ព្រូរថយន្តម្នាក់វិជ្ជមានកូវីដ១៩ ជិះរថយន្តលក់អំបិលហូរហែឆ្លងកាត់ច្រើនខេត្ត

រដ្ឋបាលខេត្តរតនគិរី បានប្រកាស​រកឃើញ​ករណី​វិជ្ជមាន ជំងឺកូវីដ​១៩ នៅលើ​ខ្លួន​បុរស​ម្នាក់​ជា​ឈ្មោះ ហង់ ហៃសិលា អាយុ៣៧ឆ្នាំ ជា​ព្រូ​រថយន្ត មានទីលំនៅ ភូមិថ្មី ឃុំព្រៃទាមាន ស្រុកគងពិសី ខេត្តកំពង់ស្ពឺ។​

បុរសរូបនេះ បានធ្វើដំណើរចេញពីខេត្តកំពង់ស្ពឺនៅថ្ងៃទី១៦ ខែឧសភា ទៅទិញអំបិល​យកទៅលក់នៅតាមបណ្តាខេត្តនានា។

នៅថ្ងៃទី១៧ ខែឧសភា បុគ្គលរូបនេះ បានចេញដំណើរពីខេត្តកំពត និងលក់អំបិលជាហូរហែតាមផ្លូវ ហើយបានសំរាកមួយយប់ នៅម្ដុំផ្សារស្គន់ ស្រុកព្រៃឈរ ខេត្តកំពង់ចាម ហើយថ្ងៃបន្ទាប់ក៏បានបន្តដំណើរ និងលក់អំបិលជាហូរហែតាម​ដងផ្លូវចាប់ពីស្គន់ ឆ្លងកាត់ខេត្តកំពង់ចាម ខេត្តត្បូងឃ្មុំ ខេត្តក្រចេះ រួចមកសំរាកនៅវត្តក្បាលរមាស ខេត្តស្ទឹងត្រែង នៅយប់ថ្ងៃទី១៩ ខែឧសភា ឆ្នាំ២០២១។

នៅថ្ងៃទី២០ ខែឧសភា ឆ្នាំ២០២១ វេលាម៉ោង ១០ ព្រឹក ក៏បានមកដល់ព្រំប្រទល់ខេត្តរតនគីរីនិងខេត្តស្ទឹងត្រែង នៅចំណុចស្ពានស្រែពក ឃុំស្រែអង្គ្រង ស្រុកកូនមុំ ខេត្តរតនគិរី ហើយត្រូវបានក្រុមគ្រូពេទ្យប្រចាំការនៅទីនោះ យកវត្ថុសំណាកដោយប្រើប្រាស់ឧបករណ៍តេស្តរហ័ស រកឃើញអ្នកវិជ្ជមានកូវីដ១៩ តែម្តង។

បច្ចុប្បន្នអ្នកវិជ្ជមានរួមជាមួយអ្នកបើកបររថយន្ត ត្រូវបានយកទៅព្យាបាល និងដាក់ធ្វើចត្តាឡីស័ក នៅវិទ្យាល័យ ត្រពាំងក្រហម ស្ថិតនៅភូមិ៣ ឃុំត្រពាំងក្រហម ស្រុកកូនមុំខេត្តរតនគីរី៕ វុទ្ធឦសាន