កូវីដ-១៩

កូវីដ-១៩វាយលុកពន្ធនាគារថៃ២កន្លែងឆ្លងជិត៣ពាន់នាក់

បានផុស

៣ years មុន

នៅ

ថ្ងៃព្រហស្បតិ៍ ១៣ ឧសភា ២០២១

ដោយ

អ្នកទោសជិត៣០០០នាក់នៅពន្ធនាគារពីរកន្លែងក្នុងទីក្រុងបាំងកក ប្រទេសថៃត្រូវបានធ្វើតេស្តរកឃើញវិជ្ជមានកូវីដ-១៩។ នេះបើតាមនាយកដ្ឋានកែខ្លួនបាននិយាយនៅថ្ងៃពុធ ខណៈប្រទេសថៃកំពុងទទួលរងការរាតត្បាតរលកទី២។

នាយកដ្ឋានកែខ្លួនបាននិយាយថា អ្នកទោសចំនួន១៧៨៥នាក់ ក្នុងចំណោម ៣២៧៤នាក់ត្រូវបានធ្វើតេស្តរកឃើញវិជ្ជមានកូវីដ-១៩នៅពន្ធនាគារពិសេសក្រុងបាំងកក (Bangkok Special Prison) ដែលជាកន្លែងឃុំខ្លួនមុនពេលឡើងសវនាការ។ ចំណែកនៅពន្ធនាគារជាមជ្ឈមណ្ឌលកែខ្លួនស្ត្រី (CWCI) អ្នកទោសចំនួន ១០៤០នាក់ ក្នុងចំណោម៤៤៧៥នាក់បានឆ្លងកូវីដ-១៩។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នាយកដ្ឋានកែខ្លួនបានប្រកាសថា ការឆ្លងបន្ទាប់ពីស្ត្រីជាសកម្មជននយោបាយលេចធ្លោម្នាក់ត្រូវបានដោះលែងឲ្យនៅក្រៅឃុំកាលពីសប្តាហ៍មុនបានប្រកាសថា គាត់បានតេស្តវិជ្ជមានកូវីដ-១៩។

ស្ត្រីឈ្មោះ Panusaya Sitthijirawattanakul និងសមាជិកនៃក្រុមចលនាគាំទ្រប្រជាធិបតេយ្យដឹកនាំដោយនិស្សិតបានកំពុងរង់ចាំឡើងសវនាការពីបទចោទប្រកាន់ប្រមាថដល់ព្រះមហាក្សត្រ ដែលអាចត្រូវបានផ្ទន្ទាទោសដាក់ពន្ធនាគាររហូតដល់១៥ឆ្នាំ។

នាយកដ្ឋានបានបញ្ជាក់កាលពីសប្តាហ៍មុនថា សកម្មជនពីរនាក់ក៏ត្រូវបានតេស្តរកឃើញវិជ្ជមានកូវីដ-១៩ដែរ។ ក្រុមអ្នកជំនួយផ្នែកច្បាប់សម្រាប់សិទ្ធិមនុស្សបាននិយាយថា សកម្មជន៩នាក់ដែលត្រូវបានឃុំខ្លួនក៏ឆ្លងកូវីដ-១៩ ក្នុងនោះរាប់ទាំង Panusaya និងម្នាក់ផ្សេងទៀតដែលត្រូវបានដោះលែង។

អាជ្ញាធរសុខាភិបាលថៃនៅថ្ងៃពុធម្សិលមិញនេះបានប្រកាសថា មានករណីឆ្លងកូវីដ-១៩ថ្មីចំនួន ១៩៨៣នាក់ ដែលធ្វើឲ្យករណីឆ្លងសរុបនៅប្រទេសថៃកើនដល់ ៨៨ ៩០៧នាក់ចាប់តាំងពីជំងឺនេះផ្ទុះឡើង។ ចំពោះករណីស្លាប់ថ្មីមានចំនួន៣៤នាក់ដែលសរុបអ្នកស្លាប់ដោយកូវីដ-១៩ចំនួន៤៨៦នាក់៕

ប្រែសម្រួល៖ វីរបុត្រ
ប្រភព៖ AP