ជីវិតកម្សាន្ដ

វីជេ អាឡាស្កូ បារម្ភពីសុខភាព ក្រោយជួបគ្រោះថ្នាក់ចរាចរណ៍ ខណៈដៃម្ខាងអាចនឹងស្វិត

បានផុស

៣ ខែ មុន

នៅ

ថ្ងៃពុធ ២៧ ធ្នូ ២០២៣

ដោយ

មហាជន និងអ្នកគាំទ្រមានការភ្ញាក់ផ្អើលបន្ទាប់ពីតារាប្រុស វីជេ អាឡាស្កូ បានបង្ហាញពីក្តីបារម្ភចំពោះសុខភាពក្រោយពេលជួបគ្រោះថ្នាក់ចរាចណ៍កាលពីថ្មីៗកន្លងទៅបណ្តាលឲ្យរងរបួសដៃ និងប៉ះពាល់ដល់ក្បាល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

វីជេ អាឡាស្កូ បានបញ្ជាក់នៅលើបណ្ដាញសង្គមរបស់លោកនូវការព្រួយបារម្ភទៅកាន់អ្នកគាំទ្រថា «ខ្ញុំគ្រាន់ធូរស្បើយហើយតែនៅស្ពឹកដៃដែលមានបញ្ហាហើយអាចងាប់សសៃរធ្វើឲ្យស្វិតដៃម្ខាងតាមយថាកម្មខ្ញុំ»។ ជាមួយគ្នានេះដែរ ក៏មានមហាជន និងអ្នកគាំទ្រមួយចំនួនបានជូនពរឲ្យលោកឆាប់ជាសះស្បើយ និងលើកទឹកចិត្តដល់ VJ អាឡាស្កូ គ្រប់គ្នា។

ថ្លែងមកកាន់«កម្ពុជាថ្មី» តាមសារអេឡិចត្រូនិក VJ អាឡាស្កូ បានឲ្យដឹងបន្ថែមថា កាលពីថ្មីៗនេះលោកបានជួបនូវគ្រោះថ្នាក់ចរាចរណ៍ត្រូវរថយន្តបុកបណ្តាលឲ្យរងរបួសដៃ និងក្បាល។ លោកថា បន្ទាប់គ្រោះថ្នាក់លោកបានទៅមន្ទីពេទ្យដើម្បីស្គែនមើលក្បាលតែសំណាងមិនប៉ះពាល់ធ្ងន់ធ្ងរ ចំណែកឯដៃម្ខាងភ្លាត់ឆ្អឹងស្មាបណ្ដាលឲ្យប៉ះពាល់សរសៃធំអាចនឹងស្វិតដៃម្ខាងផងដែរ។

គេចាំបានថា តារាប្រុសរូបសង្ហាគឺ Vj អាឡាស្កូ ចាប់តាំងពីអ្នកម្តាយជាទីស្រលាញ់បានចែកឋានទៅ តារាប្រុសរូបនេះបានឃ្លាតឆ្ងាយពីសិល្បៈអស់មួយរយៈធំមកហើយ។ ខណៈកន្លងមកមានទស្សនិកជន និងអ្នកគាំទ្រជាច្រើនតែងតែនឹករលឹកសួរនាំពីដំណឹងរបស់លោក។

បន្ទាប់ពីការអាក់ខានសិល្បៈអស់ពេលប្រមាណ ២ឆ្នាំមកនេះ កាលពីថ្មីៗ តារាប្រុសរូបនេះបានបង្ហាញខ្លួនវិលរកអាជីពសិល្បៈវិញហើយ ខណៈបច្ចុប្បន្នកំពុងចាប់ផ្តើមការងារមួយចំនួននៅតាមបណ្ដាកម្មវិធី និងក្រុមហ៊ុននានាជាដើម។ ចំណុចនេះក៏ត្រូវបានគេមើលឃើញថា ថ្វីត្បិតកន្លងមកលោកអវត្តមានសិល្បៈក៏ពិតមែន ប៉ុន្តែទីផ្សារ និងការគាំទ្រនៅតែរក្សាបានដូចដើម៕

អត្ថបទ៖ ចាន់រ៉ា

Related Topics:តារាខ្មែរ