លោក ត្រាំ ឲ្យ ថៃ យកពេលទៅដោះមីន ជាជាងចរចាពន្ធគយជាមួយ អាមេរិក

ប្រធានអាស៊ានលោក អាន់វ៉ា អ៊ីប្រាហ៊ីម បានទូរស័ព្ទទៅ អនុទីន ដោយធ្វើការបញ្ជាក់ជាថ្មីថា លោក ដូណាល់ ត្រាំ មិនបាន «ភ្ជាប់ការផ្អាកដោះមីនក្នុងប្រទេសថៃ ទៅនឹងការចរចាពន្ធគយរបស់សហរដ្ឋអាមេរិកទេ» តែជំរុញឲ្យរដ្ឋាភិបាលថៃ យកពេលវេលាទៅពន្លឿនការដោះមីនឲ្យបានលឿន តាមដែលអាចធ្វើទៅបាន។

តាមការផ្សាយពីកាសែត bangkokbiznews នាយករដ្ឋមន្ត្រីអនុទីន បានប្រកាសនៅក្នុងសារមួយថា នាយករដ្ឋមន្ត្រីម៉ាឡេស៊ី និងជាប្រធានអាស៊ានក្នុងឆ្នាំនេះផងដែរ បានទូរស័ព្ទមកលោកម្តងទៀត កាលពីយប់ថ្ងៃទី ១៥ ខែវិច្ឆិកា ឆ្នាំ ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទាក់ទងនឹងខ្លឹមសារនៃការសន្ទនា រវាងមេដឹកនាំទាំងពីរបានបញ្ចប់ដោយ អនុទីន បញ្ជាក់ថា លោកបានពិភាក្សាអំពីបញ្ហានេះជាមួយប្រធានាធិបតីអាមេរិកម្តងទៀត បន្ទាប់ពីការសន្ទនាពីមុនរបស់លោក។ លោកត្រាំបានចែករំលែកគោលជំហរផ្ទាល់ខ្លួនថា ការដោះមីនមនុស្សធម៌គឺជាបញ្ហាសំខាន់មួយនៅក្នុងសេចក្តីប្រកាស ដូចដែលបានចុះហត្ថលេខារវាងប្រទេសកម្ពុជានិងថៃកន្លងមក។

ដូច្នេះ លោកត្រាំបានស្នើសុំឲ្យរដ្ឋាភិបាលថៃពន្លឿនការដោះមីនឲ្យបានលឿនតាមដែលអាចធ្វើទៅបាន ដោយសារគ្រោះថ្នាក់ធ្ងន់ធ្ងរដល់អាយុជីវិតរបស់ប្រទេសទាំងពីរ។

ប្រធានាធិបតីអាមេរិកបានគូសបញ្ជាក់ទៀតថា លោកបានណែនាំនាយករដ្ឋមន្ត្រីម៉ាឡេស៊ីជូនដំណឹងដល់លោកអានុទីនម្តងទៀតថា «សហរដ្ឋអាមេរិកនឹងមិនពាក់ព័ន្ធនឹងការផ្អាកសេចក្តីប្រកាសរបស់ប្រទេសថៃ នៅក្នុងការចរចាពន្ធគយពាណិជ្ជកម្មដែលកំពុងដំណើរការរវាងប្រទេសថៃ និងសហរដ្ឋអាមេរិកនោះទេ»។

គួរបញ្ចាក់ដែរថា កាលពី​ថ្ងៃ​សៅរ៍​ទី​១៥ ​ខែ​វិច្ឆិកា ​ឆ្នាំ​២០២៥ ក្រសួងការបរទេសថៃបាន​ប្រកាស​ថា សហរដ្ឋអាមេរិកបានផ្អាកជាបណ្តោះអាសន្ននូវកិច្ចចរចាពាណិជ្ជកម្មទ្វេភាគី រហូតទាល់តែទីក្រុងបាងកកប្តេជ្ញាចិត្តឡើងវិញ ចំពោះសេចក្តីថ្លែងការណ៍រួមស្តីពីសន្តិភាពជាមួយកម្ពុជា។ យ៉ាងណា អ្នកនាំពាក្យក្រសួងការបរទេសថៃ លោក Nikorndej Balankura បានពណ៌នាថា ជាការខកចិត្ត និងមិនទាក់ទងទៅនឹងភាពតានតឹងតាមព្រំដែនដែលកំពុងបន្តនោះទេ៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

ក្ដៅៗ! អាមេរិកផ្អាកចរចាពាណិជ្ជកម្មជាមួយថៃ ដាក់សម្ពាធក្រុង​បាងកក​ឲ្យ​គោរព​កិច្ចព្រមព្រៀង​សន្តិភាពជាមួយកម្ពុជាវិញ