តារាកំប្លែង ជុំ រស្មី ហៅ ស្រី ទូច និងតារាចម្រៀង ស៊ូ ស៊ីរីកា អំពាវនាវដល់ប្រព័ន្ធតុលាការជួយផ្តល់ភាពយុត្តិធម៌ ពាក់ព័ន្ធរឿនក្តីមរតក

តារាកំប្លែងអ្នកស្រី ជុំ រស្មី ហៅ ស្រី ទូច និងតារាចម្រៀងស្រីវ័យក្មេងល្បីឈ្មោះកញ្ញា ស៊ូ ស៊ីរីកា ព្រមទាំងបងប្អូន​១១​នាក់​ដែលជាកូន ជាចៅៗរបស់លោកស្រី កែវ មន្ថា ហៅ យិន សុខុម តារាភាពយន្ត និងចម្រៀងជំនាន់ទសវត្សរ៍​៦០ជាថ្មីម្តងទៀតបានទទូចស្នើសុំនូវភាពយុត្តិធម៌ពីតុលាការពាក់ព័ន្ធរឿនមរតក។

បើយោងតាមការអះអាងរបស់តារាកំប្លែងអ្នកស្រី ទូច បានបញ្ជាក់ប្រាប់ថា គិតមកទល់ពេលនេះ រយ:ពេលជាង២ឆ្នាំមកហើយដែលអ្នកស្រី និងបងប្អូនកូនចៅចំនួន១១នាក់ត្រូវជាកូន ជាចៅ និងចៅទួតរបស់វីរ:សិល្បការិនីលោកស្រី កែវ មន្ថា បាននឹងកំពុងជួបរឿងដ៏អយុត្តិធម៌ខ្លាំងណាស់ពីសំណាក់ប្តីក្រោយ និងកូនៗក្រោយរបស់លោកស្រី កែវ មន្ថា ដែល​បានបំពានយកទ្រព្យសម្បត្តិដែលជាកេរ្តិ៍បណ្តាំមរតករួមចំណែកបន្សល់ទុកពីអ្នកម្តាយរបស់ខ្លួនដើម្បីបែងចែកសម្រាប់កូនៗនិងចៅ។

អ្នកស្រីទូចបន្តទៀតថា “ខ្ញុំព្រមទាំងបងប្អូនចំនួន១១នាក់ខាងលើត្រូវជាកូនជាចៅ និងចៅទួតរបស់អ្នកម្ដាយ កែវ មន្ថា ហៅ យិន សុខុម ជាតារាភាពយន្ត និងចម្រៀងជំនាន់ទសវត្សរ៍៦០ ពេលនេះពួកខ្ញុំ និងបងប្អូនកូន​ក្មួយ​ទាំង​អស់កំពុងរងនូវភាពអយុត្តិធម៌ពីសំណាក់ប្ដីក្រោយម្ដាយខ្ញុំ រួមជា​មួយ​កូនក្រោយមិនបានធ្វើតាមបណ្តាំមរតករបស់អ្នកម្តាយខ្ញុំទេ ទោះបណ្តាំមរតក​នោះកែប្រែយ៉ាងមិចក៏ដោយ ក៏ជាឆន្ទៈរបស់អ្នកម្តាយរបស់ខ្ញុំក្នុងការចែកឲ្យកូន និងថៅដែរ”។

អ្នកស្រី ជុំ រស្មី ហៅ ស្រីទូច បានលើកឡើងទៀតថា ភាគីប្តីក្រោយព្រមទាំងកូនៗ ពួកគាត់នោះកន្លងមក គឺបានបង្វែរសាច់រឿងពីម្តងជាទីពីរដងមកហើយដើម្បីចង់បានទ្រព្យមរតកតែខ្លួនឯង។ អ្នកស្រី ទូច បន្តថា អ្នកស្រី និងកូនចៅទាំង១១នាក់ស្នើសុំដល់ប្រព័ន្ធតុលាការលោកមេត្តាពិនិត្យឲ្យច្បាស់ជុំវិញសំណុំរឿងក្តីរបស់ពួកអ្នកស្រីនេះផង។

តារាកំប្លែងរូបនេះបន្ថែមថា សម្រាប់ពេលនេះ អ្វីដែលចង់បាននោះអ្នកស្រីរួមនឹងបងប្អូនកូនថៅដែលក្នុងនោះក៏មានតារាចម្រៀងកញ្ញា ស៊ូ សីរីកា គឺចង់បានឲ្យមានការផ្តល់ភាពយុត្តិធម៌ចំពោះពួកគាត់ដូចដែលមានសរសេរនៅក្នុងលិខិតបណ្តាំមរតករបស់លោកស្រី កែវ មន្ថា ដែលជាម្តាយ។ ដូច្នេះហើយអ្នកស្រី ទូច ក៏បានស្នើ និងអំពាវនាវយ៉ាងទទូចដល់ប្រព័ន្ធច្បាប់មេត្តាជួយរកយុត្តិធម៌ និងពន្លឿនរឿងក្តីនេះដើម្បីស្វែងរកយុត្តិធម៌ចំពោះពួកគាត់ដែលជាកូនជាចៅ។

យ៉ាងណាមិញពាក់ព័ន្ធនឹងរឿងរ៉ាវនៃបណ្តាំមរតកខាងលើ យើងមិនទាន់អាចស្វែងរកការបកស្រាយពីភាគីម្ខាងទៀតដែលជាស្វាមីក្រោយរបស់លោកស្រី កែវ មន្ថា បានទេជុំវិញបញ្ហានេះ។

គួររម្លឹកដែរថា កាលពីថ្មីៗកន្លងទៅនេះ ក្រុមគ្រួសាររបស់តារាកំប្លែងអ្នកស្រី ទូច ក៏ធ្លាប់បាន​ចេញមកទម្លាយភាពអយុត្តិធម៌ជាមួយបងប្អូនចំនួន១១នាក់ ពាក់ព័ន្ធរឿងទំនាស់មរតកដែលលោកស្រី កែវ មន្ថា បានសរសេរបណ្តាំទុកឲ្យកូនៗចៅៗព្រមជាមួយនឹងប្តីក្រោយរបស់លោកយាយ កែវ មន្ថា ជាបន្តបន្ទាប់ផង។ ដោយឡែកសម្រាប់តារាចម្រៀងល្បីឈ្មោះកញ្ញា ស៊ូ ស៊ីរីកា ដែលជាចៅរបស់លោកស្រី កែវ មន្ថា ក៏ស្នើសុំដល់តុលាការជួយរកយុត្តិធម៌ដល់ក្រុមគ្រួសារគាត់ខាងលើនេះផងដែរ៕

អត្ថបទ៖ ចាន់ រ៉ា