ណេតាន់យ៉ាហ៊ូ៖ ដំណាក់កាលទីពីរនៃបទឈប់បាញ់ហ្គាហ្សាអាចចាប់ផ្តើមក្នុងពេលឆាប់ៗ

នាយករដ្ឋមន្ត្រីអ៊ីស្រាអែល លោក ​បេនចាមីន ណេតាន់យ៉ាហ៊ូ បាន​ប្រកាស​ថា អ៊ីស្រាអែល និងហាម៉ាស «រំពឹងថានឹងឈានចូលដំណាក់កាលទីពីរ» នៃកិច្ចព្រមព្រៀងបទឈប់បាញ់ក្នុងពេលឆាប់ៗ នៅពេលដែលក្រុម​សកម្ម​ប្រយុទ្ធ​ប៉ាឡេស្ទីន​ប្រគល់អដ្ឋិធាតុរបស់ចំណាប់ខ្មាំងចុងក្រោយ។

ថ្លែងនៅក្នុងសន្និសីទសារព័ត៌មានជាមួយអធិការបតីអាល្លឺម៉ង់ លោក Friedrich Merz ដែលកំពុងបំពេញទស្សនកិច្ច​កាល​ពី​ថ្ងៃ​អាទិត្យ​ទី​៧​ខែ​ធ្នូ​ឆ្នាំ​២០២៥ លោក​ណេតាន់យ៉ាហ៊ូ បាន​លើក​ឡើង​ថា ដំណាក់កាលបន្ទាប់ ដែលគ្របដណ្តប់លើការរំសាយអាវុធហាម៉ាស និងការដកកងកម្លាំងអ៊ីស្រាអែលចេញពី​តំបន់​ហ្គាហ្សា អាចចាប់ផ្តើមនៅចុងខែនេះ។

ក្រុមហាម៉ាសនៅមិនទាន់បានប្រគល់អដ្ឋិធាតុរបស់លោក Ran Gvili ជាមន្ត្រីប៉ូលិសវ័យ២៤ឆ្នាំ ដែលត្រូវបានសម្លាប់នៅក្នុងការវាយប្រហារដែលដឹកនាំដោយហាម៉ាស​កាល​ពី​ថ្ងៃទី​៧​ខែតុលា​ឆ្នាំ​២០២៣​នោះទេ។ អ៊ីស្រាអែលនិយាយថា ការប្រគល់សពរបស់លោក ក្នុងលក្ខខណ្ឌដោះដូរជាមួយអដ្ឋិធាតុប៉ាឡេស្ទីនចំនួន១៥នាក់ នឹងបញ្ចប់ដំណាក់កាលដំបូងនៃផែនការឈប់បាញ់ចំនួន២០ចំណុច ដែលរៀបចំដោយប្រធានាធិបតីអាមេរិក លោក ដូណាល់ ត្រាំ។

មន្ត្រីជាន់ខ្ពស់របស់ហាម៉ាសម្នាក់បានប្រាប់ទីភ្នាក់ងារសារព័ត៌មាន Associated Press ថា ក្រុមនេះត្រៀមខ្លួនពិភាក្សាអំពី «ការបង្កក ឬការរក្សាទុក ឬការដាក់ចុះ» នូវអាវុធរបស់ខ្លួនដែលជាផ្នែកមួយនៃកិច្ចព្រមព្រៀង ដែលជាបញ្ហាមួយក្នុងចំណោមបញ្ហាដ៏ចម្រូងចម្រាសបំផុតនៃបទឈប់បាញ់។

លោកណេតាន់យ៉ាហ៊ូ បានព្រមានថា ដំណាក់កាលទីពីរនឹង «ពោរពេញដោយបញ្ហាប្រឈម» ដោយកត់សម្គាល់ថា ដំណាក់កាលទីបីមានគោលបំណង «ដកឫសគល់នៃភាពជ្រុលនិយមនៅហ្គាហ្សា» ស្រដៀងនឹងកិច្ចខិតខំប្រឹងប្រែងក្រោយសង្គ្រាមនៅអាល្លឺម៉ង់ និងជប៉ុន។ លោកបានថ្លែងថា «ពិតណាស់ ហាម៉ាសត្រូវតែត្រូវរំសាយ​ខ្លួន»។

ហាម៉ាសអះអាងថា ខ្លួនមិនអាចកំណត់ទីតាំងអដ្ឋិធាតុទាំងអស់បានទេ ដោយសារតែអដ្ឋិធាតុខ្លះត្រូវបានកប់នៅក្រោមគំនរបាក់បែកពីការវាយលុកពីរឆ្នាំរបស់អ៊ីស្រាអែល។ អ៊ីស្រាអែលចោទប្រកាន់ក្រុមនេះថាជាការបង្អែបង្អង់ និងបានគំរាមបន្តប្រតិបត្តិការយោធា ឬរឹតត្បិតជំនួយមនុស្សធម៌ បើអដ្ឋិធាតុទាំងអស់មិនត្រូវបានប្រគល់មកវិញ។ ក្រុមគ្រួសាររបស់ចំណាប់ខ្មាំង បាននិយាយនៅក្នុងសេចក្តីថ្លែងការណ៍មួយថា «យើងមិនអាចឈានទៅដល់ដំណាក់កាលបន្ទាប់បានទេ មុនពេលលោក Ran Gvili ត្រឡប់មកផ្ទះវិញ»។

ការវាយប្រហារដែលដឹកនាំដោយហាម៉ាសក្នុងឆ្នាំ២០២៣ បានសម្លាប់មនុស្ស១២០០នាក់នៅក្នុងប្រទេសអ៊ីស្រាអែល និង​មាន​មនុស្សជាង២៥០​នាក់ត្រូវ​ចាប់ធ្វើ​ជាចំណាប់ខ្មាំង។ ការវាយលុក​សងសឹក​របស់អ៊ីស្រាអែលនៅហ្គាហ្សា បានសម្លាប់ជនជាតិប៉ាឡេស្ទីនយ៉ាងហោចណាស់ ៧០ ៣៦០​នាក់។ នេះបើយោងតាមក្រសួងសុខាភិបាលដែលគ្រប់គ្រងដោយហាម៉ាស៕

​ប្រែសម្រួល៖ ឈាង