មហាជនស្ញប់ស្ញែងសមត្ថភាព ខន សុវណ្ណសូនីតា ទោះត្រៀមខ្លួនត្រឹមប៉ុន្មានម៉ោងមុនប្រកួត តែធ្វើបានល្អ

ក្នុងរាត្រីប្រកួតផ្តាច់ព្រ័ត្រ កម្មវិធី Miss Planet Cambodia 2024 លើកទី៤ ដែលទើបនឹងបញ្ចប់កាលយប់មិញនេះ ម្ចាស់មកុដ គឺបានទៅលើបវរកញ្ញាប្រទេសអារ៉ាប់រួម ខណៈបវរកញ្ញាតំណាងកម្ពុជា កញ្ញា ខន សុវណ្ណសូនីតា មិនបានជាប់ក្នុង TOP ណាមួយឡើយ ប៉ុន្តែអាចយកបានតំណែង Miss Queen Popular Vote (Top 27+1) ។

បើទោះបីមិនទទួលជ័យជម្នះ តែ ខន សុវណ្ណសូនីតា បានឆក់យកបេះដូងមហាជន ដោយសារតែការខិតខំប្រឹងប្រែងរបស់ខ្លួន។ ខណៈសាធារណជនដែលជាអ្នកតាមដានវិស័យបវរកញ្ញា សុទ្ធតែជ្រាបហើយថា ការចូលរួមប្រកួតរបស់បវរកញ្ញាតំណាងកម្ពុជារូបនេះ គឺជាការជំនួសកញ្ញា ម្ចាស់មកុដ MPC ដេត ស្រីនាឌ ដែលពហិការមិនចូលរួម ហើយតម្រូវឱ្យលំដាប់រងទី១ ត្រូវជំនួសភ្លាមៗ ដោយបានត្រៀមខ្លួនមុនការប្រកួតត្រឹមប៉ុន្មានម៉ោងប៉ុណ្ណោះ។

ដោយហេតុនេះ មហាជនបានបញ្ចេញកោតសរសើរចំពោះ ខន សុវណ្ណសូនីតា ដែលខំប្រឹងអស់ពីសមត្ថភាព ក្នុងនាមជាម្ចាស់ផ្ទះនៃកម្មវិធី ដោយមានមតិភាគច្រើនលើកឡើងថា ទោះនាងមានពេលខ្លីបំផុត មិនបានសូម្បីតែដើរសមឆាក តែការបង្ហាញរបស់បវរកញ្ញារូបនេះនៅលើឆាកប្រកួត ពិតជាធ្វើបានល្អគួរឱ្យសរសើរ។

គួរឱ្យដឹងដែរថា ក្នុងការប្រកួតផ្តាច់ព្រ័ត្រ្ត Miss Planet International 2024 ម្ចាស់មកុដ បានទៅលើបវរកញ្ញាប្រទេសអារ៉ាប់រួម ខណៈលំដាប់រងទី ១ បានទៅលើបវរកញ្ញាលុចសំបួ, លំដាប់រងទី២ បានទៅលើបវរកញ្ញាថៃ, លំដាប់រងទី៣ បានទៅលើបវរកញ្ញាអ៊ុយក្រែន, លំដាប់រងទី៤ បានទៅលើបវរកញ្ញាហ្វីលីពីន; លំដាប់រងទី៥ បានទៅលើបវរកញ្ញាសហរដ្ឋអាមេរិក និងលំដាប់រងទី៦ បានទៅលើបវរកញ្ញាស៊ុយអែត។ ក្រៅពីនេះ នៅមានបវរកញ្ញាឥណ្ឌូនេស៊ី ដែលយកបានតំណែងគ្រងមកុដ Miss Planet Angel International 2024 ផងដែរ៕