ទោះកំពុងអនុវត្តបទឈប់បាញ់ថ្មី ខេមរ: សិរីមន្ត អះអាងថា បន្តទទួលជំនួយរហូតដល់មានសន្តិភាពពេញបរិបូរណ៍វិញ

កំពូលតារាចម្រៀងឧកញ៉ា ខេមរ: សិរីមន្ត បានបញ្ជាក់ដោយរក្សាជំហរថា លោកនៅតែបន្តទទួលមូលនិធិស្បៀងអាហារនិងសម្ភារៈផ្សេងៗ ទោះបទឈប់បាញ់បានឯកភាពគ្នា អនុវត្តរយ:ពេល ៧២ម៉ោងហើយក្តី។

ចាប់តាំងពីយោធាសៀមឈ្លានពានបូរណភាពទឹកដីប្រទេសកម្ពុជា កំពូលតារាចម្រៀង ខេមរ: សិរីមន្ត បានសម្រេចបង្កើតមូលនិធីសប្បុរជនដើម្បីជួយដល់វីរកងទ័ពជួរមុខ និងពលរដ្ឋខ្មែរភៀសសឹកនៅតាមព្រំដែន ខណ:សកម្មភាពនេះទទួលបានបការគាំទ្រខ្លាំងពីមហាជនទាំងក្នុងនិងក្រៅប្រទេស។

លោក ខេមរ: សិរីមន្តបានរៀបរាប់ឱ្យដឹងថា “ថ្ងៃទី២៧ ខែធ្នូ ឆ្នាំ២០២៥ បទឈប់បាញ់បានឯកភាពគ្នាអនុវត្តហើយ ប៉ុន្តែស្បៀងនិងសម្ភារៈផ្សេងៗ (បញ្ជាក់ ខ្ញុំបាទមិនទទួលថវិកាទេ) ដើម្បីជួយដល់ពូមីងបងប្អូនដែលភៀសសឹក និងវីរកងទ័ពនៅតែត្រូវការជាចាំបាច់ ខ្ញុំបាទនៅតែបន្តទទួលរហូតយើងទទួលសន្តិភាពពេញបរិបូរណ៍មកវិញ ទីតាំងនៅផ្ទះខ្ញុំបាទផ្ទាល់ទល់មុខសួនសុបិន្តចំការព្រីងក្បែរវត្តសំរោងអណ្ដែត”។

សូមបញ្ជាក់ថា កម្ពុជា និងថៃបានយល់ព្រមឱ្យមានបទឈប់បាញ់ជាបន្ទាន់នៅម៉ោង១២ថ្ងៃត្រង់ ថ្ងៃទី២៧ ខែធ្នូ ឆ្នាំ២០២៥នេះ ហើយកងទ័ពកម្ពុជា១៨រូប ដែលថៃចាប់ឃុំខ្លួនរំពឹងថានឹងត្រូវដោះលែងមកវិញបន្ទាប់ពីបទឈប់បាញ់ត្រូវបានអនុវត្តពេញលេញរយៈពេល ៧២ម៉ោង។នេះជាការអះអាងរបស់រដ្ឋមន្ត្រីការពារជាតិកម្ពុជា ក្រោយការឯកភាពគ្នារវាងកម្ពុជា និងថៃ ក្នុងកិច្ចប្រជុំពិសេសលើកទី៣ នៃគណៈកម្មាធិការព្រំដែនទូទៅ(GBC) នៅថ្ងៃទី២៦ខែធ្នូនេះ៕ ដោយ ៖ចាន់រ៉ា