ជីវិតកម្សាន្ដ

លីម តិចម៉េង បំផុសគំនិតថា កុំលក់ឧត្ដមគតិបោះចោលគុណធម៌ជីវិត ដោយសារអាហារ ៣ ពេល

បានផុស

១២ ខែ មុន

នៅ

ថ្ងៃពុធ ៥ មេសា ២០២៣

ដោយ

តារាចម្រៀងវ័យក្មេងលោក លីម តិចម៉េង នាពេលកន្លងមក ធ្លាប់បានទម្លាយពីប្រវត្តិតស៊ូខ្លះៗមកហើយ ដោយកាលនោះ លោកបានឲ្យដឹងថា ខ្លួនធ្លាប់ជាអតីតក្មេងឃ្វាលគោ, ធ្លាប់រត់តុតាមរោងការ និងជាសន្តិសុខជាដើម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រាកដណាស់តារាចម្រៀងវ័យក្មេង លីម តិចម៉េង បន្ទាប់ពីក្លាយជាម្ចាស់ពាន បច្ចុប្បន្នត្រូវបានគេកត់សម្គាល់ឃើញថា ទាំងប្រជាប្រិយភាព និងសន្ទុះ នៃការគាំទ្រពីទស្សនិកជន គឺមានការកើនឡើងជាបន្តបន្ទាប់ ពិសេសតាមរយៈការឡើងច្រៀងលើឆាកម្តងៗ មានអ្នកគាំទ្រជាច្រើននាំគ្នាទៅរង់ចាំអបអរ និងទស្សនាវត្តមានរបស់កំលោះតូចរូបនេះ។

ស្របពេលទីផ្សារចម្រៀងកំពុងមានសន្ទុះហក់ឡើង ដែលជាឱកាសចេញកើបលុយពីបណ្ដាកម្មវិធីប្រគំតន្ត្រីនេះដែរ ស្រាប់តែ លីម តិចម៉េង បានចេញមកបំផុសនូវគំនិតអ្នកគាំទ្រជុំវិញការរស់នៅ ដោយប្រកាន់ភ្ជាប់នូវសីលធម៌ និងគុណធម៌ឲ្យបានខ្ពស់ផងដែរ។ លីម តិចម៉េង បានលើកឡើងថា កុំលក់ឧត្ដមគតិ បោះចោលគុណធម៌ជីវិត ដោយសារតែអាហារ ៣ ពេល។

តារាចម្រៀងលោក លីម តិចម៉េង បាននិយាយបន្ថែមថា ស្អប់ភាពក្រ តែកុំស្អប់អ្នកក្រ ពេលក្រ ត្រូវប្រឹងឲ្យមាន ពេលមាន កុំភ្លេចកំណើត កុំមើលរំលងអ្នកក្រ។ ការលើកឡើងរបស់ លីម តិចម៉េង ខាងលើនេះ គឺមានការបញ្ចេញមតិគាំទ្រជាច្រើន ខណៈមានខ្លះបាននិយាយថា មាន ឬក្រ សុទ្ធតែមានតម្លៃដូចគ្នា អ្វីដែលសំខាន់ គឺលើឧត្ដមគតិរបស់អ្នកគិត អ្នកខ្លះមាន តែឧត្ដមគតិរបស់ពួកគេអន់ជាងអ្នកក្រទៅទៀត អ្នកខ្លះមាន តែចិត្តមិនល្អស្មើអ្នកក្រទេ អ្នកខ្លះមានហើយមើលងាយអ្នកក្រទាំងដែលការពិតបើគ្មានអ្នកក្រអ្នកមានក៏មិនអាចរស់បានល្អដូចគ្នា ហើយមួយទៀតអ្នកមានក៏មិនប្រាកដថាមានរហូត ហើយអ្នកក្រក៏មិនប្រាកដថានឹងក្ររហូតដូចគ្នា៕

អត្ថបទ ៖ ចាន់រ៉ា