ព័ត៌មានអន្ដរជាតិ

ចិនព្រមានអសន្តិសុខក្នុងតំបន់ ព្រោះតែជប៉ុន និងអាមេរិករៀបចំលំហាត់សមយុទ្ធទ្រង់ទ្រាយធំនៅហ្វីលីពីន

បានផុស

២ ខែ មុន

នៅ

ថ្ងៃអង្គារ ២១ មេសា ២០២៦

ដោយ

ទាហានអាមេរិក-ជប៉ុន អាកាសយានិក និងនាវិកជាង ១៧ ០០០ នាក់ បានកំពុងចូលរួមក្នុងសមយុទ្ធទ្រង់ទ្រាយធំរយៈពេល១៩ថ្ងៃ នៅប្រទេសហ្វីលីពីន រួមទាំងទាហានមកពីប្រទេសអូស្ត្រាលី នូវែលសេឡង់ បារាំង និងកាណាដា។

ការណ៍នេះប្រទេសចិនព្រមានប្រឆាំងនឹងកិច្ចសហប្រតិបត្តិការយោធាដែលអាចធ្វើឱ្យប៉ះពាល់ដល់ទំនុកចិត្តនិងនាំឱ្យបែកបាក់ប្រទេសក្នុងតំបន់ ខណៈសហរដ្ឋអាមេរិកនិងហ្វីលីពីនចាប់ផ្តើមសមយុទ្ធយោធាប្រចាំឆ្នាំដោយមានការចូលរួមពីកងទ័ពជប៉ុនកាន់តែច្រើន។ នេះបើយោងតាមភ្នាក់ងារសារព័ត៌មានរ៉យទ័រផ្សាយថ្ងៃទី២០ ខែមេសា ឆ្នាំ២០២៦ ។

អ្នកនាំពាក្យក្រសួងការបរទេសចិន លោក Guo Jiakun ថ្លែងក្នុងសន្និសីទសារព័ត៌មានក្នុងទីក្រុងប៉េកាំងកាលពីថ្ងៃចន្ទថា៖ « អ្វីដែលតំបន់អាស៊ីប៉ាស៊ីហ្វិកត្រូវការខ្លាំងបំផុតគឺសន្តិភាពនិងភាពស្ងប់ស្ងាត់ ហើយអ្វីដែលតំបន់នេះត្រូវការតិចបំផុតគឺការណែនាំកម្លាំងខាងក្រៅ បង្កើតឱ្យមានការបែកបាក់និងការប្រឈមមុខដាក់គ្នា»។

អ្នកនាំពាក្យក្រសួងការបរទេសចិន លោក Guo Jiakun ។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Guo លើកឡើងថា៖ « កិច្ចសហប្រតិបត្តិការយោធារវាងប្រទេសនានាមិនគួរធ្វើឱ្យប៉ះពាល់ដល់ការយោគយល់គ្នាទៅវិញទៅមក និងការជឿទុកចិត្តគ្នាក្នុងចំណោមប្រទេសក្នុងតំបន់ រំខានដល់សន្តិភាពនិងស្ថិរភាព ដែលតម្រង់ទិសប្រឆាំងនឹងភាគីទីបី ឬប៉ះពាល់ដល់ផលប្រយោជន៍របស់ពួកគេឡើយ»។

លោកបន្តថា៖ « យើងចង់រំលឹកដល់ប្រទេសពាក់ព័ន្ធថា ការបន្តចងភ្ជាប់ខ្លួនឯងលើសន្តិសុខ នឹងនាំឱ្យខ្លួនឯងឆេះនិងបង្កផលវិបាកទៅវិញទៅមកមិនខាន»។

គួរបញ្ជាក់ថាសមយុទ្ធប្រចាំឆ្នាំដ៏ធំ «Balikatan ឬ ស្មាទល់ស្មា» ចាប់ផ្តើមកាលពីម្សិលមិញ នៅថ្ងៃទី២០ ខែមេសា ដល់ថ្ងៃទី៨ ខែឧសភា ឆ្នាំ២០២៦ រួមមានភាគីជប៉ុនចូលរួមក្នុងសមយុទ្ធបាញ់គ្រាប់ពិតជាលើកដំបូងទៀតផង។

ដោយឡែកយោធាចិននិយាយកាលពីថ្ងៃសុក្រសប្តាហ៍មុនថា ខ្លួនបានដាក់ពង្រាយកងកម្លាំងជើងទឹកនិងទ័ពអាកាស ដើម្បីតាមដាននាវាពិឃាដជប៉ុនម៉ាក JS Ikazuchi ឆ្លងកាត់ច្រកសមុទ្រតៃវ៉ាន់។

យោងតាមសេចក្តីថ្លែងការណ៍មួយពីក្រសួងការពារជាតិជប៉ុន នាវាចម្បាំងនេះត្រូវបានចុះបញ្ជីជាផ្នែកមួយនៃអង្គភាពដែលចូលរួមក្នុងសមយុទ្ធពហុភាគី។

ពេលសួរពីវត្តមានរបស់នាវាពិឃាដ Ikazuchi ក្នុងច្រកសមុទ្រតៃវ៉ាន់ និងការចូលរួមរបស់ជប៉ុនក្នុងសមយុទ្ធយោធាដ៏ធំនៅហ្វីលីពីន លោក Guo និយាយថា៖ « ទីក្រុងតូក្យូគួរតែប្រុងប្រយ័ត្ន ជាជាងអួតអាងអំណាចយោធារបស់ខ្លួននៅគ្រប់ទីកន្លែង និងធ្វើឱ្យប៉ះពាល់ដល់ស្ថិរភាពក្នុងតំបន់»៕

ប្រែសម្រួល៖ ណឺ មិនា

សេចក្ដីជូនដំណឹង៥ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា