ចៅក្រមតុលាការ ICC សម្រេចបន្តសវនាការកាត់ទោសលោក Duterte

រឿងក្ដីដ៏ក្ដៅគគុករបស់អតីតប្រធានាធិបតីហ្វីលីពីន លោក Rodrigo Duterte បានឈានដល់ដំណាក់កាលសំខាន់មួយទៀតហើយ បន្ទាប់ពីចៅក្រមឧទ្ធរណ៍នៃតុលាការព្រហ្មទណ្ឌអន្តរជាតិ (ICC) បានសម្រេច​ថា តុលាការពិតជាមានអំណាចពេញលេញក្នុងការកាត់ទោសមេដឹកនាំរូបនេះ ពាក់ព័ន្ធ​នឹង​តួនាទី​យ៉ាងសំខាន់​របស់​លោក​អំឡុង​យុទ្ធនាការបង្ក្រាបគ្រឿងញៀនដែលបណ្តាលឲ្យ​មនុស្សរាប់ពាន់នាក់បាត់បង់ជីវិត។ ការសម្រេចនេះបានធ្វើ​ឲ្យ​បំណងរបស់ភាគីការពារក្ដី ដែលចង់ឲ្យ​តុលាការទម្លាក់ចោលការចោទប្រកាន់លើលោក Duterte ត្រូវរលាយសាបសូន្យ។

យោង​តាម​ការ​ចុះផ្សាយ​​នា​ថ្ងៃទី​២៣​ខែមេសា​ឆ្នាំ​២០២៦​របស់​ Asia One នៅឯប្រទេសហ្វីលីពីនឯណោះវិញ គ្រួសារនៃជនរងគ្រោះដែលបានតាមដានការផ្សាយបន្តផ្ទាល់នៃការប្រកាសសាលក្រមនេះ បានផ្ទុះការត្រេកអរយ៉ាងខ្លាំង រហូតមានការស្រែកហ៊ោពេញសាកលវិទ្យាល័យដែលពួកគេបានជួបជុំគ្នាកាល​ពី​ថ្ងៃពុធ។ សម្រាប់ពួកគេ នេះគឺជាពន្លឺនៃយុត្តិធម៌ដែលរង់ចាំជាយូរមកហើយ។ ដោយឡែក លោក Duterte ដែលបច្ចុប្បន្នមានវ័យ៨១​ឆ្នាំ និងកំពុងត្រូវបានឃុំខ្លួននៅក្នុងពន្ធនាគាររបស់តុលាការ ICC នៅទីក្រុងឡាអេ ចាប់តាំងពីខែមីនាឆ្នាំ២០២៥មកនោះ មិនបានបង្ហាញខ្លួននៅក្នុងបន្ទប់សវនាការដោយផ្ទាល់ឡើយ។

ចំណុចចម្រូងចម្រាសបំផុតនៅក្នុងរឿងក្ដីនេះ គឺការដែលប្រទេសហ្វីលីពីនបានដកខ្លួនចេញពីសមាជិកភាពនៃតុលាការ ICC កាលពីឆ្នាំ២០១៨។ មេធាវីការពារក្ដីរបស់លោក Duterte បានយកហេតុផលនេះមកអះអាងថា តុលាការលែងមានសិទ្ធិកាត់ទោសកូនក្ដីរបស់ខ្លួនទៀតហើយ និងបានទាមទារឲ្យ​មានការដោះលែងលោកជាបន្ទាន់។ ប៉ុន្តែ ចៅក្រមឧទ្ធរណ៍បានបដិសេធការលើកឡើងនេះ ដោយពន្យល់ថា ការស៊ើបអង្កេតបឋមបានចាប់ផ្ដើមតាំងពីមុនពេលហ្វីលីពីនដកខ្លួនចេញម្ល៉េះ ដូច្នេះតុលាការនៅតែមានអំណាចបន្តនីតិវិធីលើបទល្មើសដែលបានកើតឡើងក្នុងអំឡុងពេលនោះដដែល។

តាមការចោទប្រកាន់របស់​រដ្ឋ​អាជ្ញា លោក Duterte បានបង្កើត និង​បង្កប់​កង​កម្លាំង ព្រម​ទាំង​ផ្ដល់អាវុធដល់ក្រុមខ្មាន់កាំភ្លើង ដើម្បីតាមសម្លាប់អ្នកជួញដូរ និងអ្នកប្រើប្រាស់គ្រឿងញៀន ក្នុងអំឡុងពេលលោកកាន់អំណាចពីឆ្នាំ២០១៦ ដល់ឆ្នាំ២០២២។ យ៉ាង​ណាមិញ លោក Duterte តែងតែបដិសេធ និងអះអាងថា លោកគ្រាន់តែបញ្ជាឲ្យ​ប៉ូលិសបាញ់សម្លាប់ក្នុងករណីការពារខ្លួនតែប៉ុណ្ណោះ៕

ប្រែសម្រួល៖ ឈាង