បាងកក ប្រឈមទឹកជំនន់ដល់ចុងសប្តាហ៍ ចំពេលព្រឹត្តិការណ៍ស៊ីហ្គេម

ទីក្រុងបាងកក ត្រូវប្រឈមនឹងគ្រោះទឹកជំនន់រហូតដល់ចុងសប្តាហ៍ ស្របពេលប្រទេសថៃ កំពុងរៀបចំព្រឹត្តិការណ៍កីឡាស៊ីហ្គេម។

តាមការផ្សាយរបស់ The Star កាលពីថ្ងៃអាទិត្យទី៧ខែធ្នូឆ្នាំ២០២៥ រដ្ឋបាលក្រុងបាងកក បានប្រកាសឲ្យមានការប្រុងប្រយ័ត្នខ្ពស់ ព្រោះតែទឹកទន្លេចៅប្រាយ៉ា នឹងហក់ឡើងខ្លាំងដល់ថ្ងៃសុក្រទី១២។

ស្របពេលជាមួយគ្នានោះដែរ រដ្ឋបាលក្រុងបានអំពាវនាវឲ្យសហគមន៍ចំនួន១១នៅជាប់មាត់ទន្លេ ត្រូវត្រៀមលក្ខណៈនិងតាមដានស្ថានការណ៍ឲ្យដិតដល់។

ការព្រមាននេះកើតឡើងស្របពេលថៃ ចាប់ផ្តើមព្រឹត្តិការណ៍កីឡាស៊ីហ្គេមលើកទី៣៣ ទាំងដែលពិធីនេះ កំពុងរងការរិះគន់យ៉ាងចាស់ដៃពីសំណាក់អ្នកក្នុងប្រទេស ជុំវិញកំហុសជាច្រើន ជាពិសេសគឺការរៀបចំនិងគ្រប់គ្រងមិនបានល្អ។

សូមជម្រាបថា ការ​ប្រកួត​ស៊ីហ្គេម​លើក​ទី​៣៣​ នឹងចាប់​ផ្តើម​ពីថ្ងៃទី​​៩ខែ​ធ្នូ​រហូតដល់​ថ្ងៃទី​២០ខែ​​ធ្នូ​។ ​ប្រទេសបាន​ធ្វើ​ជាម្ចាស់ផ្ទះ​ក្នុងការ​រៀបចំ​​ព្រឹត្តិការណ៍នេះ​ចំនួន​​៦​លើក​កន្លងមកហើយ គឺ​នៅទីក្រុងបាងកក​ចំនួន​៤លើក ​ក្នុងឆ្នាំ​១៩៥៩, ១៩៦៧, ​១៩៧៥ និង ១៩៨៥ ខណៈឆ្នាំ​​១៩៩៥ ​រៀបចំ​នៅ ​ឈៀងម៉ៃ និង នៅឆ្នាំ​២០០៧ ត្រូវរៀបចំ​នៅ​ខេត្ត​ Nakhon Ratchasima៕

អត្ថបទ៖ សុខ សុវណ្ណ