អុីណូ បំផុសពលរដ្ឋចូលរួមគាំទ្រព្រឹត្តិការណ៍ផ្សព្វផ្សាយផលិតផលខ្មែររយ:ពេល ១សប្តាហ៍ នៅសៀមរាប

ម្ចាស់បទ “អូនកុំយំកុំយំ” លោក សាន ពេជ្រសុភារិទ្ធ ហៅ អុីណូ និង អាចារ្យធំ ចេញមកបំផុសក៏ដូចជាអំពាវនាវដល់មហាជន និងប្រជាពលរដ្ឋខ្មែរគាំទ្រព្រឹត្តិការណ៍ផ្សព្វផ្សាយផលិតផលខ្មែររយ:ពេល១សប្តាហ៍ នៅខេត្តសៀមរាប នាចុងខែតុលា ឆ្នាំ២០២៥ នេះ។

លោក អុីណូ បានឱ្យដឹងថា សម្រាប់ព្រឹត្តិការណ៍ផ្សព្វផ្សាយផលិតផលខ្មែរ ភូមិមួយផលិតផលមួយខេត្តសៀមរាប និងពិធីបើកសម្ពោធផ្សារផលិតផលខ្មែរភូមិមួយផលិតផលមួយ ខេត្តសៀមរាប គណៈកម្មការជាតិជំរុញចលនាភូមិមួយផលិតផលមួយ និងរដ្ឋបាលខេត្តសៀមរាប។ លោកថាព្រឹត្តិការណ៍ផ្សព្វផ្សាយផលិតផលខ្មែរ គឺចាប់ពីថ្ងៃទី២៥ ដល់ថ្ងៃទី៣១ ខែតុលា ឆ្នាំ២០២៥ វេលាម៉ោង ៥:៣០នាទី ពេលរសៀល។

អុីណូ និងអាចារ្យធំ បានអំពាវនាវផងដែរចំពោះប្រជាពលរដ្ឋដែលមានផលិតផលខ្មែរ អាចយកមកដាក់តាំងបង្ហាញពីស្នាដៃកូនខ្មែរ ក្នុងព្រឹត្តិការណ៍ផ្សព្វផ្សាយផលិតផលខ្មែររយ:ពេល១សប្តាហ៍នៅខេត្តសៀមរាប។ អុីណូ និងអាចារ្យ ធំ បានលើកឡើងនូវពាក្យស្លោកថា “គាំទ្រផលិតផលខ្មែរគឺស្នេហាជាតិ គាំទ្រផលិតផលខ្មែរ ថែសេដ្ឋកិច្ចជាតិ”។

តារាចម្រៀងរូបនេះ បាននិយាយបន្ថែមទៀតថា ម៉ោងនេះខ្មែរអាចធ្វើបានម៉ោងនេះខ្មែរចេះជួយគ្នាម៉ោងនេះខ្មែរមិនដាច់ពោះស្លាប់ដោយសាអត់ផលិតផលសៀមទេអ៊ីចឹង យើងត្រូវតែរួមគ្នាគាំទ្រផលិតផលដែលជាស្នាដៃរបស់ខ្មែរយើង៕ ចាន់រ៉ា