កើតរឿងយូរហើយ ពេលនេះអតីតភរិយា Will Smith ស្រាប់តែចេញមុខសុំទោសជំនួសលោក

អ្នកស្រី Sheree Zampino អតីតភរិយា Will Smith បានសុំអង្វរជំនួសអតីតស្វាមី សុំឱ្យមានការអភ័យទោសពីសាធារណជន និងអ្នកពាក់ព័ន្ធ ដើម្បីឱ្យតារាប្រុសរូបនេះមានឱកាសវិលចូលសិល្បៈវិញ ក៏ដូចជាចូលរួមក្នុងកម្មវិធីពានរង្វាន់​អូស្ការលើកក្រោយ។

អ្នកស្រី Sheree Zampino បានចេញមុខជាសាធារណៈធ្វើការសុំទោសជុំវិញរឿងរ៉ាវដែល Will Smith ទះកំផ្លៀងតារាកំប្លែង Chris Rock នៅក្នុងកម្មវិធី Academy Awards កាលពីខែមីនា កន្លងទៅ។

នៅក្នុងបទសម្ភាសន៍ជាមួយសារព័ត៌មាន Daily Mail តារាសម្ដែងវ័យ ៥៤ឆ្នាំរូបនេះ បានអំពាវនាវ និងទទូចហើយទទូចទៀតសុំឱ្យអ្នកគាំទ្រអភ័យទោសឱ្យ Will Smith ករណីហិង្សា​របស់ Will ដែលបានធ្វើទៅលើ Chris ។ អ្នកស្រីពិតជាសង្ឃឹមថា ការលើកលែងទោសម្ដងនេះ គឺជាការផ្ដល់ឱកាសឱ្យ Will Smith បានកែប្រែកំហុស។

គួររំលឹកថា អ្នកស្រី Sheree និងលោក Will បានរៀបការនិងរួមរស់ជាមួយគ្នាកំលុងឆ្នាំ ១៩៩២-១៩៩៥ ហើយក្រោយចែកផ្លូវគ្នា រហូតដល់ពេលនេះ អ្នកទាំងពីរបន្សល់ទុកកូនប្រុសអាយុ ២៩ឆ្នាំម្នាក់ ឈ្មោះ Trey Smith ។

ចំពោះរឿងរ៉ាវទះកំផ្លៀងតារាកំប្លែង Chris Rock កាលពី៥ខែមុន សាមីខ្លួនលោក Will Smith បានធ្វើការសុំទោសជាសាធារណៈទៅកាន់មហាជន និង Chris Rock ម្ដងរូចហើយកាលទើបកើតរឿងភ្លាមៗ។ ទោះជាយ៉ាងនេះ Will Smith ត្រូវបានហាមប្រាមមិនឱ្យចូលរួមកម្មវិធីប្រគល់ពានរង្វាន់អូស្ការរហូតដល់ ១០ឆ្នាំ ហើយក្រុមហ៊ុនផលិតភាពយន្តនានា បានលុបចោលកុងត្រាជាមួយរូបលោក៕

ប្រែសម្រួល៖ សន្យា

ចុចអាន៖ Will Smith ហាមមិនឲ្យចូលក្នុងកម្មវិធីប្រគល់ពានរង្វាន់ Oscar រយៈពេល ១០ ឆ្នាំ ក្រោយទះកំផ្លៀង Chris Rock

ចុចអាន៖ Will Smith ឈប់សម្ដែងឲ្យហូលីវូដ ក្រោយរឿងអាស្រូវទះកំផ្លៀង Chris Rock