ជីវិតកម្សាន្ដ

សមាគមសិល្បករខ្មែរ ត្រូវការអ្នកចូលរួមជួយវេចខ្ចប់សម្ភារៈចាំបាច់សម្រាប់ពលរដ្ឋភៀសសឹក នៅម៉ោង ៩ព្រឹកថ្ងៃអង្គារ៍នេះ

បានផុស

៦ ខែ មុន

នៅ

ថ្ងៃអង្គារ ១៦ ធ្នូ ២០២៥

ដោយ

ដើម្បីឆ្លើយតបនឹងកំណើននៃពលរដ្ឋភៀសសឹកកម្ពុជា ប្រធានសមាគមសិល្បករខ្មែរ បានប្រកាសស្នើសុំសិល្បករ និងសាធារណជន ចូលរួមជួយវេចខ្ចប់អីវ៉ាន់ នៅម៉ោង ៩ព្រឹកថ្ងៃអង្គារ៍នេះ នៅ Royal One (ស្តុបកាណាឌីយ៉ា) បណ្តោយផ្លូវមហាវិថីព្រះមុនីវង្ស កែងមហាវិថីក្រមួនស ក្នុងន័យដើម្បីរួមចំណែកទ្រង់ទ្រងដល់ស្បៀង និងសម្ភារៈចាំបាច់ដល់ពលរដ្ឋភៀសសឹកកម្ពុជា ដែលកំពុងរងគ្រោះក្នុងសង្គ្រាមឈ្លានពានពីសំណាក់យោធាថៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមការបញ្ជាក់ ក្នុងនាមជាអនុប្រធានក្រុមប្រឹក្សាភិបាលក្រុមហ៊ុន រ៉ូយ៉ាល់ គ្រុប និងជាអនុប្រធានមូលនិធិទ្រទ្រង់ជនភៀសសឹក លោកជំទាវអ្នកឧកញ៉ា ម៉ៅ ចំណាន គិតម៉េង នឹងដឹកនាំរៀបចំវេចខ្ចប់បន្ទាន់នូវសម្ភារៈប្រើប្រាស់ និងគ្រឿងឧបភោគបរិភោគចម្រុះ ដូចជា ភួយ, ក្រម៉ា, សារ៉ុង, ច្រាស់ដុះធ្មេញ, ថ្នាំដុះធ្មេញ, ប្រេងកូឡា, សាប៊ូ, ទឹកត្រី, ទឹកស៊ីអ៊ីវ, មីជាតិ, អង្ករ, ត្រីងៀត ដាច់ក្រក និងរបស់របរផ្សេងៗទៀត ដើម្បីនាំយកទៅចែកជូនដល់ពលរដ្ឋជនភៀសសឹកនៅជំរំសុវត្ថិភាព។

ការវេចខ្ចប់នេះ នឹងរៀបនៅព្រឹកថ្ងៃអង្គារ៍ទី១៦ ស្អែកនេះ ចាប់ពីម៉ោង៩ព្រឹកតទៅ នៅ Royal One ស្តុបកាណាឌីយ៉ា អតីតប៉ុស្តិ៍លេខ៣ចាស់ ដើម្បីឆ្លើយតបបន្ទាន់ទៅនឹងកំណើនជនភៀសសឹក និងតម្រូវចាំបាច់នៅជំរំភៀសសឹក។

ដោយហេតុនេះ ប្រធានសមាគមសិល្បករខ្មែររូបនេះ អំពាវនាវឱ្យសិល្បករ និងមហាជនគ្រប់មជ្ឈដ្ឋានចូលរួមជួយឱ្យបានច្រើនកុះករ។ ទីតាំងវេចខ្ចប់ https://maps.app.goo.gl/qCPyPwTePTawDuTr9?g_st=ipc

គួរឱ្យដឹងដែរថា ស្របពេលដែលស្ថានការណ៍តាមព្រំដែនកម្ពុជា-ថៃ កាន់តែតានតឹងឡើងគួរឱ្យកត់សម្គាល់ និងដើម្បីឆ្លើយតបនឹងស្ថានភាពបន្ទាន់នៃមនុស្សធម៌ ក្នុងការផ្តល់ជំនួយចាំបាច់សម្រាប់ពលរដ្ឋភៀសសឹកកម្ពុជានោះ ក្រុមការងារសមាគមសិល្បករខ្មែរ, ផលិតកម្មបារមី និង Sabay Events Production បានសហការយ៉ាងសកម្មជាមួយដៃគូ និងអាជ្ញាធរពាក់ព័ន្ឋ ក្នុងការកៀរគរមូលនិធិ និងផ្តល់ជំនួយចាំបាច់។

តួយ៉ាង កាលពីថ្ងៃទី០១ ខែធ្នូ ឆ្នាំ២០២៥ សមាគមសិល្បករខ្មែរ និងផលិតកម្មបារមី បានសហការគ្នារៀបចំការប្រគំតន្ត្រី << RISE FOR KHMER: BARAMEY IN PARIS » នៅសាល_Salle_Pleyel ទីក្រុងប៉ារីស ស្វែងរកការចូលរួមស្វែងរកការឧបត្ថម្ភពីជនជាតិខ្មែរនៅឯនាយសមុទ្រ អ្នកគាំទ្រអន្តរជាតិ និងអ្នកគាំទ្រក្នុងស្រុកផងដែរ។

ផលិតកម្មបញ្ជាក់ថា ការប្រគំតន្ត្រី « RISE FOR KHMER: BARAMEY IN PARIS » ដែលរៀបចំឡើងជាលក្ខណៈមិនស្វែងរកប្រាក់ចំណេញ បានរៃអង្គាសថវិកាបានចំនួន $80,000 (ប្រាំបីម៉ឺនដុល្លារអាមេរិក)។ ថវិកានេះកំពុងត្រូវបានបែងចែកសម្រាប់កិច្ចការមនុស្សធម៌ ក្នុងការផ្ដល់ជំនួយចាំបាច់ដល់ជនភៀសសឹក និងសហគមន៍ផ្លាស់ទីលំនៅ ដោយផ្តោតសំខាន់លើស្រ្តី កុមារ ជនចាស់ជរា និងអ្នកដែលងាយរងគ្រោះដទៃទៀត។ ជាមួយគ្នានេះ ផលិតកម្មក៏បានគូសបញ្ជាក់ថា របាយការណ៍ហិរញ្ញវត្ថុនឹងត្រូវបានបង្ហាញជូនសាធារណជន ដើម្បីធានានូវតម្លាភាព៕