រុស្ស៊ី-អ៊ុយក្រែន ដោះដូរឈ្លើយសឹកគ្នា ម្ខាង ១៥៧នាក់

ជាសញ្ញាវិជ្ជមានមួយទៀតក្នុងសង្គ្រាមរុស្ស៊ី-អ៊ុយក្រែន! ប្រទេសទាំងពីរបានធ្វើការដោះដូរឈ្លើយសឹកគ្នាទ្រង់ទ្រាយធំ ដើម្បីឲ្យពួកគេវិលទៅជុំគ្រួសារវិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការផ្សាយរបស់ BBC នៅថ្ងៃសុក្រទី៦ខែកុម្ភៈឆ្នាំ២០២៦ ការដោះដូរនេះធ្វើឡើងនៅតំបន់ព្រំដែនអ៊ុយក្រែន ប៉ុន្តែគេមិនបញ្ជាក់ឡើយថាជាកន្លែងណា។

ភាគីទាំងពីរបានដោះដូរឈ្លើយសឹកគ្នាម្ខាង១៥៧នាក់ ប៉ុន្តែក្នុងចំណោមអ្នកទោសអ៊ុយក្រែនទាំងអស់ គឺមានជនស៊ីវិល៧នាក់ ចំណែករុស្ស៊ីក៏មានជនស៊ីវិល៣នាក់ផងដែរ ពោលគឺមិនមែនជាទាហានទាំងអស់ទេ។

ទន្ទឹមនោះ បើយោងតាមការផ្សាយរបស់ RT, ទាហានរុស្ស៊ីដែលត្រូវដោះលែង គឺបានទៅដល់ប្រទេសបេឡារុស រួចនឹងបន្តដំណើរចូលរុស្ស៊ី សម្រាប់ការពិនិត្យសុខភាព មុននឹងទៅជួបជុំគ្រួសារ។

ជុំវិញព្រឹត្តិការណ៍នេះ ប្រធានាធិបតីអ៊ុយក្រែន វ៉ូឡូឌីមៀរ ហ្សេលេនស្គី បានបង្ហោះសារលើបណ្តាញសង្គ​មថា៖ «ការដោះដូរអ្នកទោសថ្ងៃព្រហស្បតិ៍ បានកើតឡើងបន្ទាប់ពីការអាក់ខានយ៉ាងយូរ។ យើងកំពុងនាំយកប្រជាជនរបស់យើងត្រឡប់មកផ្ទះវិញចំនួន១៥៧នាក់។ ក្នុងនោះមានទាំងទាហាននៃកងកម្លាំងប្រដាប់អាវុធ កងឆ្មាំជាតិ និងភ្នាក់ងារការពារព្រំដែនរដ្ឋផងដែរ ហើយជនស៊ីវិលក៏កំពុងត្រឡប់មកវិញជា​មួយក្រុមអ្នកការពារទាំងនោះដែរ។ ពួកគេភាគច្រើន ត្រូវចាប់យកទៅឃុំ តាំងពីឆ្នាំ២០២២មកម៉្លេះ»។

សូមជម្រាបថា នេះគឺជាការដោះដូរអ្នកទោសសង្គ្រាមលើកដំបូងក្នុងរយៈពេល៥ខែចុងក្រោយ បន្ទាប់ពីការអាក់ខានតាំងពីខែតុលាឆ្នាំ២០២៥មក។ គិតមកទល់ពេលនេះ ភាគីទាំងពីរបានដោះដូរអ្នកទោសគ្នាសរុប ៧១លើកហើយ ចាប់តាំងពីរុស្ស៊ីបើកការវាយប្រហារទ្រង់ទ្រាយធំបានចាប់ផ្តើមក្នុងឆ្នាំ ២០២២។

បើគិតតែតាមរយៈការសម្របសម្រួលពីសំណាក់ប្រទេសអារ៉ាប់រួម ចំនួនអ្នកទោសដែលត្រូវបានដោះលែងសរុបមានរហូតដល់ ៤ ៩៩៥ នាក់ ប៉ុន្តែប្រសិនបើបូករួមទាំងការសម្របសម្រួលពីប្រទេសផ្សេងៗទៀតដូចជា តួកគី និងអារ៉ាប៊ីសាអូឌីត តួលេខសរុបអាចមានច្រើនជាងនេះ៕

អត្ថបទ៖ សុខ សុវណ្ណ