ស្ថានការកំពុងក្ដៅខ្លាំង ចិនអំពាវនាវពលរដ្ឋ ជម្លៀសចេញ ពីអ៊ីរ៉ង់ភ្លាមៗ

ទាក់ទងនឹងស្ថានភាពសន្តិសុខបច្ចុប្បន្ននៅក្នុងប្រទេសអ៊ីរ៉ង់ ក្រសួងការបរទេសចិន និងស្ថានទូត និងស្ថានកុងស៊ុលចិនប្រចាំនៅអ៊ីរ៉ង់ កាលពីថ្ងៃ២៧ខែកុម្ភៈបានចេញសេចក្តីថ្លែងការណ៍មួយនៅលើ WeChat ដោយអំពាវនាវឲ្យពលរដ្ឋនៅចាកចេញជាបន្ទាន់ និងព្រមានកុំឲ្យទៅប្រទេសនេះ ខណៈដែលភាពតានតឹងរវាងសហរដ្ឋអាមេរិក និងអ៊ីរ៉ង់កាន់តែកើនឡើងដោយមិនទាយទុកមុនបាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាម ទីភ្នាក់ងារសារព័ត៌មានរដ្ឋ Xinhua បានរាយការណ៍ដោយដកស្រង់ពីនាយកដ្ឋានកុងស៊ុល ក្រសួងការបរទេសចិនថា ពលរដ្ឋចិនដែលកំពុងនៅក្នុងប្រទេសអ៊ីរ៉ង់ គួរតែពង្រឹងការប្រុងប្រយ័ត្នសន្តិសុខ និងចាកចេញឲ្យបានឆាប់តាមដែលអាចធ្វើទៅបាន។ ជាពិសេសក្នុងពេលនេះ ក្រសួងសូមណែនាំពលរដ្ឋចៀសវាងការធ្វើដំណើរទៅកាន់ប្រទេសអ៊ីរ៉ង់ ដោយលើកឡើងពីស្ថានភាពសន្តិសុខ ចំពេលមានភាពតានតឹងកើនឡើង កំពុងបើកផ្ទាំងថ្មីរវាងទីក្រុងវ៉ាស៊ីនតោន និងទីក្រុងតេហេរ៉ង់។

សេចក្តីថ្លែងការណ៍នេះក៏បានបញ្ជាក់ផងដែរថា ស្ថានទូត និងស្ថានកុងស៊ុលចិនប្រចាំនៅប្រទេសអ៊ីរ៉ង់ និងប្រទេសជិតខាងនឹងផ្តល់ការគាំទ្រចាំបាច់ដល់ពលរដ្ឋចិន ដែលចង់ធ្វើដំណើរតាមជើងហោះហើរពាណិជ្ជកម្ម ឬផ្លូវគោក។

ដោយឡែក កាលពីនៅថ្ងៃទី ២៦ខែកុម្ភៈ នៅពេលសួរអំពីភាពតានតឹងកាន់តែខ្លាំងឡើងរវាងអាមេរិក និងអ៊ីរ៉ង់ អ្នកនាំពាក្យក្រសួងការបរទេសចិន លោកស្រី Mao Ning បាននិយាយថា ចិនកំពុងតាមដានយ៉ាងដិតដល់នូវការវិវត្តទាក់ទងនឹងស្ថានភាពនៅក្នុងប្រទេសអ៊ីរ៉ង់ និងប្រឆាំងនឹងការប្រើប្រាស់ ឬការគំរាមកំហែងនៃការប្រើប្រាស់កម្លាំងក្នុងទំនាក់ទំនងអន្តរជាតិ។ លោកស្រីបានសង្កត់ធ្ងន់ថា ចិនតែងតែតស៊ូមតិដោះស្រាយបញ្ហាតាមរយៈវិធានការនយោបាយ និងការទូត។

យោងតាមអ្នកនាំពាក្យ ប្រជាជនចិន និងអ៊ីរ៉ង់មានទំនាក់ទំនងមិត្តភាពប្រពៃណីយូរអង្វែងមកហើយ។ កន្លងមក ចិនតែងតែគាំទ្ររដ្ឋាភិបាល និងប្រជាជនអ៊ីរ៉ង់ក្នុងការការពារស្ថិរភាពជាតិ ក៏ដូចជាសិទ្ធិ និងផលប្រយោជន៍ស្របច្បាប់របស់ប្រទេសនេះ។ ទីក្រុងប៉េកាំងក៏សង្ឃឹមថា គ្រប់ភាគីទាំងអស់នឹងគោរពសន្តិភាព អនុវត្តការអត់ធ្មត់ និងដោះស្រាយភាពខុសគ្នាតាមរយៈការសន្ទនា។ ប្រទេសចិនបានត្រៀមខ្លួនរួចជាស្រេច ដើម្បីបន្តដើរតួនាទីជាមហាអំណាចដែលមានទំនួលខុសត្រូវក្នុងរឿងនេះ៕

អត្ថបទ៖ សាង ស្រីល័ក្ខ