ត្រាំ ប្រាប់​ថា លោក​ខកចិត្ត ពេល​​ហ្សេលេនស្គី​ មិន​ទាន់​ចុះ​ហត្ថលេខា​លើ​ផែនការសន្តិភាព​អាមេរិក

ប្រធានាធិបតីសហរដ្ឋអាមេរិក លោក ដូណាល់ ត្រាំ បាន​​ប្រាប់​ថា លោក​«​ខកចិត្តខ្លះ​ដែរ» នៅ​ពេល​ដែល​ប្រធានាធិបតីអ៊ុយក្រែន លោក វ៉ូឡូឌីមៀរ ហ្សេលេនស្គី មិនទាន់​ព្រម​ចុះហត្ថលេខាលើ​សំណើ​សន្តិភាព ដែលមានគោលបំណងបញ្ចប់សង្រ្គាមរុស្ស៊ី-អ៊ុយក្រែនជិតបួនឆ្នាំ​មក​នេះ។

យោង​តាម​ទីភ្នាក់ងារ​ព័ត៍មាន AP ថ្លែងទៅកាន់អ្នកយកព័ត៌មានមុនពេលចូលរួមកម្មវិធី Kennedy Center Honors កាល​ពី​ថ្ងៃ​អាទិត្យ​ទី​៧​ខែ​ធ្នូ​ឆ្នាំ​២០២៥ លោកត្រាំ បាន​និយាយ​​ថា «ខ្ញុំជឿថា រុស្ស៊ីមិនអីទេជាមួយផែនការនេះ ប៉ុន្តែខ្ញុំមិនប្រាកដថា លោក​ហ្សេលេនស្គី​នឹង​ចូលចិត្ត​​វា​ឬ​ក៏​អត់​នោះ​ទេ»។

លោកត្រាំ​ នៅ​តែ​បង្ហាញ​ពី​ទំនាក់ទំនងតានតឹងជាមួយលោក​ហ្សេលេនស្គី ហើយបានប្រកែក​ម្តងហើយម្តងទៀតថា អ៊ុយក្រែនគួរតែយល់ព្រមប្រគល់ទឹកដីដើម្បីបញ្ចប់សង្គ្រាម ដែលលោកថាបានឆក់យកអាយុជីវិតច្រើនពេក និងបានធ្វើ​ឲ្យ​អាមេរិក​ខាត​បង់​លុយ​​​​សន្ធឹកសន្ធាប់។

ទន្ទឹម​គ្នា​នេះ​ដែរ លោក​ហ្សេលេនស្គី បាន​លើក​ឡើង​ថា លោកបានធ្វើ«ការសន្ទនា​មួយ​តាមទូរសព្ទប្រកបដោយខ្លឹមសារ» កាលពីថ្ងៃសៅរ៍ជាមួយមន្ត្រី​អាមេរិក និងអ៊ុយក្រែន បន្ទាប់ពីកិច្ច​ចរចារយៈពេលបីថ្ងៃនៅរដ្ឋផ្លរីដា ដោយទទូចថា អ៊ុយក្រែននៅតែប្តេជ្ញាចិត្តធ្វើការ«ដោយសុច្ចរិត» ឆ្ពោះទៅរកកិច្ចព្រមព្រៀងសន្តិភាពពិតប្រាកដមួយ។

វិមានក្រឹមឡាំងកាលពីថ្ងៃអាទិត្យបានស្វាគមន៍យុទ្ធសាស្ត្រសន្តិសុខជាតិដែលទើបតែចេញផ្សាយថ្មីរបស់រដ្ឋបាលលោកត្រាំ ដោយអ្នកនាំពាក្យ លោក Dmitry Peskov បានប្រាប់ទីភ្នាក់ងារសារព័ត៌មាន Tass ដែលជាស្ថាប័នរដ្ឋថា ឯកសារនេះស្របតាមបំណងប្រាថ្នារបស់ទីក្រុងមូស្គូសម្រាប់ «កិច្ចសន្ទនា» និងការកែលម្អទំនាក់ទំនង។

លោក Keith Kellogg បេសកជនអ៊ុយក្រែនដែលផុតអាណត្តិរបស់លោកត្រាំ បាននិយាយថា កិច្ចខិតខំប្រឹងប្រែងសន្តិភាពនៅសល់បញ្ហាពីរដែលមិនទាន់ដោះស្រាយ គឺ​ការគ្រប់គ្រងតំបន់ Donbas និងរោងចក្រនុយក្លេអ៊ែរ Zaporizhzhia ដែលទាំងពីរនេះភាគច្រើនត្រូវបានគ្រប់គ្រងដោយរុស្ស៊ី៕

ប្រែសម្រួល៖ ឈាង