តារា​សម្ដែង Park Min-jae ទទួល​មរណភាព​ដោយ​ជំងឺ​គាំង​បេះដូង​ភ្លាមៗ

យោងតាមរបាយការណ៍របស់សារព័ត៌មាន Xports កាលពីថ្ងៃទី ០២ ខែធ្នូ បានឲ្យដឹងថា Park Min-jae បានស្លាប់ដោយសារគាំងបេះដូងភ្លាមៗ នៅក្នុងប្រទេសចិន។ តាមរយៈគណនីរបស់តារាសម្ដែងប្រុសដែលកាន់ដោយបងប្រុស Park Min-jae បានបង្ហោះសារដ៏សោកសៅ ដោយសរសេរថា «ប្អូនប្រុសជាទីស្រលាញ់ សូមសម្រាកឲ្យបានសុខស្រួលហើយ សង្ឃឹមថានឹងមានមនុស្សដែលចងចាំប្អូនជារៀងរហូត»។

ទន្ទឹងគ្នានោះដែរ Hwang Ju-hye តំណាងរបស់ Big Title ដែលជាភ្នាក់ងាររបស់ Park Min-jae ក៏បានសម្តែងការសោកសៅរបស់នាងផងដែរ ដោយនិយាយថា «បុរសដែលនិយាយថា គាត់នឹងប្រជែងយកឈ្មោះក្នុងប្រទេសចិន ហើយនឹងធ្វើដំណើររយៈពេលមួយខែឬយូរជាងនេះ។ ប៉ុន្តែពេលនេះខ្ញុំពិតជាមានអារម្មណ៍រន្ធត់ចិត្តជាខ្លាំង សូម្បីតែគ្រួសារក៏មានអារម្មណ៍សោកសៅដែលមិនអាចនឹកស្មានដល់ Min-jae បានចាកចេញពីពួកយើង។ ខ្ញុំពិតជាដឹងគុណដែលបានធ្វើជាតំណាងរបស់អ្នក បើទោះបីជាត្រឹម​រយៈពេល​ខ្លី​ប៉ុណ្ណោះ ហើយ​ខ្ញុំ​សោកស្ដាយ​យ៉ាង​ខ្លាំង ខ្ញុំ​មិន​ភ្លេច​ឈ្មោះ​តារា​សម្ដែង Park Min-jaeទេ»។

យ៉ាងណាមិញ ផ្ទះ​បុណ្យសព​ត្រូវ​បាន​គេ​រៀបចំ​នៅ​បន្ទប់​ទី៩ នៃ​សាល​ពិធីបុណ្យសព​របស់​មន្ទីរពេទ្យ​សាកលវិទ្យាល័យ​ជាតិ​សេអ៊ូល។ ពិធីបុណ្យសពនឹងធ្វើឡើងនៅវេលាម៉ោង៩និង៣០នាទីព្រឹក ថ្ងៃទី៤ ខែធ្នូ ដោយទីកន្លែងបញ្ចុះសពមិនទាន់សម្រេចនៅឡើយ៕

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អត្ថបទ៖ សាង ស្រីល័ក្ខ

ចុចអាន៖Yoo Ah In ប្រញាប់លក់ផ្ទះនៅតំបន់ Itaewon ចំពេលប៉ូលិសស៊ើបអង្កេតគ្រឿងញៀនមិនទាន់ចប់