ព័ត៌មានអន្ដរជាតិ

រុស្ស៊ីនិងចិន រួមគ្នារិះគន់ អាមេរិក-អ៊ីស្រាអែល ដែលវាយប្រហារអ៊ីរ៉ង់ ទាំងគ្មានភស្តុតាង

បានផុស

៣ ខែ មុន

នៅ

ថ្ងៃពុធ ៤ មីនា ២០២៦

ដោយ

ប្រទេសរុស្ស៊ី និងចិន បានរិះគន់ចំពោះការវាយប្រហាររបស់សហរដ្ឋអាមេរិក និងអ៊ីស្រាអែលលើប្រទេសអ៊ីរ៉ង់ ដោយទីក្រុងមូស្គូ លើកឡើងថា «មិនឃើញភស្តុតាង» ណាមួយដែលបង្ហាញថាទីក្រុងតេហេរ៉ង់កំពុងអភិវឌ្ឍអាវុធនុយក្លេអ៊ែរទេ ចំណែកទីក្រុងប៉េកាំងវិញ ទាមទារឱ្យបញ្ឈប់ការវាយប្រហារជាបន្ទាន់។

រដ្ឋមន្ត្រីការបរទេសចិន លោក វ៉ាង យី ។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាម Al Jazeera ចុះផ្សាយថ្ងៃទី០៤ខែមីនា ឆ្នាំ២០២៦, រដ្ឋមន្ត្រីការបរទេសចិន លោក វ៉ាង យី (Wang Yi) ប្រាប់សមភាគីអ៊ីស្រាអែល លោក Gideon Saar កាលពីថ្ងៃអង្គារថា ការវាយប្រហារលើអ៊ីរ៉ង់បានកើតឡើង ខណៈការចរចារវាងទីក្រុងវ៉ាស៊ីនតោន និងទីក្រុងតេហេរ៉ង់មានវឌ្ឍនភាពគួរឱ្យកត់សម្គាល់ រួមទាំងការដោះស្រាយកង្វល់សន្តិសុខរបស់អ៊ីស្រាអែល។

លោក វ៉ាង ប្រាប់រដ្ឋមន្ត្រីការបរទេសអ៊ីស្រាអែល អំឡុងពេលសន្ទនាតាមទូរស័ព្ទថា៖ «ជាអកុសល ដំណើរការនេះត្រូវបានរំខានដោយសកម្មភាពយោធា។ ប្រទេសចិនប្រឆាំងនឹងការវាយប្រហារយោធាណាមួយ ដែលធ្វើឡើងដោយអ៊ីស្រាអែលនិងសហរដ្ឋអាមេរិកប្រឆាំងនឹងអ៊ីរ៉ង់»។

លោកបន្តទៀតថា៖ «ប្រទេសចិនអំពាវនាវឱ្យបញ្ឈប់ប្រតិបត្តិការយោធាជាបន្ទាន់ ដើម្បីទប់ស្កាត់ការកើនឡើងបន្ថែមទៀត និងការបាត់បង់ការគ្រប់គ្រងលើជម្លោះ។ ការប្រើកម្លាំងមិនអាចដោះស្រាយបញ្ហាបានពិតប្រាកដទេ។ ផ្ទុយទៅវិញ វានឹងនាំមកនូវបញ្ហាថ្មីៗ និងផលវិបាកធ្ងន់ធ្ងររយៈពេលវែង»។

យោងតាមក្រសួងការបរទេសចិន, លោក Saar បានយល់ព្រមតាមសំណើរបស់ លោក វ៉ាង ក្នុងការចាត់វិធានការជាក់ស្តែង ដើម្បីធានាសុវត្ថិភាពបុគ្គលិក និងស្ថាប័នចិននៅក្នុងប្រទេសអ៊ីរ៉ង់។

ការអំពាវនាវកាលពីថ្ងៃអង្គារជាមួយអ៊ីស្រាអែល និងកិច្ចខិតខំប្រឹងប្រែងជាក់ស្តែងរបស់ទីក្រុងប៉េកាំង ដើម្បីធ្វើយ៉ាងណាឱ្យស្ថានភាពក្នុងតំបន់មានស្ថិរភាពឡើងវិញ៕

ប្រែសម្រួល៖ ណឺ មិនា