើង ចុងក្រោយបង្អស់កាលពីថ្ងៃទី ២៩ ខែមេសា ៕

ប្រែសម្រួលដោយ ៖ ជីវ័ន្ត

ប្រភព ៖ XINHUA

ចុចអាន ៖ វីរុសបំប្លែងខ្លួនឥណ្ឌា កំពុងផ្ទុះនៅវៀតណាម ឆ្លងចូលដល់ ហាណូយ និងខេត្តភាគខាងជើង

ចុចអាន ៖ វៀតណាម បន្ថែមរយៈពេលធ្វើចត្តាឡីស័កសម្រាប់អ្នកចូលមកប្រទេសខ្លួន