លោកត្រាំ​បើក​ដៃ​ឲ្យ​កូរ៉េខាងត្បូង សាងសង់​នាវាមុជទឹកនុយក្លេអ៊ែរ

ប្រធានាធិបតីអាមេរិក លោក ដូណាល់ ត្រាំ បានយល់ព្រមលើសំណើរបស់កូរ៉េខាងត្បូង ក្នុងការកសាងនាវាមុជទឹកដើរដោយថាមពលនុយក្លេអ៊ែរ ដែលជាការផ្លាស់ប្តូរដ៏សំខាន់មួយ ដែលនឹងធ្វើ​ឲ្យ​ទីក្រុងសេអ៊ូលក្លាយជាប្រទេសមួយក្នុងចំណោមប្រទេសផ្សេងៗ​ទៀត​ក្នុងពិភពលោក ដែលមាននាវាបែបនេះ។

យោង​តាម​ការ​ចុះ​ផ្សាយ​របស់​ The Guardian នាថ្ងៃ​ព្រហស្បតិ៍​ទី​៣០​ខែ​តុលា​ឆ្នាំ​២០២៥ លោកត្រាំ​ បានប្រកាសការសម្រេចចិត្តនេះ បន្ទាប់ពីកិច្ចពិភាក្សាជាមួយប្រធានាធិបតីកូរ៉េខាងត្បូងលោក Lee Jae Myung នៅទីក្រុង Gyeongju មុនពេលកិច្ចប្រជុំកំពូលនៃកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក (APEC)។ កិច្ចព្រមព្រៀងនេះ គឺជាផ្នែកមួយនៃកិច្ចព្រមព្រៀងទូលំទូលាយលើពាណិជ្ជកម្ម ការវិនិយោគ និងការកសាងនាវារវាងសម្ព័ន្ធមិត្តទាំងពីរ។

លោកត្រាំ បានសរសេរ​នៅលើ​បណ្ដាញ​សង្គម​ Truth Social ថា «ខ្ញុំបានផ្តល់ការយល់ព្រ​ម​ឲ្យពួកគេសាងសង់នាវាមុជទឹកដើរដោយថាមពលនុយក្លេអ៊ែរ ជាជាងនាវាមុជទឹកដើរដោយថាមពលម៉ាស៊ូតដែលមានលក្ខណៈចាស់ និងមិនសូវរហ័សរហួនដែលពួកគេមានឥឡូវនេះ»។ លោកបានបន្ថែមថា នាវាមុជទឹករបស់កូរ៉េខាងត្បូង នឹងត្រូវបានសាងសង់ «នៅក្នុងកន្លែងផលិតនាវា Philadelphia ក្នុងទឹកដី​សហរដ្ឋអាមេរិក»។

ខណៈពេលដែលកូរ៉េខាងត្បូងជាប្រទេសដែលមានឧស្សាហកម្មផលិតកប៉ាល់ទំនើបបំផុតមួយរបស់ពិភពលោក លោកត្រាំ មិនបានបញ្ជាក់ពីរបៀបដែលទីក្រុងសេអ៊ូលនឹងទទួលបានបច្ចេកវិទ្យាជំរុញនុយក្លេអ៊ែរ ដែលជាសមត្ថភាពដែលអាមេរិកធ្លាប់បានចែករំលែកជាមួយចក្រភពអង់គ្លេសក្រោមកិច្ចព្រមព្រៀងឆ្នាំ​១៩៥៨ និងថ្មីៗនេះជាមួយអូស្ត្រាលីតាមរយៈកតិកាសញ្ញា AUKUS នោះ​ទេ។

នៅក្នុងកិច្ចប្រជុំនេះ លោកប្រធានាធិបតី Lee បានជំរុញ​ឲ្យ​ទីក្រុងវ៉ាស៊ីនតោន យល់ព្រមលើការផ្ទេរឥន្ធនៈនុយក្លេអ៊ែរសម្រាប់ការជំរុញនាវាមុជទឹក ដោយសង្កត់ធ្ងន់ថា នាវាទាំងនោះនឹងមិនបំពាក់អាវុធនុយក្លេអ៊ែរឡើយ។ លោក Lee បាននិយាយថា «នាវាមុជទឹក​ប្រើ​ម៉ាស៊ូត​ មានសូវ​​ធន់នឹងការ​ជ្រមុជ​ទឹក ដែលរារាំង​សមត្ថភាពរបស់យើងក្នុងការតាមដាននាវាមុជទឹករបស់កូរ៉េខាងជើង ឬចិន»។

ការផ្លាស់ប្តូរនេះ គឺជាការផ្លាស់ប្តូរគោលនយោបាយដ៏សំខាន់មួយសម្រាប់ទីក្រុងវ៉ាស៊ីនតោន ដែលអស់រយៈពេលជាច្រើនទសវត្សរ៍បានប្រឆាំងនឹងមហិច្ឆតារបស់ទីក្រុងសេអ៊ូល ក្នុងការអភិវឌ្ឍនាវាមុជទឹកដើរដោយថាមពលនុយក្លេអ៊ែរ ដោយសារតែការព្រួយបារម្ភអំពីការរីកសាយភាយ​នុយក្លេអ៊ែរ។

លោក Daryl Kimball នាយកប្រតិបត្តិនៃសមាគមគ្រប់គ្រងអាវុធដែលមានមូលដ្ឋាននៅទីក្រុងវ៉ាស៊ីនតោន បានព្រមានថា ការសម្រេចចិត្តនេះអាចធ្វើ​ឲ្យ​ស្មុគស្មាញដល់កិច្ចខិតខំប្រឹងប្រែងមិនរីកសាយភាយជាសកល។ លោកបានប្រាប់អ្នកយកព័ត៌មានថា «នាវាមុជទឹកបែបនេះជាធម្មតាប្រើប្រាស់សារធាតុអ៊ុយរ៉ាញ៉ូមដែលចម្រាញ់​ខ្ពស់ ហើយនឹងត្រូវការរបបការពារថ្មីដ៏ស្មុគស្មាញ​ពី​ទីភ្នាក់ងារថាមពលបរមាណូអន្តរជាតិ»។

លោក Kimball បានបន្ថែមថា វានៅតែជា«បច្ចេកទេស និងយោធាដែលមិនចាំបាច់»សម្រាប់កូរ៉េខាងត្បូង ដើម្បីទទួលបានបច្ចេកវិទ្យាជំរុញនុយក្លេអ៊ែរ ដោយជំរុញ​ឲ្យ​រដ្ឋបាល​លោក​ត្រាំជៀសវាងការបង្កើតគំរូដែលអាចជំរុញ​ឲ្យ​មានការរីកសាយក្នុងចំណោមសម្ព័ន្ធមិត្ត។

ការប្រកាសនេះ ធ្វើឡើងចំពេលដែលភាពតានតឹងកាន់តែខ្លាំងឡើងនៅលើឧបទ្វីបកូរ៉េ ខណៈដែលកូរ៉េខាងជើងពង្រឹងកិច្ចសហប្រតិបត្តិការយោធាជាមួយរុស្ស៊ី និងបន្តកម្មវិធីសាកល្បងអាវុធរបស់ខ្លួន។

លោកត្រាំ បានបញ្ជាក់ថា លោកមិនអាចរៀបចំកិច្ចប្រជុំជាមួយមេដឹកនាំកូរ៉េខាងជើង គីម ជុងអ៊ុន ក្នុងអំឡុងដំណើរទស្សនកិច្ចរបស់លោកបានទេ បើទោះបីជាមានការរំពឹងទុកអំពីលទ្ធផល​វិជ្ជមាន​​ដែល​អាច​ជួយ​ដោះស្រាយ​​ភាព​ជាប់គាំងការទូតអាមេរិក និងកូរ៉េខាងជើងក៏ដោយ៕

ដោយ៖ ឈាង