យ៉ែម សំអូន ប្រកាសជំហរមិនចូលចិត្តការអែបអប យកមុខមាត់ដើម្បីតែភាពហ៊ឺហារក្លែងក្លាយ

តារាចម្រៀងជើងចាស់លោក យ៉ែម សំអូន សុខៗបានដាច់ចិត្តទម្លាយពីអតចរិតពិតរបស់ខ្លួនប្រាប់ទៅដល់អ្នកគាំទ្រ និងមហាជនថា ជីវិតដែលលោកមិនចូលចិត្ត គឺការអែបអបយកមុខមាត់ដើម្បីតែភាពហ៊ឺហារក្លែងក្លាយ។ ការលើកឡើងរបស់លោក យ៉ែម សំអូន បានធ្វើឲ្យមហាជនលើកសរសើរគ្រប់គ្នា ។

បើតាមការកត់សម្គាល់តារាចម្រៀងលោក យ៉ែម សំអូន បច្ចុប្បន្នហាក់មានការមមាញឹកខ្លាំងលើអាជីពសិល្ប: ជាពិសេស​គឺមុខរបររកស៊ីផ្ទាល់ខ្លួនព្រោះថា លោកក៏មានក្រុមតន្រ្តីសម័យផ្ទាល់ខ្លួន និងទទួលបានការគាំទ្រជាបន្តបន្ទាប់ពីមហាជនគ្រប់មជ្ឈដ្ឋាន។ ដោយសារតែកត្តានេះហើយទើបជម្រុញឲ្យតារាប្រុសរូបនេះកាន់តែមានជីវភាពធូធារ និងហ៊ឺហារមិនចាញ់មិត្តភក្តិរួមជំនាន់ទេ។

ដោយឡែកបើងាកមកចាប់អារម្មណ៍អំពីសម្តីលើកឡើងនូវការតាំងចិត្តរបស់លោក យ៉ែម សំអូន វិញបានបញ្ជាក់ជំហរ​ថា «វាហត់បន្តិចមែនប៉ុន្តែប្រើចំណេះដឹង និងសមត្ថភាពការងាររបស់ខ្លួនដែលមានដើម្បីចំណូលខ្លួនឯង គឺពិតជាមានសេចក្ដីសុខ សេរីភាព ប្រកបដោយសេចក្ដីថ្លៃថ្នូរ នេះគឺខ្ញុំ ជីវិតដែលមិនចូលចិត្តការអែបអបយកមុខមាត់ដើម្បីតែភាពហ៊ឺហាក្លែង​ក្លាយនោះឡើយ វាជ្រុងមួយនៃជីវិតក្នុងសង្គមឥឡូវនេះ»។

ជាមួយគ្នានេះតារាប្រុសលោក យ៉ែម សំអូន ក៏បាននិយាយនៅព្រឹកថ្ងៃទី០៥ ខែតុលា ឆ្នាំ២០២២នេះដែរថា កុំចាំដល់ពេលដែលរាងកាយមកដែលត្រូវគេយកត្រឡប់ទៅវិញហើយបន្សល់ទុកកេរ្តិ៍ឈ្មោះស្អុយអាសោច ដល់វង្សត្រកូលនោះព្រោះជីវិតមានតែម្ដងទេ ត្រូវចេះសោយសុខ និងធ្វើអ្វីទៅតាមសមត្ថភាពដែលខ្លួនឯងមានកុំរស់ជាមួយនឹងសម្ដី ហើយនិងការគិតរបស់អ្នកដទៃ មកបំផ្លាញជីវិតខ្លួនឯងអី យកឈ្នះការខឹង ដល់ការមិនតបខឹង ស្ងៀមជាជាងស្រដី។

គេសង្កេតឃើញថា លោក យ៉ែម សំអូន អំឡុងពេលមួយរយ:ចុងក្រោយនេះ គឺកាក់កបខ្លាំងជាមួយនឹងការកើបលុយពីវិថីសិល្ប:។ មិនតែប៉ុណ្ណោះលោក យ៉ែម សំអូន ក៏ត្រូវបានគេចាត់ទុកថា ជាតារាជើងចាស់ដែលរក្សាបានប្រជាប្រិយភាពខ្លាំងទៀតផង៕

អត្ថបទ៖ ចាន់រ៉ា