ឥណ្ឌូណេស៊ីត្រៀមកម្លាំង២០០០០នាក់ សម្រាប់ការដាក់ពង្រាយទៅកាន់តំបន់ហ្គាហ្សា

រដ្ឋមន្ត្រីការពារជាតិឥណ្ឌូណេស៊ី លោក Sjafrie Sjamsoeddin ​និយាយ​ថា ឥណ្ឌូណេស៊ីបានរៀបចំកងកម្លាំងចំនួន ២០០០០​នាក់ សម្រាប់​ការ​ដាក់ពង្រាយដែលអាចកើតមានទៅកាន់តំបន់ហ្គាហ្សា ដោយរង់ចាំការអនុញ្ញាតពីអន្តរជាតិ។

យោងតាម​ការ​ចុះ​ផ្សាយ​នា​ថ្ងៃ​ទី​១៥​ខែ​វិច្ឆិកា​ឆ្នាំ​២០២៥​នេះ​របស់​សារព័ត៍មាន TRT លោក Sjafrie បានប្រាប់អ្នកយកព័ត៌មានថា កងកម្លាំងនេះ ដែលរួមមានបុគ្គលិកពេទ្យ វិស្វករ និងបុគ្គលិកសន្តិសុខ អាចត្រូវបានកែន នៅពេលដែលការអនុញ្ញាតត្រូវបានផ្តល់ឲ្យ។ ទីក្រុងហ្សាការតាកំពុងស្វែងរកផ្លូវ​ពីរសម្រាប់ទទួលបានការអនុញ្ញាត ទីមួយក្រោមអង្គការសហប្រជាជាតិ និងមួយទៀតតាមរយៈសម្ព័ន្ធភាពអន្តរជាតិដែលស្នើឡើងដោយប្រធានាធិបតីសហរដ្ឋអាមេរិក លោក ដូណាល់ ត្រាំ។

លោក Sjafrie បាននិយាយថា ជម្រើសទីពីរនឹងតម្រូវ​ឲ្យ​មានកិច្ចព្រមព្រៀងផ្ទាល់រវាងប្រមុខរដ្ឋ។ លោកបានបន្ថែមថា ការអនុញ្ញាតពីប្រទេសអារ៉ាប៊ីសាអូឌីត ហ្ស៊កដានី អេហ្ស៊ីប កាតា និងអារ៉ាប់រួម គឺចាំបាច់ រួមជាមួយនឹងការយល់ព្រមពីអ៊ីស្រាអែល។

ផែនការដាក់ពង្រាយនេះ គឺស្របតាមដំណាក់កាលទីមួយនៃសំណើសន្តិភាព២០ចំណុចរបស់លោកត្រាំ សម្រាប់តំបន់ហ្គាហ្សា ដែលការឈប់បាញ់ជាដំណាក់កាលបានចាប់ផ្តើមកាលពីថ្ងៃទី១០ខែតុលា។

លោក Sjafrie បានធ្វើការកត់សម្គាល់នេះក្នុងអំឡុងពេលដែលព្រះមហាក្សត្រ អាបឌុលឡាហ៍ទី២ (Abdullah II) នៃប្រទេសហ្ស៊កដានី យាងទស្សនកិច្ចនៅទីក្រុងហ្សាការតា ជាកន្លែងដែលព្រះអង្គបានជួបពិភាក្សាជាមួយប្រធានាធិបតីឥណ្ឌូណេស៊ី លោក ប្រាបូវ៉ូ ស៊ូប៊ីអាន់តូ អំពីការវិវឌ្ឍនៅក្នុងតំបន់ហ្គាហ្សា។ លោកបាន​ប្រាប់​ថា ឥណ្ឌូណេស៊ី និងហ្ស៊កដានីបានឯកភាពចែករំលែកព័ត៌មានសម្ងាត់ និង​បង្កើតគណៈកម្មាធិការរួមមួយដើម្បីសម្របសម្រួលបច្ចុប្បន្នភាពនានា។

បន្ទាប់ពីកិច្ចប្រជុំជាមួយប្រធានកងកម្លាំងប្រដាប់អាវុធហ្ស៊កដានី លោក Yousef Ahmed Al-Hunaiti លោក Sjafrie បាន​ឲ្យដឹង​ថា ទីក្រុងហ្សាការតាបានមើលឃើញពីតម្លៃយុទ្ធសាស្ត្រនៅក្នុងកិច្ចសហការជាមួយហ្ស៊កដានី ដោយសារតែប្រទេសនេះនៅជិតតំបន់ហ្គាហ្សា។

លោកបានបន្ថែមថា ប្រទេសទាំងពីរនឹងពង្រីកកិច្ចសហប្រតិបត្តិការការពារជាតិផងដែរ រួមទាំងការងារលើបច្ចេកវិទ្យាយន្តហោះគ្មានមនុស្សបើក (Drone) រវាងក្រុមហ៊ុនផលិតអាវុធរដ្ឋឥណ្ឌូណេស៊ី PT Pindad និងក្រុមហ៊ុន Deep Element របស់ហ្ស៊កដានី៕

ប្រែសម្រួល៖ ឈាង