អង់គ្លេស អះអាងថា វ៉ាក់សាំងដែលកំពុងប្រើប្រឆាំងកូវីដ មានប្រសិទ្ធភាពការពារវីរុសបំប្លែងខ្លួនទាំងអស់

នាយករដ្ឋមន្រ្តីអង់គ្លេស បាននិយាយកាលពីថ្ងៃពុធថា លោកមានការជឿជាក់កាន់តែខ្លាំងឡើងចំពោះ វ៉ាក់សាំងដែលត្រូវបានប្រើ ដើម្បីប្រយុទ្ធប្រឆាំងនឹងជំងឺកូវីដ ១៩ គឺមានប្រសិទ្ធភាពប្រឆាំងនឹង វីរុសបំប្លែងខ្លួនទាំងអស់ ។

លោក Boris Johnson បាននិយាយប្រាប់សភាថា “យើងបានពិនិត្យមើលទិន្នន័យម្តងហើយម្ដងទៀត ហើយខ្ញុំអាចប្រាប់សភាថា យើងមានទំនុកចិត្តកាន់តែខ្លាំងឡើងថា វ៉ាក់សាំងមានប្រសិទ្ធភាពប្រឆាំងនឹង វីរុសបំប្លែងខ្លួនទាំងអស់ រួមទាំងវីរុសបំប្លែងខ្លួនរបស់ឥណ្ឌា ផងដែរ” ។

សុន្ទរកថារបស់លោក Johnson បានកើតឡើង ចំពេលមានការព្រួយបារម្ភកាន់តែខ្លាំងឡើង នៅក្នុងចក្រភពអង់គ្លេស អំពីករណីឆ្លងវីរុសបំប្លែងខ្លួនឥណ្ឌា ។ យោងតាមតួលេខផ្លូវការ ពីក្រសួងសុខាភិបាលអង់គ្លេស បានឲ្យដឹងថា បច្ចុប្បន្ននេះមានករណី នៃវីរុសកូវីដ ១៩ បំប្លែងខ្លួនឥណ្ឌាជិត ៣,០០០ ករណីហើយ នៅក្នុងចក្រភពអង់គ្លេស ។

ទន្ទឹមនោះ រដ្ឋមន្រ្តីក្រសួងសុខាភិបាលលោក Matt Hancock ក៏បានព្រមានកាលពីចុងសប្តាហ៍មុនដែរថា វ៉ារ្យង់ឥណ្ឌាអាច “រីករាលដាលដូចភ្លើងឆេះព្រៃ” ក្នុងចំណោមអ្នកដែលមិនបានចាក់វ៉ាក់សាំង ហើយបានជំរុញឲ្យប្រជាជនទាំងអស់ ទទួលការចាក់វ៉ាក់សាំង ។

ស្របពេលជាមួយគ្នានេះ រដ្ឋាភិបាលក៏បានប្រកាសកាលពីថ្ងៃពុធដែរថា មនុស្សពេញវ័យជាង ៧០ ភាគរយនៅក្នុងប្រទេស បានទទួលការចាក់វ៉ាក់សាំង ការពារជំងឺកូវីដ ១៩ ដូសដំបូង ហើយជិត ៤០ ភាគរយ បានទទួលការចាក់ពេញ ២ ដូស ។

យោងតាមតួលេខផ្លូវការចុងក្រោយ បានឲ្យដឹងថា មនុស្សចំនួន ១២៧,៦៩៤ នាក់នៅចក្រភពអង់គ្លេសបានស្លាប់ ដោយសារជំងឺកូវីដ ១៩ ខណៈមានអ្នកឆ្លងសរុប  ៤,៤៥២,៥២៧ ករណី និងមានអ្នកជាសះស្បើយ ៤,២៨៤,០១៥ នាក់ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ វីរុសបំប្លែងខ្លួនឥណ្ឌា វាយលុកកាន់តែខ្លាំងនៅអង់គ្លេស រកឃើញអ្នកឆ្លងជិត ៣ ពាន់ករណីហើយ

ចុចអាន ៖ អង់គ្លេស អាចជួបការរីករាលដាលកូវីដបំប្លែងខ្លួនឥណ្ឌា ដូចភ្លើងឆេះព្រៃ