ឥណ្ឌា ជំរុញពលរដ្ឋ​ខ្លួន​​​ចាកចេញបន្ទាន់​ពី​អ៊ីរ៉ង់ តាមគ្រប់មធ្យោបាយ​ដែល​​ដំណើរការ​បាន​​

ស្ថានទូតឥណ្ឌាប្រចាំទីក្រុងតេហេរ៉ង់បានចេញសេចក្តីជូនដំណឹងថ្មីមួយនៅក្នុងការបង្ហោះលើប្រព័ន្ធផ្សព្វផ្សាយសង្គមកាលពីថ្ងៃទី២៣ខែកុម្ភៈ ដោយជំរុញពលរដ្ឋទាំងអស់របស់ខ្លួនដែលរស់នៅក្នុងប្រទេសអ៊ីរ៉ង់ ឲ្យ​ចាកចេញជាបន្ទាន់ ដោយប្រើគ្រប់មធ្យោបាយដឹកជញ្ជូនដែលមាន រួមទាំងជើងហោះហើរពាណិជ្ជកម្ម ខណៈដែលស្ថានការណ៍កាន់តែតានតឹងខ្លាំងឡើង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការ​ផ្សាយ​របស់​ timesofindia ក្រសួងការបរទេសឥណ្ឌាបានលើកឡើងថា ដោយសារស្ថានភាពកំពុងវិវត្ត ជនជាតិឥណ្ឌាកំពុងស្ថិតនៅ ឬអ្នកដែលរស់នៅក្នុងប្រទេសអ៊ីរ៉ង់ រួមទាំងនិស្សិត អ្នកជំនួញ អ្នកធ្វើធម្មយាត្រា និងអ្នកទេសចរ សូមចាកចេញដោយប្រើជើងហោះហើរពាណិជ្ជកម្ម ឬជម្រើសធ្វើដំណើរដែលអាចដំណើរការបានផ្សេងទៀត។ ជាពិសេស អំឡុងពេលនេះ ពលរដ្ឋឥណ្ឌា និង PIOs (ជនជាតិដើមឥណ្ឌា) ទាំងអស់គួរតែប្រុងប្រយ័ត្ន ចៀសវាងតំបន់នៃការតវ៉ា ឬបាតុកម្ម រក្សាទំនាក់ទំនងជាមួយស្ថានទូតឥណ្ឌានៅក្នុងប្រទេសអ៊ីរ៉ង់ និងតាមដានប្រព័ន្ធផ្សព្វផ្សាយក្នុងស្រុកសម្រាប់ការវិវត្តណាមួយ។

សេចក្តិ​ជូន​ដំណឹង​​ព្រមាននេះដែរ កើតឡើងមុនដំណើរទស្សនកិច្ចដែលបានគ្រោងទុកដោយនាយករដ្ឋមន្ត្រីឥណ្ឌា លោក Narendra Modi ទៅកាន់អ៊ីស្រាអែល នៅថ្ងៃពុធ។ ស្របពេលដែលនាយករដ្ឋមន្ត្រីអ៊ីស្រាអែល លោក បេនចាមីន ណេតាន់នីញ៉ាហ៊ូ  កាលពីថ្ងៃអាទិត្យ បាននិយាយថា ដំណើរទស្សនកិច្ចរបស់លោក Modi នឹងជួយបង្កើតសម្ព័ន្ធភាពថ្មីមួយដើម្បីទប់ទល់នឹងអ្វីដែលលោកបានពិពណ៌នាថា ជា «សត្រូវ»។

លោក Modi បានសរសេរនៅក្នុងសារមួយនៅលើប្រព័ន្ធផ្សព្វផ្សាយសង្គមថា ឥណ្ឌាឲ្យតម្លៃយ៉ាងខ្លាំងចំពោះមិត្តភាពដ៏យូរអង្វែងជាមួយអ៊ីស្រាអែល ដែលបង្កើតឡើងដោយផ្អែកលើការជឿទុកចិត្ត ការច្នៃប្រឌិត និងប្តេជ្ញាចិត្តរួមគ្នាចំពោះសន្តិភាព និងវឌ្ឍនភាព។

ទីក្រុងញូវដេលីបានពង្រីកកិច្ចសហប្រតិបត្តិការជាមួយអ៊ីស្រាអែលជាលំដាប់លើវិស័យការពារជាតិ កសិកម្ម បច្ចេកវិទ្យា និងសន្តិសុខ។ ក្នុងពេលជាមួយគ្នានេះ ឥណ្ឌាក៏រក្សាទំនាក់ទំនងរឹងមាំជាមួយប្រទេសឈូងសមុទ្រ និងទីក្រុងតេហេរ៉ង់ រួមទាំងការអភិវឌ្ឍកំពង់ផែ Chabahar របស់អ៊ីរ៉ង់ ផ្លូវពាណិជ្ជកម្មទៅកាន់ប្រទេសអាហ្វហ្គានីស្ថាន ជាទីតាំងដែលទីក្រុងញូវដេលីបានបង្កើតទំនាក់ទំនងរបស់ខ្លួនជាមួយអាជ្ញាធរតាលីបង់ផងដែរ៕

អត្ថបទ៖ សាង ស្រីល័ក្ខ